Anil Mallik ek company mein naukri karte hain. Woh ek private company mein Assistant Supervisor ki post mein tainaat hain. Anil ka ek beta. Uska naam hain, Yash. Yash ki umar aath saal hain aur woh School mein padhayi karta hain. Aaj se kareeb ek saal pehle, Anil ki patni ek durghatna mein guzar chuki thi. Anil ne dusri Shaadi nahi ki yeh sochkar ki shayad, sauteli maa Yash ko khayal acche se rakh paayegi ya nahi. Kahi koi galat ya buri swabhaav wali ladki agar mil gayi, toh Yash ki zindagi barbaad ho jaayegi.
Haalnaki, samaaj ne aur khaas kar parivaar aur rishtedaron ne Anil ko dusri shaadi ke liye manane ki bohut koshish ki, lekin; woh apne faisle par adaa raha.
Yash ek bohut hi maasoom baccha hain aur woh Anil ki zindagi. Anil ki zindagi shuru aur khatam Yash par hi hoti hain.
Anil har roz subah uthkar Yash ko tayyar karta aur uske baad khud bhi tayyar hota. Phir woh dono ka tiffin banakar pehle Yash ko school chodta aur uske baad, woh apne kaam par chala jaata. Shaam ko aate samay, woh Yash ko school se lete hue ghar chala aata. Phir poori shaam dono baap-bete khoob baatein karte. Dono saath mein khelte aur phir raat mein khaana kha kar so jaate. Yeh in dono ki rozmarra zindagi ka ek badaa hissa tha. Aksar Itvaar ke din dono bahar kahi ghoomne ke liye chale jaate. Kabhi koi garden ghumne, toh kabhi koi movie dekhne ke liye chale jaate.
Ek din ki baat hain. Itvaar ka din tha aur hamesha ki tarah in dono ko saath mein bahar jaana tha. Anil ki neend subah-subah hi khul gayi. Usne bagal mein dekha ki Yash abhi bhi so raha tha. Woh gehri neend mein tha. Anil bistar se utha aur wash basin jaakar apna muh dhoya. Phir usne ek glass paani peeya aur wapas bed par aakar baith gaya. Woh apni jeb tatolne laga lekin, use Cigarette nahi mili. Anil ne yahan-wahan dhundha aur phir uski nazar Mez par padi. Usi Mez par uska Cigarette ka packet padaa hua tha. Anil Mez ke nazdeek gaya aur apna Cigarette ka packet uthaya. Usne packet mein se Cigarette nikaali aur use jalaakar pehla kash kheecha. 'Aah. Ab kahi jaake kal ki thakaan utri hain.' Anil ne socha.
Woh Cigarette ke kash ka lutf utha raha tha. Tabhi Anil ki nazar Yash par padi. Yash ab bhi gehri neend mein tha. Us nanhe se bacche ke maasoom chehre par meethi muskaan dekh kar Anil santusht mehsus kar raha tha. Yash ko dekhte-dekhte Anil bohut kuch soch raha tha. Anil ne socha, 'Kaash main apne laadle ko duniya ki har khushi de paata.' 'Mera agar bas chalta toh main Chand bhi tod laata apne heere ke liye.'
Tabhi Yash ki neend khul gayi. Yash ne dekha ki Anil use dekh raha tha. Uske haathon mein jalta hua Cigarette abhi bhi tha. Yash ne apni aankhein masli aur bistar se uthkar baith gaya.
"Papa aaj aap jaldi uth gaye." Yash ne pucha.
Anil - "Nahi beta main toh bas thodi der pehle hi utha hoon."
Yash - "Aaj ka hamara kya plan hoga Papa ?"
Anil - "Tum hi batao beta. Kaha jaana chahte ho tum ?"
Yash - "Movie."
Anil - "Thik hain beta. Tum tayyar ho jaao, hum dono aaj movie dekhne ke liye jaayenge."
Dono baap-bete tayyar ho jaate hain aur phir woh dono saath Cinema Hall mein chale jaate hain. Cinema Hall mein jaate hi, Yash ki nazar apne ek dost par padti hain. Woh bhaagta hua us ladke ke pass jaata hain aur Anil uske peeche-peeche jaata hain. Dono ladke ek dusre se Hi-Hello karte hain aur dono bataate hain ki woh dono dost hain. School mein saath padhte hain. Ladke ke pita se baat-cheet karte-karte, Anil ko pata chalta hain ki, us ladke ke pita ek vyapaari hain. Woh ek factory ke maalik hain. Woh sab log saath mein movie dekhte hain aur movie khatam hone ke baad, dono baap-bete dobara ghar aa jaate hain.
Anil Yash ko khaana khilaakar sula deta hain. Lekin, Anil ko neend nahi lag rahi thi. Woh soch raha tha, 'Mere is chote se parivaar ka bhavishya kya hoga ?' 'Kal ko jab Yash bada hoga, tab main uske liye kya kaisa jeevan banaunga ?' 'Kya main apne bete ko kabhi ek surakshit bhavishya de bhi paaunga ?' 'Yash ka woh jo dost mila tha, usne mehnat karke kis tarah apne bete ko ek khush-haal bhari zindagi pradaan kar di.' 'Ek woh baap hain aur ek main baap hoon.'
Anil ke mann mein khayalon ka ufaan zor pakad raha tha. Khayalon ki duniya mein khote-khote woh chintaaon ke dal-dal mein phansta jaa raha tha. Apne is chintaa ko durr karne ke liye, Anil ne apne nashe ka sahara liya. Usne Mez par padi Cigarette ka packet uthaya aur usmein se ek Cigarette nikaalkar jalaya. Cigarette peete-peete woh apne aankhon ke taare ke bhavishya ke baare mein soch raha tha. Woh soch raha tha ki woh kya-kya karega apne bete ke liye. Reh-Reh kar Anil ki nazar Yash par padti aur us bina Maa ke bacche ke masoom chehre ko dekh kar, Anil ka Dil santaap se bhar jaata. Uske liye yeh peeda ashaniya hoti jaa rahi thi. Ab Anil ki aankhon se aansun chalak pade. Khayalon mein khoye hue Anil ko kaafi samay beet chuka tha.
Tabhi achaanak se Anil ke antarmann se ek aawaz aati hain, 'Chahe kuch bhi ho jaaye, main apne bete ko ek ujjawal bhavishya zaroor dunga.' 'Main use woh sab kuch sikhaunga jo ki use Samaaj mein izzat dilaye aur uska rutba badhaye.' 'Main use videsh bhejunga padhne ke liye.' 'Lekin main yeh sab karunga kaise ?' 'Koi na koi vyapaar shuru karna hoga mujhe.' 'Naukri se kuch bhi haasil nahi ho paayega.' 'Lekin main aisa kounsa vyapaar karun ?' 'Kya main marketing se shuruaat karun ?' 'Haan shayad yahi sahi hoga.'
Anil ke dimaag mein achaanak se ek behtareen tarkeeb aa chuki thi. Ab bas us idea ko nikhaarna tha. Ek dhundhli si chitra dimaag mein bas chuki thi, bas usmein rang bharne ki kami thi. Shayad kuch aur tarkeeb Anil ke dimaag mein aa hi rahi thi ki neend ne use apni aagosh mein le liya.
Kuch ghanto baad ki baat hain. Anil ab bhi neend mein tha aur Yash use neend se jagaane ka prayaas kar raha tha. Tabhi Anil ko aabhas hua ki koi use pukaar raha hain. Anil ki aankhein halki si khuli aur usne apne saamne Yash ko khada paaya. Woh bistar se utha aur apni aankhein masli. Phir Yash ne kaha, "Papa subah ho chuki hain."
Anil - "Haan beta."
Phir Anil ne apna mobile uthaya aur dekha ki subah ke dus baj rahe hain. Anil ko mobile par samay dekhte hue Yash ne kaha, "Papa dus baj gaye hain."
Anil - "Haan beta."
Yash - "Papa waqt bohut ho chuka hain."
Anil - "Haan beta waqt bohut beet chuka hain."
Phir Anil sochta hain, 'Lekin ab main apna waqt zaroor badlunga. Ab main tumhe jeevan mein kisi bhi cheez ki kami nahi hone dunga.' Tabhi Yash Anil ka haath pakadte hue puchta hain, "Papa aap kya soch rahe ho ?"
Anil - "Kuch nahi beta."
Phir woh Yash ko gale se laga leta hain.
Din bhar Yash ke saath waqt beetane ke baad, woh apna laptop kholta hain aur usmein marketing ki jaankari haasil karne ki koshish karta hain. Agle din, woh Yash ko school chodkar office chala gaya aur shaam mein wapas aate samay woh Yash ko school se lete hue, ghar aa raha tha. Raaste mein Anil ne dekha, ek baap-bete ek dukaan se bahar nikal rahe the. Bete ke haath mein koi khilona tha aur woh ladka bohut khush dikhayi de raha tha. Apne bete ki muskurahat dekh kar, woh aadmi muskura raha tha. Us aadmi ke chehre par ek alag si khushi thi. 'Aaj is aadmi ko khud se koi bhi shikayat nahi hogi.' 'Aaj yeh aadmi is kaabil bhi hain, ki uska beta jis cheez par ungli rakh de; woh cheez uski ho jaayegi.' 'Mujhe bhi itna saksham banna hain.'
Ghar pohuchne ke baad, Anil ne apna laptop khola aur un Marketing Companies ke baare mein jaankari ikattha ki jo ki ek freelancer ko apne saath kaam karne ka mauka deti hain.
Apna portfolio mazboot karne ke liye Anil ne khud ki ek website bhi banayi. Woh un Companies ko mail bhejta aur saath hi saath us email mein woh apne website ka link jodna kabhi nahi bhoolta. Yeh silsila kuch mahine tak chala.
Ek din ki baat hain, Anil Yash ko School se lene ke liye gaya tha. Yash thoda udaas aur thaka hua lag raha tha. Hamesha ki tarah Anil ne Yash ka haath pakda aur use Yash ke shareer mein badlaav mehsus hua. Anil ne dhyaan se Yash ka haath chua toh pata chala ki Yash ko achaanak se bukhaar chadh gaya tha. Anil use turant apne saath aspataal le gaya. Doctor ne Yash ko do din ke liye aspataal mein bharti karane ki salaah di. Doctor ne Yash ko injection diya aur woh so gaya.
Anil use dekh raha tha aur beech-beech mein doctors se Yash ki tabiyat ke baare mein jaankari bhi le raha tha. Anil ek kursi par baitha hua tha aur woh thoda udaas bhi tha. Tabhi Anil ka phone bajta hain. Woh pehle toh us call ko kaat deta hain. Lekin, agle hi pal uska phone dobara bajta hain aur is baar woh us call ko uthata hain.
Phone ke dusri taraf se aawaz aati hain, "Kya main Mr. Anil Mallik se baat kar sakta hoon ?"
Anil - "Ji haan bol raha hoon."
Woh anjaan vyakti kehta hain, "Main Bright Future marketing company se baat kar raha hoon. Hamari company ko ek digital marketer ki zaroorat hain. Yeh kaam contract basis par hoga. Kya aapko is kaam mein dilchaspi hain ?"
Anil - "Ji bilkul."
Woh aadmi Anil ko kaam ke baare mein batata hain aur us kaam ko poora karne ke liye chaubis ghanton ka waqt deta hain. Anil turant apne ghar ki aur daudta hain aur apna laptop lekar aspataal chala aata hain.
Is daud bhaag ke aur hadbadaahat ke chalte Anil ko bhi halka sa bukhaar chadh jaata hain. Lekin, Zindagi mein mila hua yeh pehla kaam samay se poora karna bhi uske liye zaroori tha. Woh aspataal se bukhaar ki ek dawaai kha leta hain aur apna poora dhyaan us kaam par laga deta hain.
Kaam karte samay uski nazar baar-baar Yash ki aur jaa rahi thi. Ek taraf Anil ki manzil uske saamne khadi thi, toh dusri aur uske lakshya ki wajah uske saamne bimaar avastha mein padi hui thi. Yeh pal Anil ke liye behad kathin tha. Yeh lamha bohut hi pechida tha.
Anil ke liye, yeh ek kathin pareeksha ki ghadi thi. Is paristhiti ko Anil ne bakhubi samabhalaa. Woh beech-beech mein Yash ki tabiyat ka dhyaan bhi rakhta aur poore dhyaan ke saath apna kaam bhi karta. Jab bhi uske sar par neend vaar karne ki koshish karti woh aspataal ke bahar jaakar ek Cigarette pee aata aur dobara apne kaam par poore ekaagrata ke saath lag jaata.
Woh tay samay par kaam poora karke us aadmi ko E-Mail bhej deta hain, jiske use turant paise bhi mil jaate hain.
Teesre din, Yash ko aspataal se discharge mil jaata hain. Ab woh har roz shaam mein apply karta. Dekhte Hi Dekhte Anil ke paas kaam ki baadh si aa jaati hain. Woh apni naukri se resign kar ghar se apne vyapaar ko badhane ki koshish mein lag gaya. Do saal baad, Anil ne ek jagah dekh kar apni khud ki ek Marketing Company shuru kar di. Ab woh is saksham ban chuka hain ki woh Yash ki har ek iccha poori kar sake.
Kyunki, Anil behad mehanti tha, isliye kuch samay baad; uske kaam ki maang bazaar mein bohut tezi se badhi.
Ab Anil ka vyapaar acche se chal raha hain aur woh aaj bhi kaam ke saath-saath Yash ko apne jeevan ke samay ka ek hissa zaroor deta hain.
Comments
Post a Comment