Aapda

 Nikhil Taneja peshe se ek vyapaari hain. Unki patni ka naam, Sujata Taneja hain. Un dono ke do bacche hain. Ek ladka aur ek ladki. Ladke ka naam, Rahul Taneja hain aur ladki ka naam,  Reena Taneja hain. Rahul aur Reena, dono ki padhaayi poori ho chuki hain aur ab Rahul, Nikhil ke saath vyapaar mein uska haath bantata hain. 

Ek din ki baat hain. Poora parivaar saath mein baitha hua tha. Woh log aapas mein baat-cheet kar rahe the.

Tabhi baat-cheet karte-karte, Nikhil kehta hain, "Main aap logon se ek baat kehna chahta hoon."

Sabhi log Nikhil ki aur dekhte hain. Nikhil kehta hain, "Maine Reena ke liye ek ladka dekha hain."

Yeh baat sunkar sabhi log behad khush ho jaate hain. 

Nikhil aage kehta hain, "Ladka ek private company mein Manager hain aur sabse acchi baat yeh hain, ki woh isi shehar mein hi rehta hain."

Sujata - "Are Vaah. Tab toh aap us ladke ko bohut hi acche se jaante honge ?"

Nikhil - "Nahi. Main haal hi mein us ladke se mila hoon. Darasal woh ladka kuch mahino pehle hi is shehar mein shift hua hain."

Rahul - "Papa yeh ladka is shehar mein akela rehta hain ya apne parivaar ke saath. Woh apne parivaar ke saath hi rehta hain. Bohut chota sa parivaar hain us ladke ka. Ghar mein bas uske maata-pita hain aur woh iklauta ladka hain un dono ka."

Sujata Reena ki aur dekh kar kehti hain, "Meri beti toh Raaj karegi us ghar mein jaakar."

Reena sharma jaati hain. 

Phir Nikhil Reena se kehta hain, "Beta yeh log behad seedhe aur suljhe hue log hain. Bohut chota sa Parivaar hain unka. Us Parivaar ki khushiyan tumhare haathon mein hogi. Bohut pyaar se apna sansaar sajana tum beta aur sabke saath bohut sneh aur lagaav se rehna tum."

Reena - "Zaroor Papa."

Rahul - "Toh Papa hume un logon se kab milna hain ?"

Nikhil - "Agle hafte hi."

Sujata - "Chalo Badhiya hain."

Dusre din se hi, ghar ke sabhi sadasya agle hafte ki hone wali mulaakaat ki tayyariyon mein jut jaate hain. 

Woh log dher saari kharidaari karte hain aur ghar ko khoob sajate bhi hain. Reena ke liye, kuch naye kapde bhi kharide jaate hain. 

Ghar ke har sadasya mein, us mulaakaat ke liye utsaah aur ummeed thi. Har koi us anjaan parivaar se milne ke liye betaab tha. Ek baar, ghar walon se baat karte-karte, Sujata ne yeh bhi keh diya ki, "Na jaane kyun, par mujhe aisa lagta hain. Aur sirf lagta hi nahi hain, balki, mera Dil keh raha hain ki, hamari beti ke bhaagya shayad isi parivaar se jude hue hain."

Sujata ke Dil se nikli hui yeh aawaz ki ghar ke har sadasya ne kadr ki aur un sabhi logon ko Sujata ki yeh bhaavna, behad pasand aayi.

Dekhte Hi Dekhte, mulaakaat ka din aa hi gaya. Dono  parivaar aamne-saamne baithe hue the. Un dono parivaaron ke beech baat-cheet shuru hui. Ladke ka naam, Nishant Khanna hain aur us maata-pita ka naam, Rakesh Khanna aur Sunita Khanna hain.

Tabhi Nikhil Rakesh se puchta hain, "Bhaisahab aap log is shehar mein kab shift hue hain ?"

Rakesh - "Bas ek saal pehle hi."

Nikhil - "Accha aur uske pehle kaha par rehte the aap log ?"

Rakesh - "Hum log Aligarh mein raha karte the. Nishant Aligarh mein hi pala-bada hain. Uski padhaayi bhi wahi par poori hui hain. Phir hamare ladke ko is shehar mein naukri mil gayi. Company ke taraf se hi flat bhi mila hain. Toh hum log ab yahi par reh rahe hain."

Nikhil - "Is shehar ka hawa-paani aapko kaisa laga ?"

Rakesh - "Bohut hi badhiya laga. Haan Aligarh ki bohut yaad aati hain. Wahan humne apna itna waqt beetaya hain. Hamari saari zindagi, us shehar ki chatra-chaaya mein guzri hain.

Lekin, sach kahun toh, yeh shehar hume bhaa chuka hain. Aur ab dheere-dheere, yahan ke log bhi pasand aa hi rahe hain."

Nikhil hans padta hain. Phir Sujata, Nishant se kehti hain, "Beta aap kuch lo na. Aap toh kuch khaa hi nahi rahe ho."

Nishant muskurate hue, jawab deta hain, "Nahi aunty. Thank You."

Rakesh - "Are Bhai jawaan ladke ho. Acche se khaaya-peeya karo."

Tabhi Sunita, Nishant se kehti hain, "Badon ki baat kaatni nahi chahiye beta. Aunty keh rahi hain, toh kuch le lo."

Nishant ek biscuit utha ta hain aur khaata hain. Phir Nikhil, Nishant se puchta hain, "Beta aapka aage ka kya plan hain ?"

Nishant - "Filhal toh bas isi naukri mein mera poora focus hain uncle. Yeh nayi-nayi naukri hain toh, abhi saal do-saal baad aage ka sochunga Uncle."

Nikhil - "Yeh bhi sahi baat hain beta."

Un dono parivaaron ke beech dher saari baatein hoti hain. Kaafi waqt tak baat-cheet karne ke baad, Nikhil Rakesh se puchta hain, "Bhaisahab. Toh aapne kya socha hain ?"

Rakesh jawab deta hain, "Bhaisahab yeh hamare dono bacchon ki zindagi ka sawaal hain. Toh agar aapki ijaazat ho, toh yeh faisla bhi hum un dono par chod dete hain."

Nikhil - "Main bhi aapke is vichaar se sehmat hoon Bhaisahab."

Rakesh - "Agar aapki ijaazat ho, toh yeh dono bacche agar akele mein kuch der baat-cheet kar sake toh... ?"

Nikhil - "Haan zaroor. Kyun nahi."

Sujata, Reena aur Nishant ko apne saath, andar ke ek kamre mein lekar chale jaati hain aur unhe wahi par akela chod aati hain.

Dono andar kamre mein, kuch der aapas mein baat-cheet karte hain. Phir woh dono saath mein bahar aate hain. Un dono ko dekh kar sabhi muskurate hain. Phir Nikhil puchta hain, "Toh beta, kya tay kiya hain aap dono ne ?"

Nishant - "Meri taraf se haan hain Uncle."

Phir Sujata Reena se puchti hain, "Beta tum batao. Tumhari kya iccha hain ?"

Reena - "Meri bhi haan hain Mummy."

Phir Nikhil Rakesh se puchta hain, "Aapki aur Bhabhi ji ki kya rai hain, Bhaisahab."

Rakesh Sunita ki aur dekhta hain aur puchta hain, "Tumhari kya iccha hain ?"

Sunita - "Main toh is ladki ko dekhte hi, mann-hi-mann apni Bahu maan chuki thi."

Sabhi log hans padte hain.

Phir Nikhil, Rakesh ki se puchta hain, "Toh Bhaisahab. Kya yeh rishta hum tay samjhe ?"

Rakesh - "Bhaisahab ab aapki beti, hamare ghar ki laadli Bahu ban chuki hain."

Nikhil - "Shukriya Bhaisahab."

Rakesh - "Aapas mein shukriya kaisa."

Nikhil - "Toh Shaadi kab karani hain ?"

Rakesh - "Woh aap tay kariye."

Nikhil - "Ladki ka baap hoon. Meri toh yahi iccha hain ki, Shaadi dhoom-dhaam se ho. Toh agar mujhe che mahino ki mohalat mil jaati toh accha hota."

Rakesh - "Bas che mahine ki hi toh baat hain. Uske baad, Reena aapke liye parayi ho jaayegi samdhiji."

Nikhil ki aankhein bhar aati hain aur uske chehre par muskaan bhi thi. Yeh khushi ke aansun the.

Shaadi ki tayyariyan shuru ho jaati hain. Dono parivaar behad utsaah ke saath  tayyariyon mein jut jaate hain. 

Dekhte Hi Dekhte, Shaadi ka shubh avsar aa jaata hain. Reena aur Nishant ka vivah, behad dhoom-dhaam se hoti hain.

Reena Bahu bankar, us ghar mein jaati hain aur kuch dino mein hi, woh us ghar ke sabhi sadasyon ke saath ghul-mil jaati hain. Woh log bhi Reena ko, behad sneh ke saath rakhte hain.

 Sab kuch thik chal raha tha. Shaadi ko ab ek saal beet chuka tha. Ek din ki baat hain. Reena rasode mein kaam kar rahi thi. Tabhi achaanak se uska phone baja. Woh apna phone uthayi aur dekhi ki, Sujata ka call aaya hain. Woh call uthati hain aur muskurate hue kehti hain, "Haan Namastey Mummy."

Sujata behad dheemi aawaz mein kehti hain, "Kaisi ho Reena ?"

Reena - "Main thik hoon. Aap kaisi ho ?"

Sujata - "Thik hoon."

Reena - "Aapki aawaz ko kya hua hain Mummy ?"

Sujata - "Kuch bhi toh nahi."

Reena - "Aap thik lag nahi rahi ho Mummy."

Sujata - "Aisi baat nahi hain."

Reena - "Phir aapki aawaz mein itna dard kyun hain Mummy ?"

Sujata - "Darasal Rahul ka accident ho gaya hain aur woh aspataal mein bharti hain."

Yeh baat sunkar, Reena ke pairon tale se zameen khisak jaati hain. Woh Sujata se puchti hain, "Kab hua accident ?" Reena ki aawaz mein ghabrahat thi. 

Sujata - "Do din pehle."

Reena - "Aur kaise hua yeh sab ?"

Sujata - "Woh apne office se aa raha tha. Shaam mein tezz barsaat ho rahi thi. Uski Bike phisal gayi."

Yeh sab sunkar, Reena behad chintit ho gayi. Usne gas par kadhaayi rakhi hui thi aur kadhaayi tel se bahara hua tha. Woh Sujata se baat-cheet kar rahi thi aur Rahul ki tabiyat ke baare mein aur bhi zyada jaankari haasil karne ki koshish kar rahi thi. 

Sujata Reena ko Rahul ke baare mein batati gayi aur Reena ki ghabrahat badhti gayi. Woh gas aur kadhaayi ke nazdeek toh thi hi. Woh itna ghabra chuki thi ki, woh yeh baat bhool chuki thi ki woh gas ke nazdeek khadi hain aur dukh mein Reena ka haath gas par zor se pada. Jis wajah se kadhaayi ulat gayi aur kadhaayi ka saara garam Tel, Reena ke upar aa gira. Reena ko turant aspatal mein bharti karaya gaya.

Ek aur Rahul accident ke wajah se apni aakhri saansein gin raha tha, toh wahi dusri aur Reena bhi zindagi aur maut se apni jung lad rahi thi. Uska poora sharer bohut buri tarah se jhulas chuka tha.

Dono parivaar par ek saath dukh ka pahaad toot chuka tha. Woh log behad peeda se guzar rahe the. Aspatal mein ilaaj karane aur upar wale se prathana karne ke alaawa un logon ke paas aur koi raasta bhi nahi tha. Aakhir woh log karte bhi toh kya kar paate ? 

Kaafi dino tak dono Bhai-Behen ka ilaaj chala. Dher saara paisa kharch bhi hua.  Ek saath dono parivaar par dukhon ka pahaad toot pada tha. 

Sabhi ne poore sacche mann se prathanayein ki. Lekin, kismat ko shayad kuch aur hi manzoor tha. Upar wale ne unki prathna nahi suni. 

Ek mahine baad, Rahul ne apna dum tod diya. Nikhil aur Sujata bohut roye. Unki aankhon se aansun behte nahi ruk rahe the. Khaas kar, Sujata toh bohut phoont-phoont kar royi. Rakesh, Sunita aur Nishant un dono ko sambhaalne ki poori koshish kar rahe the. Rahul ki maut se woh log bhi bohut dukhi the. 

Lekin, zindagi ne aage bhi takleefe hi likhi thi. Rahul ko guzare ek hafta ho chuka tha aur woh log uske dasve ki tayyariyan kar rahe the. Tabhi, Doctors ne Reena ke liye bhi jawaab de diya. Reena bhi apni antim saans tod chuki thi. Na jaane kis janam ka badla, bhaagya le raha tha  Nikhil aur Sujata se ki unke dono aankhon ke taare ek jhatke mein apni zindagi se haath dho baithe. 

Rakesh, Sunita aur Nishant ne kuch dino ke liye, un dono ke saath rehne ka faisla kiya. Woh teeno un teeno ke ghar chale gaye aur unka khayal rakhne lage. Lekin, is dauraan sab log yeh baat poori tarah se bhool chuke the, ki Nishant ne apna jeevan saathi khoya hain. Bas kuch hi waqt pehle hi toh Shaadi hui thi us naujawan ki. Ladka hi toh tha woh. 

Nishant behad gumgin ho chuka tha. Woh kisi se bhi kuch nahi kehta tha. Woh har kisi se, apni baat-cheet band kar chuka tha. 

Woh kaam par waqt se jaata-aata tha. Lekin, woh khaamosh ho chuka tha. Woh maasoom ladka, muskurana bhool chuka tha. 

Ek shaam ki baat hain. Dono parivaar saath mein baithe hue the. Sabhi log khaamosh the. Nishant apni kursi se utha aur kisi se bina kuch kahe, bahar chala gaya. Na kisi ne use roka, na hi kisi ne use toka. 

Kuch der baad, Sunita ne kaha, "Kaafi der ho chuki hain. Andhera hone ko hain. Nishant ka abhi tak koi ataa-pataa bhi nahi hain. Ek baar use Call karke yeh toh puch lijiye ki woh kaha par hain. Bhagwaan na kare agar, kahi use kuch ho gaya toh ?"

Nikhil Nishant ko Call lagata hain. Nishant call uthata hain. 

Nikhil - "Kaha par ho beta ?"

Nishant - "Main ghar par hoon Papa." 

Woh sharab ke nashe mein tha aur yeh baat, Nikhil samajh chuka tha. 

Nikhil - "Tumhare ghar ka pataa toh bata do beta."

Nishant saamne se guzarte hue waiter ko bulata hain aur use phone pakdate hue kehta hain, "Are Bhai yahan ka pataa batao zara."

Waiter Nikhil ko address batata hain. Phir Nikhil apni Car ki Chaabi uthata hain. Tabhi Sujata Nikhil se puchti hain, "Kaha hain hamara ladka ? Kahi woh kisi musibat mein toh nahi hain ?"

Nikhil - "Musibat ka ek nayaa pahaad dastak de chuka hain hamari zindagi mein."

Nikhil ke aankhon se aansun chalak padte hain aur woh Nishant ko lene ke liye nikal padta hain. 

                  - Ved Vineet Gautam