Chunauti

 Jai Singh naam ka ek ladka hain. Woh apne maata-pita ka iklauta ladka hain. Woh ek Company mein naukri karta hain. Mahine ka 35,000 /- Rupaye uski pagaar hain. Jai ke pita ka naam, Sujeet Singh hain aur maata ka naam, Urmila Singh hain. 

Jai abhi tak kunwara hain. Woh har roz subah tayyar hokar apne naukri par jaata hain aur shaam mein kaam khatam ho jaane ke baad, waqt se apne ghar laut aata hain. 

Ek zamaane mein Sujeet ka vyapaar chala karta tha. Sujeet ki kiraane ki dukaan thi. Us Parivaar ki kamaayi acchi-khaasi thi. Lekin, vyapaar mein ghata hone ke wajah se, Sujeet Bank ka loan chukaane mein asafal rahe aur unki dukaan mein taala lag gaya. 

Is jhatke ne, un logon ki zindagi par asar toh daala hi. Woh log is naye badlaav ke saath jeena seekh gaye hain. Lekin, kahi na kahi yeh baat un sabhi ko hamesha khalti rehti hain ki unhone palak jhapakte hi apna sab kuch gawaa diya. Ghar mein aksar, ek ajeeb si udaasi chaayi rehti hain.

Haalanki, Sujeet ne kayi jagah naukri ke liye baat bhi ki. Lekin, umar zyada hone ki wajah se use koi naukri nahi de raha hain. Jis wajah se, ghar ki saari zimmedari keval Jai ke kandhon par hain.

Jai apni naukri behad imaandaari se karta hain. Woh bohut mehnat se kaam karta hain. 

Ek din ki baat hain. Har roz ki tarah us din bhi, Jai naukri se apne ghar lauta. Shaam ka waqt tha. Sujeet aur Urmila dono Hall mein baithe hue the. Jai ko dekhte hi, Sujeet ne kaha, "Aao beta baitho." 

Jai Sujeet ke saamne aakar baith jaata hain. Phir Urmila kehti hain, "Main paani le aati hoon beta tumhare liye."

Jai - "Thik hain Mummy."

Urmila andar chale jaati hain. 

Sujeet - "Aur batao beta. Kaisa raha tumhara aaj ka din ?"

Jai - "Accha tha Papa."

Sujeet - "Kaafi thake hue lag rahe ho tum."

Jai - "Haan Papa. Woh office mein aaj kaam thoda zyada tha."

Tabhi Urmila Paani lekar aati hain aur Jai ko pakda deti hain. Jai do ghunt peeta hain. Phir Sujeet kehta hain, "Chai peeoge ?"

Jai - "Nahi Papa."

Phir sabhi parivaar saath baith kar kuch der baat-cheet kiye. Tabhi hi Jai ki nazar khidki ki aur padi. Usne dekha ki andhera ho raha hain aur usne kaha, "Raat hone wali hain."

Sujeet - "Haan beta."

Kuch der baad, Urmila khaana banakar le aayi aur sabhi parivaar saath baith kar khaana khaaye. Uske baad, sabhi apne-apne kamre mein jaakar sone ki tayyari karne lage.  

Jai apne kamre tha. Woh bistar par leta hua tha. Uske kamre ki khidki khuli hui thi. Jo ki hamesha khuli hi rehti hain. Woh apne bistar par leta hua, mobile chala raha tha. Raat ke kareeb 11 baj rahe the. Tabhi achaanak se ghar ki bijlee gul ho gayi. 'Ab yeh kya waqt hua light jaane ka ?' Jai ne socha. Uski nazar khidki ki aur gayi. Khidki ke bahar, Chand bohut saaf dikhaayi de raha tha. Us Chamkile aur Shaant Chand ko dekh kar, Jai ko bohut sukoon mehsus ho raha tha. Jai ne socha, 'Yeh Chand hamesha ek samay par aata hain. Aur, subah hote hi gayab ho jaata hain. Lekin, agle din Suraj dhalte hi yeh dubara laut aata hain. Chand aur Suraj apne-apne waqt par aate-jaate rehte hain. Bina koi shikayat kiye apna kartavya nibhaate rehte hain. Aaj hamari zindagi mein, bhale hi kaali andheri raat ho. Lekin, kal subah zaroor hogi. Hamari zindagi mein ek na ek din, Suraj zaroor ugega.'

Phir woh so jataa hain. Agle din, woh tayaar hokar dobara apne kaam par nikal jaata hain. 

Shaam ka waqt tha aur woh Bus Stop par khada, Bus ka intezaar kar raha tha. Kuch samay beeta, lekin, Bus abhi tak aayi nahi thi. Is baat se, Bus Stop par khade sabhi log, hairaan the. Tabhi ek aadmi Enquiry Counter par jaakar pooch-taach karke aata hain. Woh aadmi batata hain ki, ek jagah par Sadak ka kaam chal raha hain. Jis wajah se Bus ko aane mein thoda samay lagega. 

Jai apne ghar samay se hi lautna chahta tha. Woh paidal hi ghar ke liye nikal padta hain. 

Shaam ka samay tha aur sadak par gaadiyan aa-jaa rahi thi. Jai Footpath par chalte hue jaa raha tha. Jai ne socha, 'Yeh bhi ek accha anubhav hain. Kya har roz ek hi Bus pakadna. Ek hi tarah ki shaklein dekhna. Ek hi raaste se jaana aur aakhir mein ghar pohuch jaana. Kya bas itni si hi hain meri Zindagi ?'

'Kya mera janam bas yeh ek hi drushya ka anubhav karne ke liye hua hain ?'

'Kya is sthiti ke alawaa mera aur koi bhi lakshya nahi ?'

'Kya jeevan mein mera koi bhi lakshya raha hi nahi hain ?'

'Aakhir mera wajood kya hain ?'

'Mera jeevan aakhir kis disha mein jaa raha hain ?'

'Shayad keval andhkaar ki aur badh raha hain mera jeevan.'

'Aakhir main aisa kounsa kaam karun, jo mujhe bohut aage tak le jaaye.'

'Bachpan mein, main sketch banane mein bohut maahir tha. Kyun na main, is kaam mein kuch haath aazmaaun ?'

'Lekin, sab hoga kaise ?'

'Aaj ghar jaakar is baare mein online thoda check karta hoon.'

'Kuch jaankari ikattha kar loon, phir dekhta hoon; aage kya karna hain.'

Tabhi achaanak se barsaat shuru ho jaati hain. Barsaat dheemi ho rahi thi. Lekin, lagaatar ho rahi thi. Jai beech-beech mein peeche mud-mud kar dekh bhi raha tha. Is ummeed se ki koi Bus aa jaaye. Lekin, aaj shayad uska din kharab tha. Jai ko ek bhi Bus nahi mili aur woh barsaat mein bheegte hue apne ghar ki aur badh raha tha. 

Tabhi ek Bike aakar uske paas ruki. Us Bike ko dekh kar, woh bhi ruk gaya. Dono ki nazrein mili. Aur dono ek dusre ko dekh kar muskuraye. Bike par jo ladka tha woh Jai ka College ka dost tha. Us ladke ka naam tha, Akshay. Akshay ko dekhte hi, Jai bola; "Are Akshay. Kaise ho tum ?"

Akshay - "Thik hoon. Tum kaise ho ?"

Jai - "Bas Badhiya hoon."

Akshay - "Is barsaat mein paidal chalte jaa rahe ho ?"

Jai - "Are haan Bhai. Ab kaafi der tak intezaar karne ke bawjood, Bus nahi mili. Toh maine socha ki paidal hi ghar ke liye nikal padta hoon."

Akshay - "Chalo main tumhe aage tak chod deta hoon."

Jai - "Thik hain."

Jai Akshay ki Bike par baith jaata hain. Akshay bike shuru karta hain. Dono ki baat-cheet shuru hoti hain.

Akshay - "Toh batao kya haal-chaal hain tumhare ?"

Jai - "Badhiyaa hain. Tum kaise ho ?"

Akshay - "Bas thik hoon. Tumhare Mummy aur Papa kaise hain ?"

Jai - "Woh log bhi thik hain. Aur tumhare Mummy-Papa ?"

Akshay - "Woh log bhi thik hain. Aur kya ho raha hain, aaj kal ?"

Jai - "Kuch nahi yaar. Filhal toh naukri kar raha hoon."

Akshay - "Kaha par ?"

Jai - "Eon Industries."

Akshay - "Bhai waah."

Jai - "Aur tum kya kar rahe ho ?"

Akshay - "Main Tech Avenue mein kaam kar raha hoon."

Jai - "Chalo badhiya hain."

Akshay - "Phir Shaadi kab kar rahe ho ?"

Jai - "Dekhte hain. Tum kab kar rahe ho ?"

Akshay - "Abhi toh ladki dekh raha hoon. Lekin, abhi tak koi pasand nahi aayi."

Jai - "Aa jaayegi koi na koi."

Akshay - "Hmm."

Baatein karte-karte Jai ka ghar aa jaata hain. Jai Bike se utar ta hain aur kehta hain, "Ghar aa jaao. Papa-Mummy se bhi mil lo."

Akshay - "Phir kabhi. Filhal toh jaldi mein hoon."

Jai - "Ghar tak aa gaye ho. Uske baad, kab milna ho paaye, kya pata ?"

Akshay - "Thoda kaam tha. Us wajah se. Lekin, baad mein kabhi milenge. Sampark mein rehna mere."

Jai - "Thik hain."

Akshay chala jaata hain.

Jai ghar mein aata hain. Tabhi Sujeet poochta hain, "Beta koun tha ?"

Jai - "Woh mera dost tha Papa."

Sujeet - "Use ghar mein bula lete beta."

Jai - "Papa woh thoda jaldi mein tha, toh us wajah se."

Sujeet - "Kya woh raaste mein mila tha ?"

Jai - "Haan Papa."

Sujeet - "Chalo accha hua, jo tumhara dost tumhe mil gaya. Kam Se Kam, tum aaj ghar jaldi toh pohuch gaye."

Jai - "Haan Papa."

Sujeet - "Thode bheegh chuke ho tum. Jaldi se jaakar, pehle kapde badal lo tum."

Jai andar jaata hain aur kapde badalkar wapas aata hain. Sabhi parivaar saath mein baith kar, kuch der baatein karte hain aur phir raat hote hi, ghar ke teeno sadasya; saath mein khaana kha kar, sone chale jaate hain.

Jai apne kamre mein leta hua tha. Woh sochta hain, 'Jo idea dimaag mein aaya tha. Us idea par kaam karna shuru kar deta hoon.'

Woh apna mobile nikaalta hain aur usmein Sketch aur Design sambandhit jaankari dhundna shuru kar deta hain. Woh do-chaar articles bhi padhta hain. Kuch der tak jaankari padhne ke baad, woh so jaata hain. 

Agle din, woh kaam par jaakar shaam mein apne ghar laut aata hain.

Kuch dino baad, woh Freelance kaam ke liye apply karna shuru kar deta hain. 

Kuch mahine beet jaane ke baad, Jai ko ek company se project milta hain. Woh us kaam ko samay se poora karta hain aur uska payment use do din baad mil jaata hain.

Jai jitni mehnat se apni naukri kar raha tha. Utni hi shiddat se woh, apna design ka bhi kaam kar raha tha. 

Dekhte Hi Dekhte, kuch samay baad; Jai ke paas itna kaam aane lagta hain ki use ab naukri karne ki zaroorat mehsus hi nahi ho rahi thi.

Jai ne ek bada nirnay liya. Woh nirnay tha apni naukri chodne ka. Ab woh poora dhyaan apne design ke kaam par lagana chahta tha. 

Jai ke is nirnay mein, Sujeet aur Urmila ka poora sahyog tha. Jai ne apna purana laptop bech kar, ek naya laptop kharid liya.

Jai poore mehnat aur lagan ke saath yeh kaam kar raha tha. Ab woh mahine ka laakhon kamana shuru kar diya tha. 

Jai ko na keval apne shehar se, balki dusre shehron se bhi orders milna shuru ho gaye the.

Acchi kamayi ho rahi thi. Usne ghar ke liye, ek Car kharidi. Jai ki yeh tarakki dekh kar na keval ghar wale, balki mohalle ke log aur rishtedaar bhi bohut khush the.

Ek din Jai ne socha, ki jab mujhe itne orders mil rahe hain. Kyun na main, khud ki Design Company khol loon aur kuch ladkon ko bhi naukri par rakh loon.

Haalanki, yeh ek bohut badaa aur kathin nirnay tha. Lekin, Jai yeh baat bakhubi jaanta tha ki, safalta ka taj kathinaai ke marg se hokar hi prapt ho paata hain.

Jai ne kai dino tak rann-neeti banayi aur uspar kaam karna shuru kar diya. Jab Jai ko is baat ka andaaza hua ki, yeh rann-neeti safal hone ke kareeb hain, tab usne Bank se loan lene ke liye aavedan dena shuru kiya. 

Jai ke liye, yahan par bhi raah aasaan nahi thi. Jai ke joote ghiz gaye, Bank ke chakkar lagate-lagate. Saath Hi Saath, woh Companies se aur orders lene ke bhi prayaason mein juta hua tha. 

Yeh daur, Jai ke liye behad tanaavpurn tha. Jai ko der raat tak neend nahi lagti thi. Na woh chain se so paa raha tha aur na hi, woh kisi se apne mann ki dasha bata paa raha tha.

Ek aur Jai ko Bank se ek moti rakam ka karz lena tha aur dusri aur apne orders bhi badhvaane the. Kyunki, orders badhne se loan milne mein aasaani bhi ho jaati aur kamaayi jo badhti woh alag.

Is dauraan Jai ka manobal tootne laga tha. Lekin, Sujeet aur Urmila ne use samay-samay par prerit kiya. Kuch samay mein hi, Jai ne apne aap ko sambhaal liya. 

Jai ne dobara ek nayi rann-neeti banayi aur ek naye seere se apne kaam ko anjaam dene ka prayaas karne laga.

Kuch samay baad, Jai ki mehnat rang laayi aur jaise-taise use ek Bank ne loan diya. 

Aakhir mein Jai ne ek jagah dekh kar apna design company ka office khol liya aur safaltapurvak, apni khud ki ek Design Company shuru kar di.

Jai ke liye, yeh jeevan ki ek bohut badi chunauti thi. Jis par usne badi hi samajhdaari se Vijay prapt kiya. Jeevan mein aage bhi, kayi chunautiyaan uski pratiksha kar rahi hain. Jinka saamna karne ke liye, woh poori tarah se tayyar bhi hain.

                  -  Ved Vineet Gautam