Bhram

 Aman Acharya ek company mein naukri karte the. Woh apni naukri se retire ho chuke hain aur filhal pension par chal rahe hain. Unki patni ka naam, Bhakti Acharya hain.

Aman aur Bhakti ke do bacche hain. Ek ladka aur ek ladki.

Ladke ka naam, Pritam Acharya hain aur ladki ka naam, Prajakta Acharya hain. 

Pritam aur Prajakta dono ki hi padhaayi poori ho chuki hain.

Dono bhai-behen naukri karte hain, alag-alag company mein.

Pritam umar mein, Prajakta se do saal bada hain. 

Ek din ki baat hain. Shaam ka waqt tha, poora parivaar saath mein baitha hua tha.

Sabhi log aapas mein baat-cheet kar rahe the. Tabhi Aman kehte hain, "Bhai hamare bacche ab bade ho gaye hain. Ghar chalane ke kaabil ho gaye hain."

Bhakti - "Kaabil kaha ? Ghar toh chala hi rahe hain, yeh dono Bhai-Behen."

Aman - "Haan. Bilkul sahi kaha tumne."

Pritam - "Papa-Mummy aap dono yeh kaisi baat kar rahe ho ? Aap dono ke tyag aur parishram ka hi yeh nateeja hain, ki aaj hum dono Bhai-Behen kisi kaabil ban paaye hain."

Prajakta - "Haan bilkul. Bhaiyaa sahi baat keh rahe hain."

Bhakti - "Tum toh hamesha apne Bhai ke har baat par haan mein haan milaogi."

Prajakta - "Kyun na milaun ? Choti behan jo hoon."

Sab log hasne lagte hain.

Aman - "Ab bas hamare dono bacchon ki shaadiyan ho jaaye. Dono ko acche jeevansaathi mil jaaye, bas meri saari icchayein poori ho jaayegi. Waise ek baat kehni thi mujhe aap sab logon se."

Sabhi log Aman ki taraf dekh rahe the. Aman aage kehta hain, "Pritam ke liye ek rishta aaya hain."

Bhakti - "Bhai vaah. Yeh toh bohut hi acchi baat sunayi hain aapne. Waise koun laaya hain rishta ?"

Aman - "Ramesh ne laaya hain rishta. Ladki Ramesh ke ek dost ki beti hain."

Prajakta - "Jab Ramesh Uncle ne ladki ka sujhaav diya hain, toh ladki acchi hi hogi."

Phir Aman Pritam ki aur dekhta hain aur kehta hain, "Tum kya kehte ho Pritam ?"

Pritam - "Main samajh nahi paa raha hoon, ki main kya kahoon."

Bhakti - "Matlab beta tumhe agar koi ladki pasand ho toh, tum khul kar keh sakte ho."

Pritam - "Haan mujhe ek ladki pasand hain."

Aman - "Koun hain woh ladki ?"

Pritam - "Meri ek dost hain. Office mein mere saath kaam karti hain."

Bhakti - "Maine toh tumse bas aise hi sawaal kar liya aur tum toh. Ab main kya kahoon ? Kya tumhare Ramesh Uncle se behtar tumhare liye koi aur ladki dekh sakta hain bhala ?"

Pritam chup tha.

Bhakti - "Ab jawaab do. Chup kyun ho tum ?"

Aman Pritam se kehta hain, "Tumhare Ramesh Uncle bachpan se tumhe jaante hain. Tum itne chote se the, jab tum unki goad mein khela karte the. Bees saal purani is dosti ka kya sila de rahe hain hum unhe ?"

Pritam - "Papa main aapki bhavnayein samjah sakta hoon. Aur mere Dil mein aaj bhi Ramesh Uncle ke liye utna hi maan-sammaan hain, jitna ki pehle tha. Lekin, agar aap mere jazbaat samajhne ki koshish kare toh... Main ab aage kya kahun, mujhe khud samajh mein nahi aa raha hain."

Bhakti - "Tumhare is harkat ke wajah se, hamara Ramesh ke saath rishton mein bohut hi gehri daraar pad sakti hain."

Aman - "Nahi Bhakti use tum kuch mat kaho. Zindagi Pritam ki hain, toh faisla lene ka haq bhi usi ka hi hain. Waise bhi Shaadi zindagi ka ek bohut hi bada faisla hota hain, is faisle ko insaan ko khud lena chahiye."

Bhakti - "Aur Ramesh ? Usse kya kahenge aap ?"

Aman - "Use main samjha dunga." 

 

Aman Pritam ki aur dekhta hain, Pritam apni nazrein jhuka leta hain. Phir Aman Pritam se kehta hain, "Tum jab chaho tab hume us ladki ke parivaar se milwa dena. Aage jaisa woh log chahenge, waisa hi hoga."

Pritam - "Aapka bohut shukriya Papa."

Aman - "Ismein shukriya kaisa beta."

Pritam ne jis ladki ko pasand kiya tha, us ladki ka naam Anita hain. Anita ke pita peshe se ek vyapaari hain. Dono parivaar ki mulaakaat hoti hain aur un dono parivaar ke beech, rishta tay ho jaata hain.

Kuch dino baad, Pritam aur Anita ki shaadi ho jaati hain. 

Ghar mein nayi-naveli Bahu aayi hain. Shehar ke sabhi jaan-pehchan wale ghar mein apne parivaar sang Bahu dekhne ke liye aaye. 

Sabhi parivaarik mitron ne Anita ko dher saare tohfe aur dil khol kar aashirwaad bhi diya.

Tabhi ghar mein aayi ek aurat ne Bhakti se puch liya, "Bhabhi Ramesh Bhaiyaa aur unke biwi bacche dikhayi nahi de rahe hain ?"

Kuch pal ke Bhakti chup rehti hain. Asli wajah Bhakti ke muh se nikalne hi waali hoti hain, ki uski nazar Anita par padti hain. Woh ek pal ke liye chup rehti hain aur phir baat ko sambhalte hue kehti hain, "Woh humne un logon ko bulaya tha, par abhi tak dikhayi nahi diye yahan par. Shayad woh log kisi kaam mein vyast honge. Waise bhi aajkal logon ke paas waqt bohut kam reh gaya hain."

Agle din. Bhakti rasode mein kaam kar rahi thi. Tabhi Anita waha par aati hain aur Bhakti se kehti hain, "Mummy. Aap kya bana rahi ho ?"

Bhakti - "Kuch nahi beta. Bas pakode tal rahi hoon."

Anita - "Pakode main tal deti hoon Mummy."

Bhakti - "Pakode toh ban chuke hain. Bas tum bahar sabko dete aao."

Anita Hall mein jaati hain aur sabhi logon ko naashta dekar aati hain.

Aman aur Pritam Hall mein baithe baat-cheet kar rahe the. 

Tabhi Pritam kehta hain, "Toh Ramesh Uncle se koi baat-cheet hui ya nahi ?"

Aman chup tha. Pritam Aman ke haathon par apna haath rakhta hain aur kehta hain, "Papa."

Aman Pritam ki aur keval dekhta hain. Uske baad, Pritam Aman se kehta hain, "Papa. Aapki koi baat hui Ramesh Uncle se ?"

Aman 'Na' mein apna Sar hilata hain.

Aman - "Agar tum Ramesh ki pasand ko manaa nahi karte, toh aaj yeh din hume dekhne ko na milta."

Pritam - "Haan Papa lekin aap bhi jaante ho ki mujhe Anita pasand aa gayi thi. Agar main Ramesh Uncle ke pasand ki ladki se Shaadi kar bhi leta, toh bhi hamara Ramesh Uncle ke saath rishta aage chalkar bigadta hi. Kyunki, main us ladki ko woh pyaar, woh waqt nahi de paata, jaisa ki main Anita ko deta hoon. Ho sakta hain, kuch samay baad; hum dono ke beech rishta khatam hi ho jaata. Us haalat mein bhi Ramesh Uncle ke saath hamara rishta bigad hi jaata. Bas yeh fark hain, ki hamare beech is rishte ko tootne mein thoda waqt lagta."

Tabhi Aman ki nazar Rasode ki aur padti hain. Woh zara ghabra jaata hain. Haathon mein tray pakde hue, Anita wahi par khadi thi aur woh un dono ki baatein sunn rahi thi. 

Aman yeh baat samajh jaata hain. 

Anita yeh baat samajh chuki  thi ki, uski aur Pritam ki shaadi se ghar ke log khush nahi hain. Woh log bas khush rehne ka dhong kar rahe hain.

Yeh baat Anita ke Dil ko bohut theas pohuchayi thi. Anita ab apne aap ko us ghar mein akela samjhne lagi thi. Anita apne aap ko sabse kataa hua mehsus kar rahi thi. Thik waise hi, jaise kisi ped se ek shaakha toot kar alag ho jaati hain.

Anita ab pehle jaise sabse khul kar baat-cheet nahi kar paa rahi thi. Ghar wale bhi samajh nahi paa rahe the ki, woh log aakhir Anita se kahe toh kya kahe. Wahi dusri aur Pritam ek alag hi kashmakash se guzar raha tha. 

Pritam na yeh samajh paa raha tha ki, woh Anita ko haalat kaise samjhaaye aur naa hi woh yeh samajh paa raha tha ki, woh Ramesh aur uske Parivaar ko kaise manaaye.

Ghar mein ek ajeeb si khaamoshi panap rahi thi. Sabhi sadasya dukh ke saaye mein ghire jaa rahe the. Jahan ek aur Anita apne aap ko ghar mein sabse kataa hua mehsus kar rahi thi, wahi dusri aur baaki sabhi log kahi na kahi apne aap ko Anita ka gunehgaar maan rahe the. Jis wajah se veh log, sharmindagi mehsus kar rahe the. Yahan tak ki, ghar ke baaki sadasya aapas mein bhi zyada baat-cheet nahi kar paa rahe the. 

Kaafi din beet gaye. Lekin, us ghar ke haalat saamanya nahi hue. 

Ek din ki baat hain. Diwali ka tyohaar tha. Ghar ke sabhi log Diwali ki tayyariyon mein jut gaye the. Ghar ko behad shaandar tareeke se sajaaya gaya tha. Ghar ki is khoobsurati ka shrey sabhi logon ko jaata hain. Ghar ke har ek sadasy ne bohut mann se ghar ki sajaawat ki thi.

Bhakti Anita se kehti hain, "Aaj is ghar mein tumhari pehli Diwali hain. Toh tum aaj shaam yeh waali Saree pehanna."

Anita - "Thik hain Mummy."

Anita us Saree ko khidki ke paas waale table par rakh deti hain.

Prajakta Bhakti se puchti hain, "Mummy kya aapko lagta hain ki Bhabhi yeh saree pehnengi ?"

Bhakti - "Yeh toh uski marzi hain. Uska mann agar kare toh woh saree pehne. Na mann kare toh aaj tyohaar ka din hain. Waise bhi sabko apni marzi ka kapda khud pehan na chahiye."

Tabhi peeche se Anita kehti hain, "Kya aapko mujhpar itna bhi yakeen nahi hain Mummy. Kya main aapke pasand ki Saree nahi pehnungi ?"

Bhakti aur Prajakta Anita ki aur dekhte hain. Anita ki aankhein bhar aayi thi. Woh dono hairaan bhi the aur sharminda bhi. Isse pehle ki woh dono Anita se kuch kehne ki koshish karte, nam aankhon se Anita wahan se chali jaati hain. Bhakti aur Prajakta ek dusre ki aur dekh rahe the, lekin chup the. Woh dono samajh nahi paa rahe the, ki aakhir woh dono aapas mein aage kya baat kare aur khaas kar ke woh dono Anita ko kaise samjhaaye. 

Kuch der baad ki baat hain. Anita khidki ke paas kuch saamaan dekh rahi thi. Tabhi woh dekhti hain ki, ek rocket kidki ke paas aaya aur table par padi hui Saree aag pakad leti hain. Anita waqt rehte us Saree mein lagi hui aag ko bhuja deti hain. Saree kaafi jal chuki thi.

Tabhi woh dekhti hain ki kamre ke kone mein rakha hua diya Tezz hawa ke wajah se bhabhak raha hain. Saree ab bhi Anita ke haath mein thi. Woh nahi chahti thi ki woh diya bujh jaaye. Kyunki, Diwali ke samay diya bujhna ashubh ho sakta hain. Isliye, Anita ne socha ki woh us diye ko kisi dusre jagah par rakh degi. 

Anita woh diya utha ti hain aur use rakhne ke liye woh jagah talaash kar rahi thi. Tabhi kamre mein Bhakti aur Prajakta aate hain. Anita ke ek haath mein, jalta hua diya tha aur dusre haath mein, aadhi jali hui Saree thi. Bhakti aur Prajakta yeh bhool kar baithe ki Anita ne jaan-boojh kar Saree mein aag laga kar use kaafi jalaa diya aur phir aag bujha di. 

Bhakti ne Anita ko woh Saree bohut Dil se di thi. Bhakti ki bohut iccha thi, Anita ko us Saree mein dekhne ki. Woh dono Anita se bina kuch kahe wahan se chale gaye aur woh dono is galatfehmi mein the ki Anita ne apni naarazgi Saree par nikaal di.

Is vaakye ke baare mein Anita ki Bhakti aur Prajakta se kabhi koi baat-cheet nahi hui. Lekin, is vaakye ne un dono ko bohut dukh pohuchaya. Bhakti aur Prajakta ki Anita se zyada baat-cheet nahi hoti hain. 

Ek hisaab se kaha jaaye toh, un auraton ke beech; rishta hi khatam ho chuka hain. Duniya ki nazar mein bas dikhta hain yeh rishta lekin, un logon ke sambandh waise nahi hain, jaise hone chahiye.

Un dono vaakye ne, un teeno ke Dil ko bohut theas pohuchaya tha. 

 

Anita ka Bhakti aur Prajakta se rishta andar se khokala ban chuka hain. Thik waise hi jaise ek dhaaga tootne ke baad, woh baandh toh diya jaata hain; lekin woh sirf ek gaanth hi rehti hain. Us dhaage mein woh pehli waali mazbooti nahi rehti hain. 

Ghar ki Saans-Bahu aur Bhabhi-Nanad bhale hi ek chath ke neeche rehte ho, lekin; ghar ki auratein ek dusre se khudko itna durr mehsus karte hain jaise ki, maano woh log ek dusre ke liye ajnabee ho.

                      - Ved Vineet Gautam