Talaash

 Arjan Gupta ek jawaan ladka hain. Woh ek Company mein naukri karta hain. Woh apne maata-pita ka iklauta ladka hain. Company dwara mil rahi pagaar se woh khush nahi hain. Woh apni zindagi se aur zyada kamayi ki ummeed karta hain. Lekin, na hi uski kamayi aur na hi uski zindagi uske ummeedon ke hisaab se chal rahi hain. 

Woh apne jeevan mein aage badhna chahta hain. Lekin, woh yeh nahi jaanta hain ki woh apni zindagi mein karna kya chahta hain. 

Arjan ko apne jeevan mein koi lakshya nazar hi nahi aata hain. 

Apni isi manosthiti ke wajah se woh behad maayus ho chuka hain jeevan mein.

Arjan ab dukhi rehne lag chuka hain. Arjan ke mann mein, har shan; khayaalon ka ufaan chalte rehta hain. Har baar, reh-reh kar yeh khayal use pareshan karte rehta hain; ki woh apne jeevan ke saath bohut bada khelwaad kar raha hain. 

Woh har roz subah tayyar hokar apne naukri par jaata. Waqt se waha par pohuch jaata. Apna kaam poora karta aur kaam khatam karke, woh apne ghar waqt se laut aata. 

Arjan ke mann mein udaasinta kuch is kadar chaa chuki hain, ki woh na toh apne daftar mein kisi se baat-cheet karta hain aur na hi apne ghar walon se. 

Ek din ki baat hain. Arjan apna kaam khatam karke apne daftar se bahar nikla. Daftar se bahar nikalte hi, Arjan ne dekha ki uske pita uske daftar ke buliding ke bahar khade hain. Unhe dekh kar woh halka sa muskuraya aur unke nazdeek gaya. Arjan ke pita ne uske kandhe par apna haath rakha aur poocha, "Toh kaisa raha aaj din ?"

Arjan - "Accha tha Papa."

Arjan Ke Pita - "Aakhir mein kaam se chutti mil hi gayi tumhe."

Arjan - "Haan Papa. Lekin, aap yahan kya kar rahe ho ?"

Arjan Ke Pita - "Main bas aise hi yahan se jaa raha tha, toh yaad aaya ki tumhara office toh yahi par hain aur isi waqt ke aas-pass tumhe naukri se chutti bhi mil jaati hain. Toh maine socha ki aaj hum dono baap-bete saath mein ghar chalte hain."

Arjan halka muskurata hain. Phir Arjan Ke Pita kehte hain, "Toh hum chale ?"

Arjan 'Haan' mein apna sar hilata hain.

Arjan apne Pita ke saath chalne lagta hain. Kuch dur tak chalne ke baad, woh dono ek Rickshaw pakad lete hain aur woh dono ek Resturant mein jaate hain.

Dono baap-bete ek table par baithte hain. Phir Arjan ke pita usse puchte hain, "Kya khaana pasand karoge beta ?"

Arjan - "Kuch bhi Papa."

Arjan Ke Pita - "Tumhe Masala Dosa bohut pasand hain na ?"

Arjan - "Haan."

Arjan Ke Pita - "Thik hain. Toh main wohi order karta hoon."

Arjan - "Thik hain Papa."

Arjan Ke Pita waiter ko bulate hain aur Arjan ka pasandida Masala Dosa order karte hain. Apne liye bhi woh Masala Dosa hi order karte hain.

Phir woh Arjan se yahan-wahan ki baatein karna shuru kar dete hain. Baatein karte-karte, woh Arjan se puch lete hain, "Tumhe kya hua hain beta ?"

Arjan - "Kya hua hain mujhe Papa ?"

Arjan Ke Pita - "Aaj-Kal tum bohut udaas aur dukhi rehte ho."

Arjan - "Haan, thoda sa kaam ka stress hain."

Arjan Ke Pita - "Mujhe toh wajah kuch aur hi lag rahi hain."

Arjan - "Papa aisa kuch nahi hain."

Woh jhuthi muskaan apne chehre par laata hain.

Arjan Ke Pita - "Yeh nakli muskurahat ke peeche chupa hua dard aur takleef ki wajah main jaan na chahta hoon."

Arjan - "Papa aap toh jaante ho ki main bachpan se hi bohut akela raha hoon. Kabhi zyada dost nahi rahe hain mere. Shayad aapko meri baat ajeeb lage. Main apne jeevan mein aage badhna chahta toh zaroor hoon. Par mujhe yeh nahi pata hain, ki main aage badhne ke liye kaam kya karun ?"

Arjan Ke Pita use dhyaan se sunn rahe the. Woh aage kehta hain, "Main bohut zyada kamaana chahta hoon. Main chahta hoon ki, meri kamayi aisi ho ki main kam se kam khud ka ek ghar kharid sakun. Lekin, main aisa kounsa kaam karun ? Main yahi baat samajh nahi paa raha hoon. Mera jeevan mein shayad koi lakshya hi nahi hain. Aur agar hain toh bas ek badaa aur kaamyab aadmi bannaa. Ek andheri sadak par bas daude jaa raha hoon main. Kahi koi roshni nazar hi nahi aati hain mujhe."

Arjan Ke Pita - "Apni pasand-napasand par gaur karo."

Arjan - "Sab kuch koshish karke dekh chuka hoon Papa."

Arjan Ke Pita - "Phir bhi dhyaan do. Apne mann ko ekaagra karo aur apni us ekaagrata ko banaye rakho. Lekin, kam se kam tumhe yeh baat toh pata honi hi chahiye, ki tumhe kis kaam mein dilchaspi hain."

Arjan - "Kaise pata chalega Papa ? Bachpan mein aapne aur Mummy ne kaha ki School har roz jaao nahi toh kahi naukri nahi milegi. School ne sikhaya ki acche number laao, nahi toh kahi naukri nahi milegi. Phir samaaj ne yeh kaha ki acche College se padhayi karo, nahi toh kahi naukri nahi milegi aur College ne kaha ki, acche percentage se pass ho jaao, nahi toh kahi naukri nahi milegi. Naukri toh mujhe mil gayi. Lekin, is naukri se mujhe aakhir mil kya raha hain ?"

Arjan Ke Pita kuch pal ke liye, use behad dhyaan se dekhte hain. Unhe yeh khayal aata hain, ki kahi Arjan depression ka shikaar na ban jaaye. Phir woh ek lambi saans lete hain aur kehte hain, "Main samajh sakta hoon. Tum is waqt jis manosthiti se guzar rahe ho, main use bohut acche se samajh sakta hoon. Filhal main yeh kehna chahunga ki tum yeh naukri chod do."

Arjan - "Papa main yeh nahi keh raha hoon ki, main naukri nahi karna chahta hoon."

Arjan Ke Pita - "Maine aisa toh nahi kaha. Main tumse bas yeh keh raha hoon, ki filhal tum yeh naukri chod do aur kuch din aaram karo. Ek baar, tum apne is khamakash se bahar aa jaao, phir hum log kuch vartalap karenge aur jo bhi nishkarsh nikal kar aayega; us hisaab se hum aage ki yojna banayenge."

Arjan kuch nahi kehta hain.

Arjan Ke Pita - "Main tumse guzaarish karta hoon, ki tum meri yeh baat maan jaao. Kyunki, filhal jis raaste par tum nikal pade ho; us raaste par agar tum zyada durr tak chale gaye, toh tum Zindagi mein kabhi dobara wapas nahi aa paaoge. Tumhe aajeevan pachtaawe mein rehna padega aur hum sab bhi zindagi bhar rote reh jaayenge. Meri yeh baat maan lo, warna saari zindagi, bas sar pakad kar rote reh jaaoge."

Arjan - "Lekin agar main naukri chod dunga, toh main karunga kya ?"

Arjan Ke Pita - "Main tumhe sahi margdarshan dunga. Bas mujh par yakeen kar lo aur kal hi is naukri ko alvida keh do."

Arjan kuch pal ke liye sochta hain aur phir kehta hain, "Thik hain Papa."

Dono baap-bete naashta karke Resturant se bahar nikalte hain. Phir woh dono ek Rickshaw karke ghar laut aate hain. Arjan kuch samay apne maata-pita ke saath beetata hain aur phir sone ke liye apne kamre mein chala jaata hain. Bohut koshisho ke bawjood, Arjan ko neend nahi lagti hain. Woh apne bistar par leta hua tha. Uski aankhein khuli hui thi aur woh behad maayus tha. Woh apne bhavishya ko lekar chintit tha. Lekin, woh is baat se zyada chintit tha ki, woh kuch samajh nahi paa raha hain, ki use apni zindagi se aakhir chahiye toh kya chahiye ? 

Arjan behad sharmindagi mehsus kar raha tha. Woh shayad apne aap se niraash ho chuka tha. 

Arjan ke mann mein bohut saare khayalat aa rahe the. Woh apne khayalon ke saagar mein doobta hi jaa raha tha. 

Arjan ne mann hi mann mein apne jeevan ko khangaalna shuru kiya. Usne socha, 'Chalo bachpan se shuruaat karte hain.'  

Arjan ne apni yaadon ki tijori kholi aur apni beeti hui zindagi ke safar par nikal pada.

Arjan ne shuruaat ki wahan se, jahan se is tanaav bhare khayal ki shuruaat hui thi. Woh apne College ke dino ko yaad karna shuru kiya, jab woh apne sab doston ke saath yeh charcha karta ki aakhir use aur uske doston ko aage chalkar kounsi Company mein naukri karni hain. 

Tabhi Arjan ke mann mein ek khayal aata hain, 'Us waqt maine yeh tak nahi socha, ki mujhe pagaar kitni milegi. Na hi maine yeh socha ki, kya us pagaar se main apni saari zindagi khushaali se beeta paaunga ?'

Arjan ki soch aur gehri hoti chali jaati hain. Woh sochta hain, 'Us waqt maine yeh toh soch liya ki main kis Company mein naukri karunga. Company ki chamak-dhamak ne mujhe andha kar diya tha. Us chamak-dhamak mein, main itna kho chuka tha; ki main yeh tak nahi soch paaya ki kya main aage chalkar kuch haasil kar bhi paaunga ya nahi.  Kuch Companies mein kaam karne ka bas ek fitoor sawaar ho gaya tha mere mann mein. Us suroor mein main itna kho chuka tha, ki main yeh baat tak bhool chuka tha; ki manushya ko jeevan mein aage ki yojna pehle se hi banani chahiye.'

Phir woh aage sochta hain, 'Khair ab tak jo ho gaya, so ho gaya. Yeh baat toh tay hain, ki keval naukri ke bharose mera bhavishya surakshit nahi reh paayega. Toh mujhe apna khud ka koi na koi kaam shuru karna hi hoga. Lekin, main aisa kya kaam karun ki main jeevan mein aage badh sakun ?' 

Yeh baat woh is waqt samajh nahi paa raha tha. Arjan is samay aisi manosthiti mein nahi tha, ki woh kisi nishkarsh par pohuch paaye. Yahi sab sochte-sochte Arjan ko kab neend lag gayi, use pata hi nahi chala. 

Agle din woh jab utha, toh usne apne pita ko apne saamne paaya. 

Arjan Ke Pita - "Tum apne kamre ki kundi lagana bhool gaye the. Khair main yeh baat kehne ke liye aaya hoon, ki jaisa kal hamare beech tay hua tha, tum aaj hi apni naukri se istifa doge. Toh maine tumhara Resignation Letter tayyar kar diya hain aur bas tum ise apni Company ko email kar do."

Arjan thik waisa hi karta hain.

Agle din se woh naukri par jaane lagta hain aur notice period poora hone ke baad, woh apni naukri chod deta hain.

Arjan apne ghar walon ke saath accha samay beetata hain. Woh kisi bhi dusri Company mein naukri ke liye aavedan bhi nahi deta hain. Yeh silsila, kareeb chaar mahine tak chala. In chaar mahino mein, Arjan apne khayalon mein khud ki khoj mein nikal pada. 

Aakhir kaar, Arjan ne tay kiya, ki woh apni ek Job Consultancy Firm kholega. Usne yeh baat apne maata-pita ko batayi aur woh log behad khush hue. Lekin, woh yeh jaanta tha ki, is kaam ke liye kaafi samay lagega aur ek acchi rakam ki aavashyakta bhi hogi. Woh ek dusri Company mein naukri karna shuru kiya aur saath hi saath bhavishya ki tayyari mein bhi jut gaya. 

Arjan ne yojna banana shuru kiya aur woh kai jagah se jaankari ikattha karna shuru kiya. Dher saari jaankariyan ikattha hone ke baad, usne apni yojna ko aur nikhaara. 

Arjan ne ek Bank se baat ki aur  Business Loan liya. Usne ek jagah dekh kar, apni Job Consultancy Firm ki sthapna ki. Kaafi sangharsh ke baad, Arjan ke haath mein kuch Companies ke kaam aaye. Woh apne doston aur rishtedaron ko apne is naye vyavasaay ki jaankari de chuka tha aur woh unse yeh ummeed bhi kar raha tha ki, woh log naukri ki baat karne ke liye uske paas hi aaye. Kuch log ummeed par khare bhi utre. 

Dheere-Dheere Arjan ke paas kaam badhne laga aur uski kamayi bhi badhne lagi. 

Thode samay baad, Arjan ke paas maano kaam ki baadh si aa gayi thi. Kaam badhne ke saath-saath, uski kamayi bhi badhne lagi. Arjan ki zindagi ab tezz raftaar se daudne lag chuki thi. 

Ek shaam Arjan apne kamre mein baitha hua tha aur woh behad khush tha. Arjan ke mann mein khayal aaya ki, 'Mera jeevan aakhir kitna badal chuka hain. Main ab aage badh raha hoon. Aise hi mujhe aage bohut tarakki karni hain. Woh bhi kya daur tha, jab main hataash ho chuka tha aur ab yeh daur aa gaya hain ki; main ab ummeed se badh kar kama raha hoon. Jeevan ke rang kitni tezi se badalte rehte hain.'

Phir woh sochta hain, 'Ab aur gambhirta se kaam karna hain. Apna vyapaar aur badhana hain. Iske liye bhi koi na koi acchi yojna banani hogi. Bohut lamba safar tay karna hain mujhe.'

Arjan ko is baat ka ehsaas ho gaya hain ki; agar aadmi bina ummeed koye, mehnat aur lagan se kaam karta rahe, toh woh jeevan mein bade se bada mukaam bhi haasil kar sakta hain.

                    - Ved Vineet Gautam