Anurag Shrivastav ek Company mein naukri karta hain. Woh apne maata-pita ki iklauti santaan hain. Jis Company mein Anurag naukri karta hain, waha par ek ladki bhi kaam karti hain. Us ladki ka naam hain, Bhagyashree.
Bhagyashree behad khoobsurat hain aur woh shant aur sushil swabhaav ki hain. Woh ladki aksar daftar mein Salwaar Suit mein hi aati hain. Videshi kapdon se maano us ladki ki jaise dushmani si ho. Woh daftar mein zyada kisi se baat nahi karti hain aur woh aksar dukhi nazar aati hain.
Anurag ki Bhagyashree se kabhi koi khaas baat-cheet nahi hui hain.
Ek din ki baat hain. Shaam ka waqt tha aur office ka samay samaapt ho chuka tha.
Anurag parking se apni Bike lekar nikla. Kuch durr jaane par usne dekha ki, Bhagyashree foothpath par paidal chalte hue jaa rahi hain. Woh Bhagyashree ke nazdeek jaakar apni Bike rok deta hain. Woh bhi Anurag ko dekh kar ruk jaati hain. Dono ki nazrein milti hain aur Anurag kehta hain, "Kya main aapko kahi drop kar dun ?"
Bhagyashree koi jawaab nahi deti hain.
Anurag - "Main aapke saath hi office mein kaam karta hoon."
Bhagyashree - "Haan woh main jaanti hoon."
Anurag - "Aap paidal jaa rahi thi, isliye maine socha ki main aapko ghar tak chod doon. Agar aapko koi aitraaz na ho toh."
Bhagyashree - "Thik hain."
Phir woh Anurag ke Bike par baith jaati hain. Raaste bhar dono ke beech koi baat-cheet nahi hoti hain, ghar ke raaste ki disha ke alaawa. Kuch der baad, Bhagyashree ka ghar aa jaata aur Anurag use chod kar wapas apne ghar ke liye nikal padta hain.
Agle din, Anurag daftar par waqt se pohunch jaata hain aur apna kaam shuru kar deta hain. Shaam mein kaam khatam hone ke baad, woh parking mein jaata hain. Apni bike ke pass pohuchne ke baad, woh dekhta hain ki bike ke meter par ek kaagaz modkar rakha hua hain. Woh kaagaz uthakar kholta hain aur dekhta hain ki usmein kuch likha hua hai. Woh lekh padhta hain. Kaagaz par likha hua tha, 'Kal shaam aapne mujhe ghar tak choda. Aapka bohut shukriya. Main kal aapka shukriyada kar nahi paayi, isliye maine yeh kaagaz aapki bike par chod diya. Mujhe ummeed hain ki aapko yeh harkat buri na lagi ho. Agar buri lagi ho, toh uske liye kripya mujhe maaf kar dijiyega. - Bhagyashree.'
Yeh lekh padhkar Anurag muskurata hain aur apni bike par baithkar ghar chala jaata hain.
Agle din, daftar mein dono ki nazrein milti hain aur dono ek dusre ko dekh kar muskura dete hain. Kai din beet jaate hain lekin, dono ke beech koi khaas baat-cheet nahi hoti hain.
Ek din ki baat hain. Anurag ek Cinema Hall mein gaya hua tha. Woh Ticket Counter par line mein khada tha. Tabhi Anurag ko aabhas hota hain ki koi use pukaar raha hain. Woh yahan-wahan dekhta hain. Lekin koi nazar nahi aata hain. Tabhi Anurag ko apne kandhe par kisi ka sparsh mehsus hota hain. Woh mudkar dekhta hain. Bagal mein Bhagyashree khadi thi. Dono ki nazrein milti hain aur woh dono ek dusre ko dekh kar muskurate hain. Phir Anurag kehta hain, "Hi Bhagyashree."
Bhagyashree - "Hi Anurag. Kaise ho aap ?"
Anurag - "Main thik hoon. Aap kaisi ho ?"
Bhagyashree - "Main bhi thik hoon."
Anurag - "Aap movie dekhne wali ho ya movie dekh chuki ho ?"
Bhagyashree - "Nahi. Abhi movie dekhna baaki hain."
Anurag - "Agar aapko aitraaz na ho, toh kya hum saath mein movie dekh lein ?"
Bhagyashree - "Thik hain."
Anurag dono ka ticket nikalwa deta hain aur woh dono saath mein movie dekhte hain. Movie khatam hone ke baad, dono saath mein bahar nikalte hain. Phir Anurag kehta hain, "Agar aapko chahiye toh kya main aapko ghar chod doon ?"
Bhagyashree - "Thik hain. Lekin, jab hum bahar mil hi chuke hain, agar aap free ho toh hum kuch der baatein bhi kar sakte hain."
Anurag - "Aap baatein bhi karti ho, mujhe aaj pata chala."
Woh hans deti hain. Bhagyashree ke chehre par mithi hansi dekh kar Anurag muskura deta hain. Phir woh kehta hain, "Kyun na hum kisi resturant mein baith jaaye, waha baatein bhi ho jaayegi aur thodi peat-pooja bhi ho jaayegi."
Bhagyashree - "Yeh khayal bhi sahi hain."
Anurag - "Aap yahi par mera intezaar kariye, main Parking Lot se apni Bike le aata hoon."
Bhagyashree - "Thik hain."
Anurag apni bike parking lot se nikalta hain aur Bhagyashree ke saamne laakar khada kar deta hain. Bhagyashree Anurag ke peeche baith jaati hain. Bike chal padti hain. Tabhi Anurag kehta hain, "Aapke ghar mein koun-koun hain ?"
Bhagyashree - "Papa, Mummy aur main. Aur aapke ghar mein ?"
Anurag - "Papa, Mummy aur main."
Dono hans padte hain. Bike chal rahi thi aur dono ek dusre se yahan-wahan ki baatein kar rahe the. Zyadatar office ke aur kaam ke baare mein. Kuch der baad, ek resturant dikhta hain aur Anurag waha par apni Bike rok deta hain. Phir woh kehta hain, "Kya hum is resturant chale ?"
Bhagyashree - "Ji zaroor."
Dono saath mein resturant mein jaate hain aur ek table par baith jaate hain. Tabhi waiter unke paas Menu lekar aata hain aur Anurag Menu Bhagyashree ko pakda deta hain. Phir Bhagyashree kehti hain, "Pehle aap order kariye."
Anurag - "Ji nahi. Ladies First."
Bhagyashree apna order deti hain aur uske baad Anurag apna order deta hain. Waiter chala jaata hain.
Dono ke beech baat-cheet dobara shuru ho jaati hain. Anurag kehta hain, "Aage ke baare mein aapne kya socha hain ?"
Bhagyashree - "Aage kis baare mein ?"
Anurag - "Career ke baare mein."
Bhagyashree - "Abhi mehnat se kaam karna hain aur zindagi mein bohut aage jaana hain. Shayad aapka bhi yahi plan hoga."
Anurag - "Bilkul."
Bhagyashree - "Kya aapki shaadi ho gayi hain ?"
Anurag - "Ji nahi. Main abhi tak kunwara hoon. Aur aap ?"
Bhagyashree - "Main bhi."
Anurag - "Aage shaadi ke baare mein aapke kya khayal hain ?"
Bhagyashree - "Dekhte hain. Agar koi ladka pasand aata hain toh bohut acchi baat hogi."
Anurag - "Aur agar ek umar tak pohuchne ke baad, koi ladka pasand na aaya toh ?"
Bhagyashree - "Tab jis ladke ko Papa aur Mummy pasand karenge. Main us ladke se shaadi kar lungi."
Anurag - "Yeh bhi sahi hain."
Bhagyashree - "Aur aapke kya khayalat hain Shaadi ke baare mein ?"
Anurag - "Mujhe filhal koi jaldi nahi hain Shaadi ki."
Bhagyashree - "Aap apne pasand se Shaadi karoge ya Papa-Mummy ke ?"
Anurag - "Agar koi ladki pasand aayi, aur hum dono ke Papa-Mummy raazi ho gaye, toh main Shaadi kar lunga."
Bhagyashree - "Aur agar koi pasand na aayi toh ?"
Anurag - "Toh jis ladki ko Papa-Mummy chunenge, us ladki se Shaadi kar lunga."
Bhagyashree - "Agar aapko kisi se mohabbat ho jaaye aur dono mein se kisi ek parivaar ki marzi na ho, toh ?"
Anurag - "Toh bhi main parivaar ke marzi ke khilaaf nahi jaaunga."
Anurag ka jawaab sunkar Bhagyashree muskura deti hain. Phir Anurag poochta hain, "Aapke kya khayal hain, Pyaar aur Shaadi ke baare mein ?"
Bhagyashree - "Mera bhi kuch aisa hi maan na hain."
Anurag - "Waise aaj kal toh zyadatar log apni pasand se Shaadi kar rahe hain. Parivaar bhi aasani se maan jaa rahe hain, apne bachoo ki pasand ko."
Bhagyashree - "Haan woh toh hain. Lekin, sabhi ko toh unka pyaar mil nahi paa raha hain. Bohut saare log toh khudki Zindagi tabah kar de rahe hain pyaar mein. Ek pal ke liye bhi woh log aage ka nahi sochte hain."
Phir Anurag table par apna haath modkar rakhta hain aur zara sa Bhagyashree ki aur jhukta hain. Dono ki nazrein milti hain aur phir woh kehta hain, "Jo soch-samajhkar kiya jaaye, woh pyaar hi kaisa ?"
Dono ki nazrein ek dusre se milti hain aur un dono ki nazrein ek dusre mein kaid ho jaati hain.
Tabhi Waiter order lekar aa jaata hain aur woh dono yahan-wahan dekhne lagte hain.
Dono saath mein khaana khate hain aur dusri baatein karne lagte hain. Uske baad woh dono us resturant se bahar nikalte hain. Phir Anurag kehta hain, "Aap apne ghar kaise jaaogi ?"
Bhagyashree - "Main chali jaaungi kisi transport se."
Tabhi achaanak se barsaat shuru ho jaati hain. Dono bhaagte hue nazdeek ke ek dukaan ki aur jaate hain. Is dauraan kab in dono ka haath ek dusre ke haathon mein aa jaata hain, yeh in dono ko khud samajh mein nahi aata hain. Dukaan ke patre ke neeche khade, yeh dono khudko barsaat mein bheegne se bachane ki koshish karte hain.
Dono ek dusre ke behad kareeb khade the. Tabhi baadal garaj padta hain aur anjaane mein dono ek dusre ko chu lete hain. Dono ki nazrein milti hain aur woh dono ek dusre ki aankhon mein doob jaate hain. Achaanak se hui barsaat aur uske baad, baadal ka jhatke se garajna; is wajah se Bhagyashree thodi sehami hui thi. Uski aankhon mein halka sa darr tha aur saath hi, uske honth zara se kaanp rahe the. Anurag ki nazar, Bhagyashree se ek pal ke liye bhi nahi hath paa rahi thi. Woh Bhagyashree ko behad dhyaan se dekh raha tha. Jise woh bhi bakhubi samajh rahi thi.
Kuch der baad, barsaat rukti hain aur Bhagyashree bina kuch kahe chale jaati hain. Woh pal dono ke liye behad ajeeb tha. Dono na jaane kya mehsus kar rahe the.
Agle din, daftar mein dono ki mulakat hoti hain. Lekin koi baat-cheet nahi hoti hain. Shaam mein kaam khatam hone ke baad, dono office se bahar nikalte hain. Anurag apni bike nikalta hain aur Bhagyashree uske peeche baith jaati hain. Woh usi resturant mein bike le jaakar rok deta hain. Dono saath baith te hain.
Phir Anurag kehta hain, "Toh jis baare mein baat adhuri reh gayi thi, kya us baat ko hum aaj poora kar lein ?"
Bhagyashree - "Kya kal tumne kuch mehsus kiya ?"
Anurag - "Shayad."
Bhagyashree - "Zyada din nahi hua hain, hume ek dusre se mile hue. Do-Chaar mulaakaatein hui. Na kabhi zyada baatein hui aur hume pyaar ho gaya ?"
Anurag - "Mohabbat kisi bulaawe ka intezaar nahi karti hain. Pyaar mein padne ke liye toh ek pal hi kaafi hota hain na. Waise bhi in do-chaar mulakaaton mein hi, hum dono aap se tum par aa gaye; yeh bhi toh ek sach hain."
Bhagyashree - "Agar kal Barsaat nahi hui hoti, toh bhi kya tumhara Dil yahi kehta, jo aaj keh raha hain ?"
Anurag - "Hum dono ek dusre ko thik se jaante nahi hain, lekin; hum dono saath mein Movie dekh liye, resturant mein saath khaana bhi khaa liye. Jee bhar kar ek dusre se apne Dil ki baatein bhi kar liye. Kyunki hum anjaan hain ek dusre ke liye."
Bhagyashree - "Agar aisa hi hain toh thik hain. Apne ghar walon se baat kar lete hain hum dono aur Shaadi kar lete hain. Uske baad yeh rishta kaha tak chalta hain, yeh dekhna dilchasp hoga."
Anurag - "Tum jab chaho main tumhare ghar walon se baat-cheet karne ke liye aa jaaunga."
Bhagyashree - "Aur ghar walon ko hum kya kahenge. Hum dono ek dusre ko thik se jaante nahi hain, lekin hum dono ek dusre se Shaadi karna chahte hain. Kya yeh baat unhe hazam hogi ?"
Anurag - "Dekho aage wahi hoga, jo tum chahogi. Agar tumhe is rishte ko aage badaana hain, toh thik hain aur agar nahi toh main tumpar koi dabaav nahi daalunga."
Bhagyashree - "Mujhe sochne ke liye waqt chahiye."
Anurag - "Tum jab chaho tab apna jawaab de dena."
Bhagyashree - "Jawaab 'Na' bhi ho sakta hain."
Anurag - "Thik hain."
Bhagyashree waha se chali jaati hain.
Agle din, Bhagyashree daftar nahi aati hain. Anurag sochta hain, 'Shayad woh isi kashmakash mein hogi, ki woh aage kya faisla lein.'
Lekin, woh us din ke baad se office aati hi nahi hain. Do-Chaar din tak intezaar karne ke baad, woh office walon se Bhagyashree ke office na aane ki wajah poochta hain, toh pata chalta hain ki uske pita bimaar hain aur woh aspataal mein bharti hain.
Shaam mein Anurag seedhe us aspataal mein pohuch jaata hain. Bhagyashree behad dukhi thi. Pata chalta hain ki, Bhagyashree ke pita ko Heart Attack aaya hain. Woh Bhagyashree ko bohut bhavnaatmak sahara deta hain.
Bhagyashree ke pita kai dino tak aspataal mein bharti rehte hain aur Anurag har shaam aspataal mein jaakar Bhagyashree se milta hain.
Bhagyashree ko bhi ehsaas ho jaata hain ki, Anurag hi uska jeevan saathi hain.
Bhagyashree ke pita ko discharge milne ke baad, woh Anurag ko apne ghar milne ke liye bulaati hain. Waha par woh sab milkar dono ke saath ke bhavishya ki yojna banate hain aur rishta tai kar dete hain. Kuch samay baad, dono ki Shaadi ho jaati hain.
Comments
Post a Comment