Uphaas

 Shaurya Singhania ek naujawan ladka hain. Woh apne maata-pita ka iklauta ladka hain. Shaurya ke pita ka naam, Aman Singhania hain aur maata ka naam, Bhaavna Singhania hain.

Aman Singhania ek choti si kiraane ki dukaan chalate hain. Ek zamaane mein, Aman ek factory ke maalik hua karte the. Lekin, woh factory ka kaarobar sambhaal nahi paaye. 

Darasal, us factory ko Aman ke pita ne shuru kiya tha. Aman ke pita ke guzarne ke baad, kaarobar ki zimmedari Aman ke kandhon par aa gayi; lekin, woh use sahi dhang se chala nahi paaye. 

Kaarobar mein lagaatar ghata hota raha aur dekhte hi dekhte kuch saalon mein factory band ho gayi.

Bache hue paison se woh roz-marra ki zindagi ke zaroorat ke saaman ka vyapaar karne lag gaye. Is karobaar mein Aman ki kamaayi toh ho rahi hain, lekin; ummeed ke mutaabik nahi.

 

Shaurya bachpan se hi apne zyadatar rishtedaron dwara naapasand kiya gaya hain.

Kahi Na Kahi, Aman apni zindagi mein ek haara hua insaan saabit hua hain. Yahi wajah hain ki, Shaurya ko uske zyadatar rishtedaar; nazar-andaaz kar dete hain.

Is kaaran se, Shaurya ka bachpan akelepan mein guzara hain. 

Kuch rishtedaar Shaurya ko bohut zyada pyaar bhi karte hain. Un logon ka pyaar aur lagaav, Shaurya ko uske akelepan se durr kar deta hain. Lekin, jab bhi kisi parivaarik samaaroh mein jab woh pohuchta hain; use bheed se alag hone ka ehsaas aksar hota hain.

Shaurya ke saath aisa bhed-bhaav hota hua dekh kar, Aman aur Bhaavna ke Dil ko bohut thes pohuchta hain. Shaurya ke saath aisa bhed-bhaav hote hue un dono ne kai baar, dekha hain. Isliye, woh dono apne zyadatar rishtedaron ke yahan jaane se bachte hain.

Ek baar ki baat hain. Shaam ka waqt tha aur poora Parivaar saath mein baitha hua yahan-wahan ki baatein kar raha tha.

Tabhi, Aman ke phone par ek Call aata hain. Call Aman ke Bhai ka tha. Aman Call uthata hain aur kehta hain, "Haan Sanjay. Kaise ho tum ?"

Sanjay - "Main thik hoon Bhaiyaa aap kaise ho ?"

Aman - "Main bilkul thik hoon. Aur batao, ghar mein baaki logon ka kya haal hain ?"

Sanjay - "Sab thik hain Bhaiyaa. Accha maine ek baat kehne ke liye aapko Call kiya tha."

Aman - "Kya baat kehne ke liye ?"

Sanjay - "Woh Pooja ki Shaadi tay ho gayi hain."

Aman - "Bhai Vaah. Yeh toh bohut hi badhiya khabar sunayi hain tumne. Ladka kya kaam karta hain ?"

Sanjay - "Ladka Engineer hain."

Aman - "Bohut hi acchi khabar sunayi hain tumne Sanjay."

Sanjay - "Accha Bhaiyaa ek baat kehni thi aapse."

Aman - "Haan kaho."

Sanjay - "Bhaiyaa main jaanta hoon ki aap bas keh doge ki aap log Shaadi mein aaoge. Lekin, main aap sabhi logon ko Shaadi mein upasthit dekhna chahta hoon."

Aman - "Sanjay tumhe pata hain ki, meri naakamyaabi ki wajah se hamare apne mujhe kitna pasand karte hain."

Sanjay - "Bhaiyaa Shaadi zindagi mein sirf ek baar hi hoti hain. Pooja ghar se vidaa ho rahi hain. Iske baad, woh hum sabke liye paraayi ho jaayegi."

Aman Sanjay ko samjhaate hue kehta hain, "Haan Sanjay main tumhari baat bilkul samajhta hoon. Par tumhe acche se pata hain ki, zyadatar rishtedaar hume apne yahan bulaane se bachte hain. Aur naa hi koi hamare yahan aana pasand karta hain. Ismein kahi na kahi mera hi dosh hain."

Sanjay - "Kya aapki zindagi mein hum logon ki koi ahmiyat nahi hain ?"

Aman ek gehri saans leta hain aur kehta hain, "Thik hain Sanjay. Hum log zaroor aayenge."

Naa chahte hue bhi, woh log Pooja ki Shaadi mein pohuch jaate hain. Sanjay ka Dil nahi tod sakte the woh log. Jahan ek aur, zyadatar rishtedaar kabhi bhi un logon se khule Dil se baat nahi karte the, wahi dusri aur Sanjay jaise kuch gine chune rishtedaar hi the, jo ki un logon se behad sammaaan ke saath pesh aate the.

Shaadi samaaroh mein sabhi rishtedaron ki aapas mein, behad ghul-mil kar baat-cheet ho rahi thi. Tabhi usi samay, Shaurya ki Chachi bol padti hain, "Bhaiyaa accha hua jo aapko ladka hi hain. Shaurya ko aage acchi post mil jaaye, toh baaki sab aur accha ho jaayega."

Aman muskurate hue kehte hain, "Ji woh baat toh hain."

Chachi - "Agar aapki ladki hoti, toh aapko dahej dena padta. Ho sakta hain ki shayad aap apni beti ki Shaadi utne dhoom-dhaam se nahi kara paate. Ab ladka hain, toh koi acchi ladki mil jaayegi toh is ladke ki bhi zindagi sawar jaayegi."

Tabhi Chachi Shaurya se puchti hain, "Beta tumhari pagaar kitni hain ?"

Shaurya - "Chachi woh meri pagaar, pachaas hazaar rupaye hain."

Chachi - "Motorcycle se office jaate hoge tum ?"

Shaurya - "Nahi Chachi main bus se office jaata hoon."

Chachi - "Chaho toh Loan par ek Motorcycle kharid lo."

Shaurya - "Filhal uski zaroorat nahi hain Chachi. Aur agar motorcycle lunga bhi toh ek baar mein poora payment karke hi lunga."

Chachi - "Tab toh tumhari poori pagaar motorcycle kharidne mein hi swaaha ho jaayegi."

Phir Chachi hansne lagti hain.

Shaurya ko yeh baat chubh jaati hain. Lekin, woh kuch nahi kehta hain.

Shaurya ki Bua Shaurya ke paas aati hain aur kehti hain, "Mera ladka ek na ek din mujhe apni imported Car mein ghumaane le jaayega."

Shaurya muskurate hue kehta hain, "Ji Bua."

"Shuarya tum sirf kaho mat. Tum mere haath mein apna haath rakh kar mujhse vaada karo." Kehte hue, Shaurya ki Bua apna haath uski aur badhaati hain.

Shaurya apna haath apni Bua ke haath par rakhta hain aur kehta hain, "Bua ek din main aapko apni kamayi se kharidi hui imported Car mein zaroor ghumaaunga."

Pooja ki Shaadi bohut dhoom-dhaam se ho jaati hain. Kaafi lambe samay ke baad, yeh Parivaar apne sabhi rishtedaron se mila. Do din baad, woh log wapas apne ghar aa gaye. 

Kuch din beete, aur poori duniya ki tarah Shaurya aur uske maata-pita bhi apni roz-marra ki zindagi mein lag gaye.

Lekin, Shaurya Chachi dwara kiya gaya uphaas bhool nahi paa raha tha. Yeh beizatti use bohut chubh rahi thi. Woh andar hi andar aakrosh se bhara jaa raha tha.

Shaurya ko ab aisa mehsus ho raha tha ki woh apne jeevan mein kuch kar hi nahi raha hain. Woh ab yeh sochne lag gaya tha ki, woh apne jeevan ka amulya samay; vyarth mein hi gawaa raha hain. 

'Kya main apne jeevan ke saath khelwaad kar raha hoon ?' Shaurya sochta hain.

Shaurya ab apni kalpanaao ke saagar mein chalaang laga chuka tha.

'Yeh duniya kitni badal chuki hain. Ek zamaana tha, jab yeh duniya sirf ek jungle thi. Is Vann mein insaan din bhar apne liye khaana khojta aur aadamkhor jaanwaron se apne aap ko surakshit karne ke liye sangharsh karta tha.

Sangharsh karte-karte insaan aakhir kitni tarakki kar chuka hain. Ek zamaane mein, jaha insaan ka koi thikaana nahi hua karta tha, aaj usi insaan ne apne liye ghar bana diya. Bade-Bade bungale bana diye. Duniya bhar ki itni mehngi se mehngi cheezein bana di, ki ek aam aadmi chahe apni saari zindagi hi kyun na laga de phir bhi woh in cheezon ko kharid nahi sakta hain. Lekin, phir bhi is sansaar mein aise kai log hain; jo ki in cheezon ko aise kharidte hain, jaise ki koi roz-marra jeevan ke aavashyakta ki cheez ho.'

'Ek insaan apni saari zindagi laga deta hain, lekin phir bhi woh keval kuch hazaar rupaaye hi kamaa pata hain. Wahi dusri aur ek insaan aisa hain, jo laakhon rupaaye har roz kharch kar deta hain.'

'Jungle mein ek saath daudte-daudte hum insaan ek dusre se kitne alag ho gaye hain ? Aakhir hum manushyon ke beech yeh antar kaise aaya ? Kya main is antar ko kabhi bhar sakta hoon ?'

Tabhi Shaurya ke zehan mein dusra khayal aaya, 'Agar koshish karun toh main, is antar ko bharne ke yogya ban sakta hoon.'

Agle din se Shaurya market se sambhaavit vyapaar ke avasar dhoondhna shuru kar deta hain. Kuch dino ke baad, Shaurya ko yeh ehsaas hota hain ki use bazaar ko bohut baariki se samjhne ki aavashyakta hain. Tabhi woh vyapaar mein apne pair jamaane mein safal ho paayega.

Shaurya apne jeevan ka poora ek saal bazaar ki gatividhiyon par nazar tikaaaye rakhta hain aur alag-alag tarah ke vyapaar ki jaankariyan ikattha karta rehta hain.

Shaurya ko do-teen tarah ke vyapaar pasand bhi aa jaate hain. Lekin, chunaav toh ek ka hi karna tha. Saath Hi Saath is baat ka bhi khayal rakhna tha, ki kam laagat mein vyapaar shuru kiya jaaye. 

Shaurya aise vyapaariyon ko dhundhta hain jo apne saamaan ki bikri badhaana chahte hain. Woh un vyapaariyon ko graahak laa-laakar deta aur us bikri se hone wale munaafe se apna hissaa le leta. Kuch samay tak, woh ek bicholiye ke taur par kaam kar raha tha. Shaurya ki yeh tarakki dekh kar na keval uska parivaar balki, uske kareebi rishtedaar bhi bohut khush the. 

Shaurya ne abhi tak apni naukri nahi chodi thi. Kyunki, woh chahta tha ki, pehla uska karoobar jam jaaye. Usne socha ki, jab tak uska ek pukhta kaarobar tayyar na ho jaaye; tab tak woh apni naukri nahi chodega.

Kareeb paanch saal beet gaye. Lekin, woh ab bhi naukri kar raha tha aur saath hi saath vyapaariyon ke beech saudaa karwaa kar woh zyada munaafa bhi kamaa raha tha.

Din Prati Din woh kaamyaabi ke shikhar par pohuchta jaa raha tha.

Aakhir mein Shaurya ne ek badaa faisla liya. Shaurya ne khud ki factory khol di. Us factory mein woh namak banata aur use bazaar mein bechta. Kaafi samay laga, lekin aakhir mein Shaurya ka vyapaar chal pada. 

Sabhi rishtedar aur jaan-pehchan walon ke beech Shaurya ka bohut maan bhi badha. Shaurya ne ek Car bhi kharidi. Tabhi Shaurya ke ek dusre rishtedaar ke yahan ek Shaadi thi. Shaurya apne maata-pita ke saath us Shaadi mein gaya. 

Shaurya ki vinamrata dekh kar sabhi log khush the aur woh Chachi hairaan thi. Wahi par kai rishtedaar Shaurya ki shaadi ki bhi baat kar rahe the. 

Tabhi woh Chachi Shaurya ke paas aayi. Shaurya ne unke pair chue. Chachi ko apne aap par naarazgi aa rahi thi. Kuch saal pehle bola gaya vyang unhe yaad aa raha tha. Tabhi Chachi ke aankhon se aansun chalak pade. Phir unke pati ne unse pucha, "Tum dukhi kyun ho?"

Chachi chup thi. Shaurya ke Chacha aage kehte hain, "Agar main chahta toh, us din sabke saamne tumhe samjha sakta tha. Lekin, main Shaurya ki samajhdaari parakhna chahta tha. Us din, Shaurya ki khaamoshi dekh kar mujhe usi din andaaza lag chuka tha ki, Shaurya kabhi na kabhi; kuch badaa kaam zaroor karega apne jeevan mein. Main bas yeh dekhna chahta tha ki, use aakhir waqt kitna lagega."

Shaurya ne apne Chacha ke pair chue aur unhone Shaurya ko apne gale se laga liya. Chacha ki bhi aankhein bhar aayi thi. 

Chacha ne aage kaha, "Us din Shaurya ka jo uphaas udaya tha tumne, uske ek-ek shabd mujhe aaj bhi yaad hain. Aur tum yeh samajhne ki galati bhool kar bhi mat karna ki agar tumne us din Shaurya ka uphaas nahi udaaya hota toh aaj Shaurya itna kaamyaab nahi ho paata. Is galatfehmi mein bhoolkar bhi mat raho tum. Shaurya ki pratibha uske sahan-sheelta mein usi din jhalak rahi thi. Bas use apni pratibha ko nikhaarne mein thoda samay lag gaya. Aaj Shaurya jis mukaam par pohuch chuka hain, itne kam samay mein bohut kam hi log us mukaam par pohuch paate hain."

Chachi ke aankhon se aansun bahe jaa rahe the. Chacha apni baat aage kehte hain, "Manushya ki ek bohut hi buri aadat hain. Woh apne se kamzor ko behad hay drushti se dekhta hain. Lekin, woh yeh baat aksar bhool jaata hain ki, samay hamesha ek sa nahi rehta hain. Woh badalte rehta hain. Samay mein itni shakti hoti hain ki woh palak jhapakte hi, Raja ko Rank aur Rank ko Raja bana deta hain. Samay badaa balwaan."

Chachi khud ko Shaurya ka gunehgaar maan rahi thi aur apne aap ko behad chota mehsus kar rahi thi. Woh waha upasthit kisi bhi rishtedaar se apni nazrein nahi mila paa rahi thi. Wahi dusri aur sabhi rishtedaaron ki aankhon mein Shaurya ke prati garv dikhaayi de raha tha.

                 - Ved Vineet Gautam