Humnava

 Adhyayan Khanna ek Company mein naukri karta hain. Woh ek anjaan shehar mein akela rehta hain. Woh apne flat mein akela rehta hain. Woh har roz subah tayyar hokar apne naukri par jaata aur shaam mein apne ghar laut aata.

Aaj Adhyayan ko apne daftar mein kuch zyada hi kaam tha. Woh jald se jald apne kaam ko niptaakar ghar pohuchna chahta tha. Woh behad dhyaan se apna kaam kar raha tha. Aakhir kaar kaam poora ho gaya. Adhyayan ne ghadi ki aur dekha, shaam ke saat baj rahe the. Woh turant apna bag utha kar ghar ki aur daud pada. 

Society ke bahar pohuchte hi, Adhyayan ne dekha ki uski Society ke bahar dher saare saamaan pade hue hain. Logon se puchne par pata chala ki, koi naya aadmi uski Society mein shift ho raha hain. 

Adhyayan lift ke bahar khada lift ke aane ka intezaar kar raha tha. Tabhi Adhyayan ke bagal mein ek ladki aa khadi hui. Dono saath mein lift ke andar gaye. Kuch der baad, lift ruki. Adhyayan lift se bahar nikla aur uske saath hi woh ladki bhi bahar aayi. Adhyayan ne apne flat ka taala khola aur woh andar chala gaya. 

Woh pehle fresh hua aur phir woh Coffee banakar Hall mein aa baitha. Woh jaise hi baitha, waise hi uske ghar ka bell baja. Woh Sofa se utha aur jaakar darwaaza khola. Darwaaza kholte hi, Adhyayan ne paaya ki lift waali ladki bahar khadi thi. Adhyayan ko dekhte hi, woh ladki boli, "Hi."

Adhyayan ne bhi 'Hi' kaha aur woh chup ho gaya. Phir woh ladki boli, "Mera naam Vedita hain. Vedita Sharma. Kya aapne mujhe pehchana ?"

Adhyayan - "Nahi."

Vedita - "Abhi kuch der pehle hum dono lift mein mile the."

Adhyayan - "Haan yaad aaya."

Vedita - "Woh darasal main aapke saamne wale flat mein rehne ke liye aayi hoon. Main aaj hi shift hui hoon. Agar aap mujhe zara sa Cheeni de dete toh main Chai pee leti."

Adhyayan - "Thik hain."

Adhyayan kitchen ki aur jaane laga. Kuch kadam chalne ke baad, woh wapas darwaaze ki aur aaya aur Vedita se kaha, "Agar aap chaho toh main aapke liye Chai bana deta hoon. Abhi aapka room set nahi hua hoga poora."

Vedita muskurati hain aur kehti hain, "Nahi aapko dikkat hogi."

Adhyayan - "Ji nahi. Mujhe koi dikkat nahi hogi. Agar aapko koi dikkat na ho, toh aap yahan mere saath Chai pee lijiye. Nahi toh phir, main  Cheeni le aata hoon."

Vedita kuch der sochti hain aur phir kehti hain, "Thik hain. Aaj aapke haath ki Chai pee leti hoon."

Vedita ghar ke andar aati hain aur Sofa par baith jaati hain. Adhyayan Chai tayyar karke laata hain aur Vedita ko Cup pakdata hain. Phir woh uske bagal mein baith jaata hain.

Adhyayan - "Toh aap is shehar mein naukri ke liye aayi ho ?"

Vedita - "Ji haan."

Adhyayan - "Toh akele ya Parivaar ke saath rahogi aap yahan ?"

Vedita - "Akele. Aap yahan akele rehte hain ya parivaar ke saath ?"

Adhyayan - "Main bhi akela hi rehta hoon."

Vedita - "Shaadi hui hain aapki ?"

Adhyayan - "Ji nahi. Aur aapki ?"

Vedita - "Abhi tak nahi."

Adhyayan - "Chalo accha hain."

Vedita - "Matlab ?"

Adhyayan - "Yoon hi."

Vedita muskurati hain.

Adhyayan - "Aapke ghar mein koun-koun hain ?"

Vedita - "Papa, Mummy, ek behan aur ek bhai."

Adhyayan - "Aapke Papa kya karte hain ?"

Vedita - "Pehle naukri karte the. Filhal retire hain. Aapke ghar mein koun-koun hain ?"

Adhyayan - "Ek choti behan aur Papa-Mummy."

Vedita - "Woh log kaha rehte hain ?"

Adhyayan - "Ahmedabad. Aur aapka Parivaar kaha rehta hain ?"

Vedita - "Jharkhand."

Adhyayan - "Kabhi koi kaam pade toh aap mujhe zaroor yaad kariyega. Ab toh hum padosi hain."

Vedita muskurati hain aur kehti hain, "Ji Zaroor."

Chai peete-peete woh dono yahan-wahan ki baatein karte hain. Kuch der baad, Vedita waha se chali jaati hain.

Agle din, Adhyayan kaam khatam karke apne ghar laut ta hain. Woh dekhta hain ki Vedita ki balcony ke bahar kuch kapde latke hue hain. Woh lift se apne ghar ke bahar pohuchta hain aur Vedita bahar aati hain. Dono ek dusre ko dekh kar muskurate hain aur dono ek dusre ko 'Hi' kehte hain. 

Phir Adhyayan kehta hain, "Toh kaisa raha aapka din ?"

Vedita - "Accha tha. Ghar poora set bhi kar diya hain maine."

Adhyayan - "Are vaah. Itne jaldi. Jab main kahi shift karunga, toh aapko zaroor bulaunga. Palak jhapakte hi, ghar set ho jaayega."

Vedita - "Ji Zaroor. Aapko din kaisa raha ?"

Adhyayan - "Bohut Badhiya."

Vedita - "Aap kaafi thak bhi gaye honge."

Adhyayan - "Thoda sa."

Vedita - "Accha. Main aapse ek baat kehna chahti hoon."

Adhyayan - "Ji kahiye."

Vedita - "Woh aaj shaam aapka Dinner mere yahan rahega."

Adhyayan - "Bhai vaah. Ek cup Chai peelane ka itna bada inaam ?"

Vedita muskurati hain aur kehti hain, "Kuch aisa hi samajhiye. Waise Aap Dinner kitne baje karte ho ?"

Adhyayan - "Koi bhi time par chalega."

Vedita - "Aaj ki party aapke naam hain. Toh waqt bhi aap tay kariye."

Adhyayan - "9 baje milte hain."

Vedita - "Thik hain."

Dono apne-apne ghar mein chale jaate hain. Kuch der baad, Adhyayan apne ghar se bahar jaata hain aur nazdeek ke dukaan se kuch saamaan kharidta hain. Phir woh apne ghar laut aata hain. Uske baad, woh tayyar hokar thik 9 baje Vedita ke ghar ke darwaaze ke saamne jaata hain. Woh door-bell bajane ke liye haath utha hi raha hota hain ki, tabhi Vedita darwaaza khol deti hain. 

Dono ek dusre ko dekh kar muskurate hain. Vedita Adhyayan ko andar aane ke liye kehti hain. Adhyayan ghar ke andar aata hain. 

Ghar ke andar ka nazaara dekh kar woh thoda chaunk jaata hain. Woh kehta hain, "Aapne itne jaldi poora ghar set kar bhi liya ?"

Vedita - "Ghar ke kaam mein ladkiyon se koi nahi jeet sakta hain."

Dono hans padte hain. Phir Adhyayan kehta hain, "Yeh baat toh aapne bilkul sahi kahi."

Dono Sofa par baith jaate hain. Dono ek dusre se yahan-wahan ki baatein karte hain. Kaafi der tak dher saari baatein karne ke baad, dono saath mein dinner karte hain. Phir Adhyayan apne ghar chala jaata hain.

Ab yeh har roz ka silsila ban chuka tha. Dono har roz saath mein hi Dinner karte the. Kabhi Adhyayan ke ghar, toh kabhi Vedita ke ghar.

Adhyayan aur Vedita ab behad acche dost ban chuke hain. Aap se tum ka faasla itne kam samay mein kab tay ho gaya, dono ko hi; is baat ka andaaza nahi laga.

Ab toh yeh dono raashan bharwaane ke liye, hamesha saath mein hi jaate hain. Aksar chuttiyon ke din yeh dono kahi na kahi ghumne ke liye bhi saath mein nikal padte hain.

Ek din ki baat hain. Adhyayan apne ghar pohuncha. Pohuchte hi, usne dekha ki Vedita ke ghar par taala laga hua hain. Woh hairaan reh gaya. Kyunki, Vedita aksar Adhyayan se pehle pohuch jaati hain. Is samay tak, Vedita ke ghar par taala laga dekh kar woh thoda chaunk gaya. Woh apne ghar gaya aur apna haath-muh dho kar, kapde badal liya. Phir Adhyayan ne Vedita ko Call lagaya. Lekin, usne Call nahi uthaya.

Adhyayan Hall mein baitha T.V. dekh raha tha. Phir uski nazar ghadi par padi. Raat ke 8 baj rahe the. Kareeb do ghante beet chuke the. Vedita abhi tak ghar nahi aayi thi. Adhyayan ab thoda pareshan ho gaya tha. 

Adhyayan ne Vedita ko phir Call lagaya. Is baar Vedita ne uska Call kaat diya. Usne socha ki, shayad Vedita ko aaj daftar mein zyada kaam raha ho.

Kuch der baad, Vedita ghar pohuch gayi. Adhyayan ne socha, 'Abhi woh bhi thaki hui hogi. Toh main kuch der baad hi jaata hoon.' Adhyayan ne aadha ghanta intezaar kiya. 

Phir usne Vedita ke ghar ka Door-Bell bajaya. Vedita ne darwaaza khola aur woh ghar ke andar aaya.

Adhyayan - "Aaj office mein kaam zyada tha kya ?"

Vedita - "Bilkul nahi."

Adhyayan - "Phir ?"

Vedita - "Bas kuch shopping karni thi mujhe."

Adhyayan - "Shopping toh hum dono hamesha saath mein karte hain na ?"

Vedita - "Haan lekin, aaj mujhe akele Shopping karna tha."

Adhyayan kuch nahi kehta hain. 

Vedita - "Are Bhai aise kya muh latka liye ? Zaroori thodi na hain, ki main hamesha tumhare saath hi jaaun Shopping karne ke liye ?"

Vedita ke muh se aise alfaaz sunkar, Adhyayan na sirf hairaan ho jaata hain; balki, woh baat use behad chubh bhi jaati hain. Woh bina kuch kahe waha se chala jaata hain.

Kuch der baad, Vedita Adhyayan ke ghar aati hain aur dono saath mein khaana khaate hain. Is dauraan dono ek dusre se koi bhi baat-cheet nahi karte hain. 

Vedita ki baaton se Adhyayan ab bhi naaraz tha. Lekin, woh chup tha. Khaana hone ke baad, Vedita apne ghar chale jaati hain. 

Raat ho chuki thi. Adhyayan ab bhi so nahi paa raha tha. Uske dimaag mein Vedita ke wahi baatein ghum rahi thi. Us waqt Vedita ke dwara kaha gaya ek-ek shabd, Adhyayan ko kaante ki tarah chubh rahi thi.

Tabhi Adhyayan ke ghar ki ghanti bajti hain. Woh ghadi ki aur dekhta hain, raat ke barah baj rahe the. Woh sochta hain, 'Aakhir itne raat ko aaya koun hoga ?'

Woh darwaaza kholta hain. Saamne Vedita khadi thi.

Vedita - "Happy Birthday Adhyayan."

Adhyayan muskurata hain.

Vedita - "Soye nahi na ?"

Adhyayan - "Nahi."

Vedita - "Accha jaldi chalo mere ghar. Tumhare liye kuch hain."

Vedita Adhyayan ka haath pakad kar, use apne ghar le jaati hain. Ghar ke andar jaate hi, woh dekhta hain ki poora ghar bohut hi khoobsurat tareeke se saja hain aur saamne ek Cake bhi pada hua hain. Vedita ne Adhyayan ke janamdin ki dher saari tayyariyan ki hui thi. 

Dono Adhyayan ka janamdin badi dhoom-dhaam se manaate hain. Dono saath mein baithe baat-cheet kar rahe the. Tabhi achaanak se, Vedita ki aankhein chadhne lagti hain phir woh apna santulan kho deti hain. Woh shayad behosh ho chuki thi. Woh Adhyayan ke goad mein gir jaati hain.

 

Adhyayan Vedita ke aankhon mein paani maarta hain. Kuch der baad, woh hosh mein aati hain. Adhyayan samajh jaata hain ki, Vedita ne ghar pohuchte hi, tayyariyan shuru kar di thi. Jis wajah se woh behad thak chuki thi. 

Adhyayan Vedita ko bade dhyaan se dekhta hain. Woh Vedita ki nashili aankhon mein kho jaata hain. Vedita ko dekh kar, aaj Adhyayan ke Dil ki dhadkanein tezz ho gayi. Use kuch ajeeb mehsus ho raha tha. Vedita ab poore hosh mein aa chuki thi. Yeh dekhte hi, Adhyayan apni nazrein palat leta hain. Taaki Vedita uski bhaavnaayein padh naa paaye. 

Ab woh is asmanjas mein tha ki ab woh aage kare toh kya kare. Woh khada hota hain aur Vedita se bina kuch kahe apne ghar chala jaata hain. Woh raat bhar so nahi paata hain. Vedita ki nashili aankhein ab bhi Adhyayan ki nazron se jaa nahi paa rahi thi. Ab Adhyayan ki bhaavnaayein Vedita ke liye badal rahi thi. 

Agli shaam dono dobara milte hain. Lekin, Adhyayan Vedita se khul kar baat-cheet nahi kar paata hain. Vedita ko Adhyayan ka yeh bartaav zara ajeeb lagta hain. Vedita Adhyayan se uske badle hue swabhaav ki wajah puchti hain toh woh bas kaam ke tension ka bahaaana bana deta.

Woh har roz Vedita se milta hain. Usse baat-cheet bhi karta hain. Lekin, raat mein uske janamdin waale, Vedita ka khoobsurat chehra Adhyayan ke zehan se jaa nahi paa raha tha.

Vedita ki muskaan, ab dheere-dheere, Adhyayan ke dilon-dimaag par haavi hoti jaa rahi thi. 

Tabhi ek din achaanak se Adhyayan ko pata chalta hain ki, use kisi kaam se Company bahar-gaon bhej rahi hain. Woh Vedita se is baare mein batata hain, toh woh dukh bhare kanth se puchti hain, "Tum wapas kab aaoge ?"

Adhyayan - "Ek hafta lagega."

Vedita - "Tum wapas aaoge na ?"

Adhyayan 'Haan' mein apna sar hilata hain. Dono ko ek dusre se bichandne ka dukh ho raha tha. Jabki dono ko hi maaloom tha ki, kuch dino baad, dobara mulaakaat zaroor hogi.

Adhyayan bahar gaaon chala toh jaata hain, par wahan uska kaam mein mann nahi lagta hain. Wahi dusri aur Vedita ka bhi yahi haal hota hain. 

Yeh ek hafta, in dono ko ek saal ke barabar lag raha tha. Har Pal, Har Lamha dono ko ek dusre ki kami khal rahi thi. 

Aakhir kaar, Adhyayan wapas apne ghar pohuch hi jaata hain. Woh dekhta hain ki, Vedita seedhiyon par udaas baithi hui thi. 

Dono ki nazarein milti hain. Dono ki aankhein bhar aati hain. Woh dono ek dusre ko gale lagane se khud ko roak nahi paate hain. In saat dino mein, dono ko ek dusre ki mohabbat ka ehsaas ho chuka tha. 

Woh dono saath mein Adhyayan ke ghar jaate hain. Vedita Adhyayan ke liye Chai banati hain. Phir Adhyayan apna bag kholta hain. Yeh dekh kar; Vedita kehti hain, "Are Baba. Rehne do. Pehle tum thoda aaram kar lo."

Adhyayan - "Saamaan bohut phel jaayega baad mein."

Vedita - "Tum baitho. Main rakh deti hoon."

Adhyayan - "Tum ?"

Vedita - "Ab kya mera tum par itna bhi haq nahi hain ?"

Adhyayan - "Zaroor Hain."

Vedita Adhyayan ka saamaan nikaalkar apne-apne jagah par rakh rahi thi. Tabhi uski nazar, ek necklace par padti hain. Vedita us necklace ko uthati hain aur us necklace par bane Dil ko woh kholti hain. Us Dil ke andar, ek taraf Adhyayan ki tasveer hoti hain aur dusri taraf Vedita ki.

Vedita ki aankhein bhar aati hain. Vedita ko mehsus hota hain ki, uske peeche koi hain. Woh peeche mudkar dekhti hain. Peeche Adhyayan khada tha. Vedita bhi uth khadi hoti hain. Adhyayan uske kareeb jaata hain. Woh Vedita ke haath se woh Necklace leta hain aur use pehna deta hain. Dono ek dusre se lipat jaate hain.

              - Ved Vineet Gautam