Lamhe

 Samar Purohit ek naujawan ladka hain. Woh ek College mein padhaayi karta hain. Woh bachpan se hi baat-cheet mein bohut tezz raha hain. Jis wajah se log bohut jaldi hi uske dost ban jaate hain. 

College mein Samar ke kai dost hain. Kuch ladke, toh kuch ladkiyaan bhi.

Ek din ki baat hain. Lecture ke dauraan, Class ke Professor ne sabhi vidyarthiyon ko kisi bhi topic par bhaashan dene ka project diya tha. Class khatam hua aur sabhi bacche Class se bahar jaane lage. Tabhi Samar ki nazar Amyra par padi.

Amyra jo ki Samar ki Classmate thi, woh bench par baithi kisi soch mein doobi hui thi. Samar Amyra ke pass gaya aur Samar ne Amyra ke aankhon ke saamne chutki bajayi. Amyra hosh mein aayi. Phir Samar ne kaha, "Aakhir kis khayal mein doobi hui ho tum Amyra ?"

Amyra - "Kisi bhi khayaal mein nahi."

Samar - "Maine dekha. Tum kahi kho gayi thi."

Amyra - "Main samajh nahi paa rahi hoon, ki main aakhir kis topic par bhaashan doon ?"

Samar - "Is duniya mein topic ki kya kami hain ?"

Amyra - "Jaise ki ?"

Samar - "Hum tum kaise mile. Is baare mein koi bhaashan de do. Ya phir Sir ne jo task diya hain, woh unhone kyun diya hain ? Aakhir unki soch kya hain, is baare mein kuch keh do."

Amyra - "Tumne sahi kaha. Topic hi Topic hain. Lekin, sahi topic ka chunaav kaise ho ?"

Samar - "Jo tumhara Dil kahe, woh karo."

Amyra muskurati hain aur woh apna bag utha kar jaane lagti hain. Samar bhi uske saath kadam se kadam mila kar chalta hain. Dono yahan-wahan ki baatein karte hain aur apne-apne ke liye nikal padte hain.

 Kuch dino baad, woh din aaya aur sabhi vidyarthiyon ne apna-apna bhaashan diya. Samar aur Amyra ne bhi bhaashan diya. 

College ke din bohut hi acche se nikale. Haste-Khelte, College ke teen saal kaise guzar gaye, pata hi nahi chala.

College ka farewell tha. Sabhi students khoob saj-dhaj kar aaye hue the. Samar ne neele rang ka suit pehna hua tha. Sabhi dost, Samar ke suit ki bohut tareef kar rahe the.

Tabhi Samar ki nazar Amyra par padi. Amyra ne peele rang ka Gown pehna hua tha. Us Gown mein woh bilkul kisi Pari ki tarah dikh rahi thi. Samar use dekhta hi reh gaya. Woh Samar ke paas aayi aur uske kandhe par apna haath rakh di. Samar hosh mein aaya. Phir Amyra poochi, "Kaha khoye hue ho Samar ?"

Samar - "Kahi nahi."

Amyra - "Kya tum mere saath dance karoge ?"

Samar ne 'Haan' mein apna sar hilaya.

Dono ne saath mein dance kiya. Dance ke dauran, Samar bohut dhyaan se Amyra ko dekh raha tha. Amyra baar-baar Samar se uske ude hue hosh ki wajah pooch rahi thi aur Samar bas itna hi keh deta, "Kuch nahi."

Dance khatam hone ke baad, sabhi dost yahan-wahan ki baatein kar rahe the. Samar ki nazar Amyra par jo jhatke se padi, woh pal Samar ke zehan se jaa nahi paa raha tha. Samar ne socha ki, yeh bas pal bhar ka aakarshan hoga.

College ki pareeksha hui aur results bhi aaye. Sabhi vidyarthiyon ne bohut hi acche ank laaye aur sabhi ko acchi naukri mil gayi. Kuch logon ko usi shehar mein, toh kuch logon ko alag-alag shehar mein bhi naukri mili. 

Samar ko Delhi mein naukri mili. Uske maata-pita ab bhi puraane shehar mein hi rehte hain. Samar Delhi mein akela rehta hain. Lekin, use ek aalishan flat mila hain. Woh naukri se acchi kamayi kar raha hain. 

Ek din ki baat hain. Woh apne flat mein baitha hua tha. Aaj Samar ki chutti thi. Shaam ka waqt tha. Woh kitchen mein Coffee banaya aur Coffee ka Cup lekar, balcony mein aa baitha. Balcony ke bahar ka nazara bohut hi khoobsurat tha. Aasmaan mein baadal chaaye hue the. Baadal par halki soneri rang ki lakeeren thi. Aisa lag raha tha, maano baadal ne Sone ki chain pehni ho jaise. 

'Aaj mausam kitna khoobsurat hain.' Samar ne socha. Samar ko College chode hue kai mahine beet chuke the. Kabhi-Kabhi kuch doston se baat-cheet bhi ho jaati thi. Samar sochne laga ki, uske College ke koun-kounse dost aaj kya kar rahe the. 

Tabhi achanak se Samar ke zehan mein, Amyra ka khayaal aaya. Samar ko Farewell Party ke din, Amyra ka us peele rang ke gown mein hone wali smriti aayi. Samar ko aaj bhi Amyra ke us din wala roop bohut hi acchi tarah se yaad hain.  

'Aakhir meri Zindagi mein kis baat ki kami hain ?' Samar ne socha. Use apne antarmann mein Amyra ka muskurata hua chehra dobara dikha. Samar ke aankhon se aansun chalak pade. Aaj Samar ko Amyra ke saath bitaya hua har lamha yaad aa raha tha. Khaas kar, Amyra ke hothon ki muskaan reh-reh kar, Samar ke saamne aa rahi thi. Samar ne apna mobile nikaala aur usmein Amyra ka number dhoondhne laga. Phir use yaad aaya, ki usne Amyra se kabhi bhi uska contact number maanga hi nahi.

'Aakhir kitna bada bewakoof hoon main.' Samar ne socha. Phir uske aankhon se aansun chalak pade. 

Zindagi ki is tezz raftaar mein, Samar itna kho chuka tha, ki use apne aap ke baare mein bhi sochne ki fursat nahi thi.

Lekin, kaafi lambe samay baad, Samar aaj bohut khaali tha aur akele baithe-baithe Samar ke zehan mein Amyra ka aks nazar aa raha tha.

Samar ko Amyra ki yaad aa rahi thi. Samar ko ab apni zindagi mein ek khaali pan ka ehsaas ho raha tha. Woh ehsaas, Amyra ka tha. 

Samar ne socha, 'Aaj main khaali pada hua hoon, toh bas aise hi Amyra ka khayaal aaya hoga. Kal se kaam par dobara lagunga, toh phir se vyast ho jaaunga.'

Lekin, Samar galat tha. Samar ko reh-reh kar Amyra ki yaad satane lagi. Woh kaam par jab hota, tab woh thik mehsus karta. Par, khaali waqt ke dauraan, Samar ko Amyra ki yaad pareshan karti. Samar ko College ke dauraan, Amyra ke saath bitaya hua har ek pal yaad aata. 

Dheere-Dheere, Samar andar hi andar baichain rehne laga. Woh badalta jaa raha tha aur uska badlaav uske vyavhaar mein saaf dikhayi dene laga. Din guzra, mahine guzare, lekin; Amyra ki yaad nahi guzar rahi thi. 

Samar samajh chuka tha ki woh Amyra se pyaar karta hain. Woh jab akela aur khaali hota, woh aksar Amyra ki yaadon mein kho jaata. Samar ko, Amyra ke saath bitaya hua har ek pal yaad aata. Amyra ki har ek muskaan yaad aati. 

Ek shaam ki baat hain. Woh apne balcony mein baitha hua tha. Usne apne jeb se apna mobile nikaala aur woh Social Media sites par Amyra ko dhoondhne laga. Lekin, dikkat yeh thi, ki Samar ko Amyra ka last name nahi pata tha.

Ek din Samar ne socha, 'Kyun na main doston se poochun ?'

Thode-Bohut jin bhi doston ka number Samar ke paas tha, usne ek-ek karke sabhi se Amyra ke baare mein poocha. Lekin, badkismati se kisi ko bhi Amyra ka kuch pata nahi tha.

Kaafi samay beet gaya, lekin; Samar ko Amyra ke baare mein kuch bhi pata nahi chal paaya.

Ek din ki baat hain. Samar apne office se bahar nikala. Aaj Office mein kaam zyada hone ki wajah se woh behad thaka hua tha. Naukri mein kaam ke bojh ki wajah se, Samar ko kab Cigarette peene ki aadat lag gayi, thi use khud pata nahi chala. Dhumrapaan karne walon ke liye, thakaan dur karne ka ekmaatr vikalp hota hain Cigarette. 

Samar ek tapri par gaya aur wahan se ek Cigarette kharid kar peene laga. Aasmaan saaf tha. Suraj dheere-dheere dhalne ki tayyari mein tha. Mausam bohut khoobsurat nazar aa raha tha. Samar Cigarette ka lutf utha raha tha. Tabhi use mehsus hota hain ki, kisi ne uske kandhe par apna haath rakha hain. Woh bagal mein mudkar dekhta hain aur dang reh jaata hain. Uske bagal mein Amyra khadi thi. Woh khush bhi tha aur hairaan bhi tha.

Amyra ko dekh kar, Samar ka muh khula ka khula reh gaya. Woh kuch kehna chahta tha, par woh cha kar bhi kuch keh nahi paa raha tha. Tabhi Amyra boli, "Samar ? Samar Purohit. Hain na ?"

Samar ne 'Haan' mein apna sar hilaya. 

Amyra - "Pehchana mujhe ?"

Samar - "Haan. Am, Amay, Amyra."

Amyra - "Itna haklaake kyun bol rahe ho tum Samar ? Pehle toh tumhe yeh aadat nahi thi."

Samar - "Ab main kya bolun ?"

Amyra - "Kaise ho tum Samar."

Samar - "Main thik hoon. Tum kaisi ho ?"

Amyra - "Main bhi thik hoon."

Tabhi Amyra ki nazar, Samar ke haathon mein padti hain. Samar ke ungaliyon ke beech, Cigarette dekh kar woh chaunk jaati hain. Woh kehti hain, "Tumhe Cigarette peene ki aadat kab se lag gayi hain Samar ? Pehle toh tum yeh sab nahi karte the ? College ke dauraan tum kitne maasoom the."

"Mujhe maaf kar do Amyra." Keh kar, Samar apne haathon se Cigarette phenk deta hain aur woh apni nazrein jhuka deta hain.

Amyra - "Thik hain. Maine tumhe maaf kiya. Kya kar rahe ho tum aajkal ?"

Samar - "Main Fibrotix Company mein kaam kar raha hoon."

Amyra - "Badhiyaa hain."

Samar - "Tum kya kar rahi ho Amyra ?"

Amyra - "Main Info Next Company mein kaam kar rahi hoon."

Samar - "Tum bhi isi shehar mein rehti ho ?"

Amyra - "Haan. Accha tum mujhe isi waqt apna contact number do. Itne saal ho gaye, kabhi hamari baat nahi ho paayi. Ab tum mujhse aksar milte rehna."

Samar - "Haan Zaroor."

Dono ek dusre ka Contact Number le lete hain aur Amyra chali jaati hain.

Dono ek dusre se aksar phone par baatein karte aur chuttiyon ke din, kahi bahar milte. Woh dono kabhi-kabhi apne College ke dino ki baatein karte. Dono ab paripakv ban chuke the. 

Samar aaj bhi Amyra se mohabbat karta hain. Lekin, woh yeh nahi jaanta hain ki, Amyra kya chahti hain. Saath hi, Amyra bhi Samar ke iraadon se anjaan hain. 

Ek din ki baat hain. Dono ne saath mein movie dekhne ka plan banaya. 

Samar Cinema Hall ke bahar khada Amyra ka intezaar kar raha tha. Tabhi usne Amyra ko aate hue dekha aur woh hairaan reh gaya. Amyra ne bilkul wohi Gown pehna hua tha, jo ki usne College ke farewell ke dauraan pehni thi. Us peele rang ke Gown mein woh aaj bhi pari jaisi hi lag rahi thi. Amyra ko us vastra mein dekh kar, Samar ki puraani yaadein taaza ho gayi. Amyra ki khoobsurati mein, Samar kho chuka tha.

Amyra Samar ke nazdeek aayi. Samar ne apna haath aage badhaya aur Amyra ne Samar ke haathon mein apna haath thama diya. Phir Samar ke muh se nikla, "Toh dance karne chale ?"

Amyra - "Dance ? Hum toh yahan movie dekhne ke liye aaye hue hain Samar."

Samar hosh mein aaya.

Samar - "Are haan. Main bhool gaya tha."

Amyra - "Tumhe kabhi-kabhi kya ho jaata hain Samar ?"

Samar - "Kuch nahi. Chalo movie dekhte hain."

Dono saath mein movie dekhne ke liye jaate hain. Movie dekhne ke baad, dono bahar aate hain aur dher saari baatein karte hain.

Baatein karte-karte, Amyra Samar se puchti hain, "Toh tumhara Shaadi ka kya plan hain ?"

Samar - "Dekhte hain. Tum batao ?"

Amyra - "Dekhte hain. Accha toh ab main jaati hoon. Kaafi der ho rahi hain."

Samar apna sar hilata hain. Amyra jaa rahi hoti hain. Amyra College ki aakhri mulakaat wale Gown mein thi aur woh jaa rahi thi. Samar ko aisa ehsaas hota hain, ki shayad ab woh use dobara kabhi nahi milegi. Shayad usne Amyra ko dobara kho diya hain. Yeh khayal uske zehan mein aate hi, Samar ki aankhein bhar aati hain. 

Amyra peeche mud kar dekhti hain aur Samar ki aankhon mein aansun dekh kar, woh dang reh jaati hain. Woh kuch samajh nahi paati hain. Lekin, use yeh thoda ajeeb lagta hain. 

Agle din, Amyra Samar ko Call karke use apne ghar bulati hain.

Samar waha jaata hain aur woh dono saath mein baithe yahan-wahan ki baatein karte hain. 

Tabhi Amyra sofa se uth khadi hoti hain, ki achaanak se uska santulan bigadta hain aur woh girne wali hi hoti hain ki Samar, Amyra ko thaam leta hain. Dono ki nazrein milti hain aur Samar, Amyra ki madhosh aankhon mein kho jaata hain.

Amyra ne Samar ki aankhon mein apne liye, pyaar dekha. Woh Samar ko apne gale se laga leti hain aur Samar use kaske apni baahon mein bhar leta hain. Dono ki aankhein band ho jaati hain. Woh dono ek dusre ko apne andar mehsus kar rahe the.  

Samar dheere se Amyra ke kaano mein kehta hain, "Mujhe tumse mohabbat hain."

Amyra bohut dheemi aawaz mein kehti hain, "Abhi kuch mat kaho. Bas is pal ko mehsus karo. Main is pal mein apni saari zindagi beetana chahti hoon Samar."

Ek dusre ki baahon mein lipte hue, dono ek dusre mein kho jaate hain.

                  - Ved Vineet Gautam