Meel Ka Patthar

 Sanjay Shukla ek private company mein naukri karta hain. Uski ek patni aur ek beta hain. Sanjay ki patni ka naam, Narmada Shukla hain aur bete ka naam Amol Shukla hain. 

Sanjay ko apne parivaar ke ujjawal bhavishya ke liye, apna vyapaar shuru karne ki iccha hui thi. Kaafi samay se woh apne vyapaar ko shuru karne ki jaddojahad mein laga hua tha. Lekin abhi tak use koi bhi safalta prapt nahi ho paayi hain. 

Sanjay ki iccha thi ki woh khud ki ek Marketing Company sthapit kare. Apni is iccha ko puri karne ke liye Sanjay ne bohut sangharsh kiya. Usne har ek tareeka apna liya aage badhne ka, lekin woh aaj bhi wahi ka wahi hain. Sanjay ko lagne laga, ki usne saare prayaas kar liye hain. 

Ek din ki baat hain. Sanjay subah tayyar hokar apne naukri par gaya aur shaam mein wapas aate samay, woh do-chaar companies mein baat karke ghar ki aur nikal pada. Un companies mein bhi, use niraashaa hi haath lagi. Aaj Sanjay ka Dil bhar aaya tha. Woh apne parivaar ke bhavishya ke liye behad chintit tha. 

Thodi der baad, woh apne ghar pohuch gaya. Ghar pohuchte hi, Sanjay ne darwaaza khatkatayaa aur Narmada ne darwaaza khola. Sanjay ghar ke andar aata hain. Phir Narmada kehti hain, "Kya main tumhare liye, paani le aaun ?"

Sanjay - "Haan."

Narmada andar chale jaati hain aur woh Sofa par baith jaata hain. 

Woh apni jeb mein haath daalta hain. Usmein se apna batuwaa bahar nikalta hain aur paise ginne lag jaata hain. Aaj Sanjay se 500 Rupaye kharch ho gaye the. Naukri se chutne ke baad, woh dusre companies ke chakkar laga raha tha, taaki use business ke liye koi order mile; jaisa ki woh har roz karta hain. Lekin, us roz Sanjay se kuch zyada hi paise kharch ho gaye the. 

Sanjay mann-hi-mann sochta hain, 'Apni pagaar tak nahi bacha paata hoon, aur banna hain mujhe ek vyapaari.' Woh batwaa saamne pade table par phenk deta hain. 

Tabhi Narmada Hall mein aati hain aur uske haath mein paani ka ek glass hota hain. Sanjay bina kuch kahe, woh glass apne haath mein pakadta hain aur ek saans mein hi woh saara ka saara paani gatak leta hain. Yeh dekh kar, Narmada kehti hain, "Aree Itni ghaai ? Aaj kaam mein zyada thak gaye ho, ya kisi baat ne tumhe pareshan kar rakha hain ?"

Sanjay - "Nahi aisi koi baat nahi hain."

Narmada - "Kam se kam paani toh aaram se piyo ?"

Sanjay koi jawaab nahi deta hain. Phir Narmada Sanjay ke paas aakar baith jaati hain aur kehti hain, "Agar tum thake hue na ho, toh mujhe tumse ek baat kehni thi."

Sanjay - "Haan kaho."

Narmada - "Woh Amol ki School ki chuttiyan shuru ho gayi hain, toh kya main kuch din ke liye, Papa ke yahan chale jaaun ?"

Sanjay - "Thik hain. Kab jaane ka programme banaya hain tumne ?"

Narmada - "Woh darasal kal hi jaana tha mujhe."

Sanjay - "Thik hain. Chali jaao tum."

Narmada muskurate hue, andar chali jaati hain. Agle din, Sanjay ki naukri se chutti rehti hain toh woh ghar par hi ruk jaata hain aur saamaan pack karne mein woh Narmada ki madad karta hain. Phir woh sab Railway Station chale jaate hain. Kuch der tak intezaar karne ke baad, train aa jaati hain. Sanjay ab bhi bhavishya ki pareshaaniyon mein uljha hua tha. 

Us aati hui train ko dekh kar, Sanjay ko lag raha tha ki jaise yeh train uske liye hi aayi ho. Sanjay mann-hi-mann sochta hain, 'Dil toh karta hain, ki abhi isi waqt is train mein baith jaaun aur kisi aisi jagah jaaun, jahan mujhe koi bhi naa jaanta ho. Us naye shehar mein apni zindagi ki ek nayi shuruaat karun.'

Tabhi Train un logon ke saamne aakar ruk jaati hain aur Sanjay Narmada aur Amol ko Train mein bitha deta hain. Kuch der baad, Train chal padti hain aur dekhte hi dekhte, Train Sanjay ki aankhon se ojhal ho jaati hain. 

Phir Sanjay sochta hain, 'Yeh Train bhi apni manzil ke liye nikal padi. Pata nahi mujhe meri manzil kab tak milegi.'

Yeh khayal uske zehan mein aate hi, uska Dil dukh se bhar jaata hain. Sanjay Railway Station ke bahar jaata hain aur woh Rickshaw ka intezaar kar raha hota hain. Kai Rickshaw wale uske pass aakar uski manzil ka pata poochte hain, lekin woh sab Rickshaw Sanjay ke ghar ki aur nahi jaa rahi thi.

Kuch samay tak intezaar karne ke baad, aakhir mein Sanjay ko ek Rickshaw mil hi jaati hain, jo ki use uske ghar tak chodne ke liye tayyar ho jaati hain. Sanjay us Rickshaw mein baithkar apne ghar ke buliding ke paas pohuch jaata hain. Phir woh nazdeek ke ek Hotel se khaana bandhwakar apne ghar ke andar aata hain. 

Darwaaza band karke woh Sofa par baith jaata hain.

Woh thakaa hua tha. Shareer se nahi, balki dimaag se. Woh shayad zindagi se thak chuka tha. Aaj Sanjay ko zindagi mein aage badhne ka koi raasta nazar nahi aa raha tha. Use har taraf sirf andhera hi andhera nazar aa raha tha. Sanjay ko aisa mehsus ho raha tha, maano kaale andhere ka saaya use har taraf se gher chuka hain. 

Sanjay ko pyaas lagi thi. Tabhi hi, uske muh se nikalta hain, "Are Narmada zara ek glass paani le aana."

Agle hi pal Sanjay ko yaad aata hain ki, abhi-abhi toh usne apni Patni aur Bete ko Train mein bithakar aaya hain. 

Sanjay sochta hain, 'Aakhir kya ho chuka hain mujhe ?'

'Kaha kho gaya tha main ?'

'Kahi main apni himmat toh nahi haar raha hoon ?' 

'Nahi. Mujhe apni himmat nahi haarni hain. Kisi bhi keemat par nahi.'

'Agar main apni himmat kho dunga, toh sab kuch kho dunga.'

'Waise bhi maine aaj tak apni zindagi mein haasil hi kya kiya hain ?'

'Kya main safalta prapt karne ke yogya bhi hoon ?'

'Kal ko jab Amol bada hoga, toh use kaisa bhavishya dunga main ?'

'Kam Se Kam apne bete ke bhavishya ke liye, mujhe needarr bankar rehna padega.'

Tabhi hi, Sanjay ki nazar table par padti hain. Table par ek kitaab padi hoti hain. Woh us kitaab ko uthata hain aur us kitaab ka shirshak padh kar muskurata hain. Kitaab ka shirshak tha, 'Ant ke baad ka jeevan.'

'Kya is jeevan se pare bhi koi jeevan sambhav hain ?' Woh sochta hain.

'Yeh duniya aakhir kitni badi hain. Is sansaar mein, logon ne kya kuch prapt nahi kar liya. Un sabhi mahaan logon ne woh sab prapt kiya, jiski ek saadhaaran se saadhaaran vyakti bas kalpana maatr hi kar sakta hain.'

'Kya jeevan mein kabhi, main bhi in logon ki shreni mein aa sakta hoon ?'

'Agar koshish karun, toh shayad aa hi jaaun ?'

Tabhi hi, Sanjay ko neend gher leti hain aur woh usi Sofa par baithe so jaata hain. 

Kuch ghanto baad, Sanjay ki neend khulti hain aur woh Sofa par se uthta hain. Sanjay ko ab bhi halki thakaan mehsus ho rahi thi. Uska shareer dard se toot raha tha. 

Sanjay ke zehan mein khayal aata hain, 'Aaj office nahi jaaun kya ?' 'Lekin kaam karna bhi toh zaroori hain. Aakhir isi naukri ke bharose hi toh mera ghar chal raha hain.' 

Woh bathroom jaakar tayyar hota hain. Phir woh ghar par taala lagaakar apne office ke liye nikal padta hain. 

Aaj daftar mein kuch zyada hi kaam tha. Haalanki, Sanjay apna poora kaam waqt se khatam kar deta hain. Lekin, kam samay mein zyada kaam karne ki wajah se woh aur zyada thak jaata hain.

Sanjay apne office se bahar nikalta hain aur woh ek Company mein jaakar baat karta hain. Woh poori koshish karta hain ki, is company se kisi bhi tarah ka marketing project uske haath aa jaaye.

Kaafi der tak, charcha karne ke baad, aakhir mein us Company ka maalik Sanjay se kehta hain, "Aap mujhe thoda samay dijiye, main soch kar batata hoon."

Sanjay - "Thik hain."

Phir woh us Company se bahar nikal aata hain. Meeting kaafi lambi chali thi aur office mein bhi bohut zyada kaam hone ki wajah se, Sanjay ko kuch zyada hi thakaan mehsus ho rahi thi. Saath Hi Saath, use bohut bhookh bhi lagi hui thi. Woh nazdeek ke ek thele ke paas jaata hain aur us thele wale se kehta hain, "Bhaiyaa Bhajiya milegi kya ?"

Thele Wala - "Haan Seth Ji mil jaayega. Aap baithiye na ?"

Sanjay wahi par padi ek kursi par baith jaata hain. 

Thele Wala - "Seth Ji thoda sa samay lagega. Lekin, taazi Bhajiya tal kar de dunga."

Sanjay - "Koi baat nahi. Aaram se banao, mujhe bhi koi jaldi nahi hain."

Bhajiya banate-banate Thele Wala Sanjay se poochta hain, "Aap kaam kya karte ho Seth Ji ?"

Sanjay - "Main filhal Marketing ka kaam dhundh raha hoon."

Thele Wala - "Accha. Agar aapko bura na lage, toh ek baat kahun sahab ?"

Sanjay - "Haan kaho Bhaiyaa."

Thele Wala - "Agar kabhi samay mile, toh hamare is thele ki bhi Marketing kar dena. Isi bahane kya pata, hamare yahan aur grahak aa jaaye ?"

Haalanki, thele wale ne yeh baat mazaak mein ki thi, lekin yeh baat Sanjay ko zabardast lagi. 

Woh khushi ke maare kursi se uchal padta hain. 

Thele Wala - "Sahab agar hamari baat aapko buri lagi ho toh hume maaf kar dijiye."

Sanjay - "Bohut hi badi baat kahi hain aapne Bhaiyaa. Agar mere marketing se aapke yahan customer badhenge, toh aap mujhe munaafe ka kitna takka doge ?"

Thele Wala - "Kya mazaak kar rahe ho Sahab ?"

Sanjay - "Main vyapaar ki baat kar raha hoon, ek vyapaari se. Soch samajh kar batao, munaafe ka kitna takka doge ?"

Thele Wala - "Jab aap humse vyapaar ki baat kar hi rahe hain toh, aadha-aadha baant lete hain."

Sanjay - "Thik hain."

Thele Wala - "Lekin yeh sab aap karenge kaise ?"

Sanjay - "Yeh sab aap mujhpar chod do. Bas do-chaar mahine ka samay do, agar Bhaiyaa aapke yahan grahak nahi badhe toh mera naam badal dena."

Thele Wala - "Thik hain Sahab."

Sanjay us thele wale ke thele ka naam, uska mobile number aur location sab kuch likh leta hain. Phir woh ghar jaakar ek accha sa ad tayyar karta hain aur us Thele ka Social Media par ek page tayyar kar deta hain. Sanjay har roz us page par post likhta aur kuch photos ka bhi istemaal karta. 

Dekhte Hi Dekhte, teen mahine mein hi, Thele Wale ke yahan grahak ki badhotri hoti hain. Ek din, Sanjay jaakar us Thele Wale se milta hain aur woh aadmi bohut utsaah se batata hain, ki kaise uske yahan grahakon ki baadh aa gayi hain. Woh toh yahan tak keh raha tha ki, log durr se uske yahan aane lag gaye hain. Phir woh Sanjay ko uske hisse ka paisa bhi de deta hain. 

Isi dauraan, Narmada bhi Amol ko lekar ghar laut aati hain. 

Ab Sanjay apni naukri se chutne ke baad, har roz shaam mein sabhi chote-mote thele ke chakkar lagata aur unse baat-cheet karke unse muh-zubaani contract haath mein le leta. Phir woh un sabhi thelon ki digital marketing karta. Jisse un sabhi thele walon ka profit badh jaata aur Sanjay ko uska hissa samay par mil jaata. 

Sanjay ki kamayi dheere-dheere badhne lagi thi. Kuch hi mahino mein, woh apni pagaar se bhi zyada kamaane lag gaya tha.

Sanjay ne apni naukri chodne ka faisla kiya taaki woh apne digital marketing ke kaam ko poora samay de sake. Kuch samay baad, Sanjay ko kuch bade contract bhi milna shuru ho gaye. Jab Sanjay ne dekha, ki use lagatar bade contracts mil rahe hain aur aage bhi bade kaam milne ki ummeed hain, tab Sanjay ne ek jagah dekh kar apna daftar khol liya hain. 

Kareeb teen saal ke baad, Sanjay ne ek badi jagah office khol liya aur kaayi logon ko apne Company mein naukri bhi de di. Bhale hi Sanjay ko aaj badi-badi Companies marketing ka contract de rahi hain, lekin; Sanjay ne apni puraani aur chote vyapaariyon ka saath nahi choda. Yahan tak ki, agar koi nayaa chota vyapaari Sanjay ke paas kaam lekar aata hain; woh us vyapaari ko poori tavajjo deta hain. Shayad yahi baat, Sanjay ki safalta ki wajah bhi ban gayi. 

Us din us thele par baithna, Sanjay ke jeevan ke liye, meel ka patthar saabit ho gaya.

                 - Ved Vineet Gautam