Naaz

 Akhil Singh ek Company mein naukri karta hain. Woh apne maata-pita ka iklauta ladka hain. Woh apna kaam behad mehnat se karta hain. Woh imaandar bhi hain. Woh roz subah tayyar hokar apne naukri par jaata aur shaam hote hi, apne ghar laut aata.

Ek din ki baat hain. Har roz ki tarah, us din bhi Akhil apne office waqt par pohucha. Woh apne table par jaakar baitha aur apna kaam shuru kar diya. Woh apna kaam poore dhyaan se kar raha tha. 

Kuch der baad, Akhil ka phone bajta hain. Woh table par rakha hua apna phone uthata hain aur dekhta hain ki, Call uske Pita ka tha. Woh Call uthata hain aur kehta hain, "Haan Papa kahiye."

Akhil Ke Pita - "Beta tum pohuch gaye office ?"

Akhil - "Haan Papa."

Akhil Ke Pita - "Waqt se daftar pohuch gaye ?"

Akhil - "Haan Papa."

Akhil Ke Pita - "Thik hain beta. Toh phir tum apna kaam karo. Shaam mein milte hain."

Akhil - "Papa aapne is waqt Call kiya ?"

Akhil Ke Pita - "Haan toh ?"

Akhil - "Nahi itni subah-subah aap kabhi Call nahi karte the. Isliye maine pooch liya."

Akhil Ke Pita - "Bas yun hi beta."

Akhil - "Agar koi dikkat ho toh main ghar aa jaata hoon."

Akhil Ke Pita - "Nahi aisi koi baat nahi hain. Tum apna kaam karo. Shaam mein milte hain."

Akhil - "Sab kuch thik toh hain na Papa ?"

Akhil Ke Pita - "Haan beta sab kuch thik hain. Tum shaam mein ghar aa jaao, phir hum dono baith kar baatein karte hain."

Akhil - "Thik hain Papa. Toh main phone rakhta hoon phir."

"Thik hain beta." Yeh kehkar, Akhil Ke Pita phone kaat dete hain.

Phone rakhte hi, Akhil soch mein pad jaata hain. Woh sochta hain, 'Aakhir Papa ne aise samay par kyun Call kiya ?'

'Kya Papa kahi kisi musibat mein toh nahi phans gaye hain ?'

'Kahi koi aisa tension toh unhe pareshan kar raha ho. Shayad bhavishya ki chinta unhe sataa rahi ho.'

'Shayad woh mujhe batana nahi chahte ho.'

Yeh sab baatein woh soch raha tha. Tabhi Akhil ke bagal mein baitha hua ek dost, uske sar par ek file maarta hain aur Akhil apne khayaalon ki duniya se bahar aata hain. 

Akhil Ka Dost - "Kya hua ? Kounse khayalon mein tum khoye hue ho ?"

Akhil - "Nahi toh. Kisi bhi khayal mein nahi." 

Akhil Ka Dost - "Ghar ka koi tanaav hain kya ?"

Akhil 'Na' mein apna sar hilata hain.

Akhil Ka Dost - "Agar koi takleef ho toh bata do. Main tumhara saccha dost hoon. Baatein karte rehne se mann halka ho jaata hain."

Akhil - "Shukriya Bhai."

Phir dono apne kaam par lag jaate hain. Akhil kaam toh kar raha tha, par uska mann kaam mein bilkul nahi lag raha tha. Use baar-baar apne Pita ki chinta khaaye jaa rahi thi. Woh baar-baar bas ek hi baat soch raha tha, ki is tarah se uske pita ka Call aana koi aam baat nahi hain. Kahi yeh vaakya, bhavishya ki koi khatre ki ghanti toh nahi hain.

Kaam karte-karte shaam ho jaati hain. Aaj Akhil ko shaam hone ka badi besabri se intezaar tha. Woh jald se jald apne ghar pohuchna chahta tha. Kyunki, ghar pohuchne ke baad hi, Akhil ko asal baat ka pata lag paata.

Akhil apni motorcycle tezz dauda raha tha. Woh bohut vyaakul tha. Woh jaise-jaise ghar ke nazdeek pohuch raha tha, waise-waise uski vyaakulta badhti jaa rahi thi. Ek saath kayi khayaal uske mann mein gadhte jaa rahe the. Woh apni Bike behad tezz gati se chala raha tha. Phir bhi uske chehre par paseena aa raha tha. Woh apne pita ke baare mein, behad chintit tha. Kuch der baad, aakhir kaar Akhil apne ghar pohuch gaya.

Ghar ka darwaaza khula hua tha. 

Ghar pohuchte hi, Akhil ne paaya ki, uske pita takhte par baithe hue hain. Baithe hue bhi kya, aadhe lete hue the. Unhe shayad neend lag gayi thi. Woh jhapki maar rahe the. Farsh par kitaab padi hui thi. Shayad woh kitaab padh rahe ho, aur kitaab padte-padhte unhe neend lag gayi ho.

 Woh dabe paav apne pita ke nazdeek gaya. Woh halki aawaz mein kharaate maar rahe the. Akhil ne pita ka chehra zara dhyaan se dekha. Unke chehre par halki si jhurriyan aa chuki thi aur unke aankhon ke nazdeek kaale daag bhi ab dikhne lag gaye the.

Woh yeh baat samajh chuka tha ki, ab uske pita kar umar ka prabhaav padna shuru ho chuka hain. Akhil ne us kitaab ko uthaya aur usne us kitaab ko nazdeek par pade hue table par rakh diya.

Tabhi Akhil ki Maa Hall mein aati hain. Akhil ko dekh kar woh muskurati hain aur Akhil bhi muskurata hain. Woh behad dheemi aawaz mein apni Maa se puchta hain, "Aaj Papa ki tabiyat kharab hain kya ?"

Akhil Ki Maa - "Nahi toh."

Akhil - "Aaj jab main office mein tha, tab achaanak se Papa ka Call aa gaya tha. Woh bhi subah-subah. Aur ab main yahan ghar aakar dekh raha hoon, ki Papa is tarah se soye hue hain. Kahi Papa behosh toh nahi ho gaye the ?"

Akhil Ki Maa - "Aisi koi baat nahi hain."

Akhil - "Phir kya baat hain Mummy ?"

Akhil Ki Maa - "Ab umar ho chuki hain na beta. Bas umar ka asar hain."

Akhil kuch nahi kehta hain. Phir Akhil Ki Maa aage kehti hain, "Beta tum haath-muh dho lo, main khaana laga deti hoon."

Akhil bathroom jaata hain aur apne haath-muh dhota hain. Phir woh apne kapde badalkar, Hall mein aata hain aur woh apne maata-pita ke saath baith kar khaana khaata hain. Khaana khaane ke baad, woh apne kamre mein jaata hain. 

Apne kamre ke andar pohuch kar, Akhil kamre ka darwaaza andar se band karta hain. Phir woh ek rajaai uthata hain aur kamre ki batti band karta hain. Uske baad, woh bistar par jaakar let jaata hain aur rajaai apne upar bicha deta hain. 

Akhil leta hua tha aur kuch der ke liye, woh kuch soch-samajh nahi paa raha tha. Kuch pal ke liye, Akhil ko aisa mehsus hua, maano uski sochne-samjhne ki shamta hi samapt ho chuki ho. Kuch pal ke baad, Akhil ka dimaag sthir hua. Akhil ke Dimaag mein sabse pehla khayal bas yahi aaya, 'Papa ki ab umar ho chuki hain. Papa ka ab behad khayal rakhna hoga.'

Woh aage sochta hain, 'Ab mujhe koi Business plan tayyar karna hoga. Bhagwaan na kare, agar kal ko koi anhoni ho jaaye; tab main kya karunga ? Agar kal ko koi musibat aa pade, tab kya hoga ? Waise bhi, bura waqt bata kar toh kabhi nahi aata hain.'

Yeh sochte hi, Akhil thoda seham sa gaya tha. Kuch der ke liye, woh daraa hua tha. Tabhi Akhil ke zehan mein khayal aata hain, 'Ab mujhe bohut himmat se kaam lena hoga. Ab mujhe bohut samajhdaari se kaam karna seekhna hoga aur mujhe har ek kadam bohut phonk-phonk kar rakhne ki zaroorat hain. Mujhe koi aisa kaam shuru karna hoga, jo ki na sirf mujhe accha munaafa kama kar de; balki, woh vyapaar bhavishya mein bhi tikaaun saabit ho.'

Akhil apne is soch mein aur gehrayi mein chala jaa raha tha. Lekin, woh yeh nahi samajh paa raha tha ki aakhir woh koi kaam shuru kare, toh kya kare ? Aakhir aisa kounsa kaam hoga, jo ki use accha munafa kama kar dega. 

Kuch der baad, Akhil ko neend lag jaati hain. Agle din, subah uthkar woh tayyar hota hain aur apne office ke liye nikal jaata hain. Shaam mein woh office se jab ghar aa raha hota hain, tab uski nazar ek Chai ki tapri par padti hain. Us tapri ko dekh kar, Akhil sochta hain, 'Yeh bhi toh ek tarah ka vyapaar hi hain. Waise bhi vyapaar kisi bhi tarah ka ho, shuruaat toh hamesha choti hi hoti hain.'

Usi samay, Akhil ko yaad aaya ki bachpan mein woh apne society ke baccho ke baal mazaak-mazaak mein kaant diya karta tha. Tabhi uske zehan mein ek khayal aaya, 'Kyun na main haircut ka kaam karun ? Aur agar main online tutorials banaun toh ? YouTube Channel shuru kar doon kya main ?'

Ab Akhil ko aage ka raasta saaf dikhne lag chuka tha. Woh apne society ke logon se darkhaast karta hain ki, ab se Society mein jise jab bhi apne baal kantwaane ho, toh woh usi se kantwaaye. Society ke log bhi uska saath de dete hain. Shuruat mein zyadatar logon ne, Akhil ke is idea ko bas ek betuka soch bataya aur use samjhaaya ki, uska yeh idea kabhi bhi kaamyaab nahi hoga. Kai logon ne uska uphaas bhi udaaya. Lekin, woh duniya ki sabhi baaton ko nazar-andaaz kar, bas apne kaam par dhyaan deta tha.

Woh sabke baal kaantte hue, videos banata aur use YouTube par upload kar deta. Dekhte-Dekhte uska Channel mashoor hone lag gaya. Kyunki, Akhil apne har video ki shuruaat mein hi apna naam aur shehar bata diya karta tha is wajah se uske shehar ke kai log, apne baal kantwaane ke liye; Akhil ke ghar aana shuru kar diye. Usne sabhi ko apna Contact Number bhi de diya aur unse guzaarish ki, ki woh log apne doston ko bhi is baare mein bataye. 

Dekhte Hi Dekhte, kuch hi mahino mein hi Akhil ke paas grahakon ki badhotri hui. Woh din mein naukri karta aur shaam mein, logon ke baalon ko ek accha sa stylish roop dekar; kuch extra paise kamaa leta. Dheere-Dheere, Akhil shehar mein mashoor hone lag chuka tha. Waqt ke saath, Akhil ke grahakon mein badhotri hui aur uski aamdani bhi badhi. 

Akhil ki mehnat aur tarakki dekh kar, Akhil ke pita ne use loan lekar khud ka salon kholne ka sujhaav diya. Akhil ko yeh sujhaav bohut pasand aaya aur dono baap-bete bazaar mein loan ke baare mein jaankariyan ikattha karna shuru kar diye. Akhil ke pita ki soch jitni shaandaar thi, utni hi mushkil bhi thi.

 Kai jagah unhone karz ke liye  baat ki. Lekin, yeh raasta Akhil ke liye aasaan nahi tha. Kai jagah, use baad mein soch-vichaar karke bataaya jaayega keh kar, baad mein phone par manaa kar diya jaata; toh kai jagah Akhil ko muh par hi karz dene ke liye manaa kar diya jaaya karta tha. 

Kai mahino ke sangharsh ke baad, aakhir mein ek Bank Akhil ko loan dene ke liye raazi hua aur jaise-taise usne apna khud ka Salon khol diya. Salon kholte hi, woh apni naukri chod diya tha. Akhil ne apne ghar ke nazdeek hi apna Salon khol diya tha. Taaki agar uske pita ki tabiyat dobara bigad jaaye, tab woh aasaani se aur samay par apne ghar pohuch sake. Is Salon par, Akhil ne bohut mehnat ki thi. Saath Hi Saath, woh apne YouTube channel par, naye-naye Videos bhi samay-samay par upload kar deta. 

Ab woh apne is vyapaar se bohut accha kamaa leta hain. Mahine ka kareeb dedh-do laakh rupaye uski aamdani ho hi jaati hain. Akhil har teesre mahine apne maata-pita ka full body test karwaata aur aashwast ho jaata unki sehat ke baare mein. 

 Acchi kamaayi hone ki wajah se, ab toh Akhil ne apne ghar ko behad acche se renovate bhi karwa diya. Usne apne ghar ko behad shaandaar tareeke se sajaaya hain. Jo bhi Akhil ke Ghar ka nayaa roop dekhta, woh uski tareef karte nahi thakta. Kai log jitni zyada Akhil ke ghar ke naye roop-rekha ki tareef karte, utni hi zyada Akhil ke mehnat aur uski samajhdaari ki bhi tareef karte. 

Ghar ka poora naksha hi badal chuka hain aur saath hi saath is parivaar ki zindagi bhi behatar ho gayi hain. Akhil ne aaj bhi YouTube par apne videos daalna band nahi kiya. Shayad isi wajah se, Akhil logon tak pohucha hain aur shayad uske videos ke wajah se hi, uske Salon par graahakon ki tezz badhotri hui hain. 

Uski videos dekh kar, kai naye logon ko bohut kuch seekhne ko bhi mil jaaya karta hain. Kai log, comments ke dwaara apne sawaal Akhil tak pohuchte aur un logon ki jigyasa poori karne mein, Akhil ko apne vyapaar ko aur behtar banane ke ideas aa jaate hain. Aaj Akhil ke maata-pita ko apne ladke par bohut naaz hain.

                  - Ved Vineet Gautam