Buniyad

 Nirvaan Sipani ek company mein naukri karta hain. Company mein uski ek dost hain. Us dost ka naam, Anjum hain. Anjum Kumar. Nirvaan aur Anjum ke beech halki-phulki dosti hain. Kai baar dono saath mein hi lunch karne ke liye jaate. 

Ek din ki baat hain. Kaam poora karke Nirvaan parking lot mein gaya, apni Bike nikaalne ke liye. Woh Bike lekar bahar nikal hi raha tha, ki achaanak se baarish shuru ho gayi. Woh socha ki woh dheere-dheere gaadi chalakar, apne ghar tak pohuch jaayega. 

Lekin, jab tak woh Company ke main gate tak pohuncha, tab tak barsaat bohut tezz ho chuki thi. Us barsaat mein safar karna, bohut mushkil tha. Woh apni bike ghumakar wapas apne office ke parking mein aa gaya.

 Tezz barsaat ke wajah se mausam thoda thanda ho chuka tha. Jab tezz barsaat ho rahi ho, thandi hawaayein chal rahi ho aur aadmi khaali baitha ho, us waqt aadmi ko bas do hi cheezon ki zaroorat hoti hain. Ek Cup Chai aur ek Cigarette.

 

Nirvaan ko bhi, us waqt Cigarette ki zaroorat mehsus ho rahi thi. Usne apni jeb se Cigarette aur Lighter nikaala aur Cigarette jalaayi. Phir woh ek kash Cigarette kheecha. Kaafi deri ke baad, woh Cigarette pee raha tha. Pehla kash lete hi, usi aankhein band ho gayi. Use thoda aaram mehsus ho raha tha. Tabhi use ek aawaz sunaayi di, "Aah Ha. Kitna sukoon mil raha hain na ?"

Yeh sunte hi, Nirvaan ki aankhein khul gayi aur woh dekha ki bagal mein hi, Anjum khadi thi. Woh Anjum ko dekh muskuraya. Anjum aage boli, "Saamne hi ek ladki khadi hain aur phir bhi Cigarette haath se chuth nahi rahi hain. Bade hi sharif ladke ho."

Yeh sunkar, Nirvaan apni Cigarette bhuja deta hain. Phir Anjum kehti hain, "Bohut-Bohut shukriya tumhara. Badi meherbaani ki tumne."

Nirvaan - "Tum abhi tak ghar nahi gayi ?"

Anjum - "Ji Nahi. Ek bhatke hue ladke ko sahi raasta jo dikhaana tha."

Nirvaan hans padta hain. 

Anjum - "Accha thik hain. Ab main chalti hoon."

Nirvaan - "Are Bhai kaha ?"

Anjum - "Ghar jaana hain. Deri ho rahi hain."

Nirvaan - "Thik hain."

Anjum - "Tum toh ghar apna yeh bohut important kaam khatam karke hi jaaoge ?"

Nirvaan hans padta hain aur 'Haan' mein apna sar hilata hain. 

Anjum chali jaati hain. 

Agle din, dono daftar mein milte. 

Nirvaan - "Hi Anjum."

Anjum - "Hi Nirvaan."

Nirvaan - "Kaisi ho tum Anjum ?"

Anjum - "Main thik hoon. Tum kaise ho ?"

Nirvaan - "Bas thik hoon."

Anjum - "Aaj Lunch Time par Canteen mein milna. Do-Teen din se hum dono saath mein Lunch nahi kiye."

Nirvaan - "Thik hain."

Dono apne-apne desk par chale jaate hain aur kaam par lag jaate hain.

Kuch der baad, Lunch ka waqt ho jaata hain aur vaade ke mutaabik, Nirvaan Canteen mein thik samay par pohuch jaata hain. Canteen pohuchte hi, uski nazar Anjum ko dhoondh rahi hoti hain. Woh yahan-wahan apni nazar daudaata hain. Tabhi use Anjum ek kone mein baithi nazar aati hain. Dono ki nazarein milti hain aur dono ek dusre ko dekh kar muskurate hain. 

Nirvaan Anjum ke paas jaata hain aur woh use apne saamne baithne ka ishaara karti hain. Nirvaan uske saamne baith jaata hain.

Dono ek dusre ko dekh kar dobara muskurate hain. Phir Anjum kehti hain, "Kya loge Nirvaan ?"

Nirvaan - "Yeh sawaal toh mujhe tumse karna chahiye."

Anjum - "Lekin yahan tumhe maine bulaya hain. Toh yeh sawaal bhi main hi karungi."

Nirvaan - "Hmm. Yeh bhi sahi hain. Coffee ?"

Anjum - "Thik hain."

Anjum do Cup Coffee order karti hain. Dono ek dusre se baat-cheet shuru karte hain. 

Anjum - "Toh batao, tumhare ghar mein sab kaise hain ?"

Nirvaan - "Sab thik hain aur tumhare ?"

Anjum - "Sab badhiya. Aur batao, kya chal raha hain zindagi mein ?"

Nirvaan - "Bas ghar se office. Office se ghar. Har roz ka ek hi chakkar."

Anjum - "Hmm."

Nirvaan - "Tum apna haal batao."

Anjum - "Bilkul tumhare jaisa. Bas isi ek Circle mein gol-gol ghume jaa rahi hoon. Aisa lagta hain jaise ki, zindagi ke jaal mein giraft ho chuki hoon."

Nirvaan - "Toh is kaid se aazad ho jaao."

Anjum - "Haan. Woh toh karna hi hain."

Nirvaan - "Kaise ?"

Anjum - "Is Saturday main soch rahi hoon, ki main koi movie dekhne ke liye jaaun."

Nirvaan - "Bhai Vaah. Yeh toh bohut hi badhiya plan hain. Waise akele ya kisi dost ke saath ?"

Anjum - "Haan soch rahi hoon ki apne ek dost se is baare mein baat kar loon. Agar woh tayyar ho jaata hain, toh waqt bohut accha kat jaayega."

Nirvaan - "Toh apne us dost se jaldi baat kar lo. Kahi aisa na ho ki, Saturday ke liye, uska koi dusra plan ban jaaye."

Anjum - "Filhal toh main free bhi hoon. Toh kyun na main apne us dost se abhi baat kar loon."

Nirvaan - "Yeh bhi badhiya khayal hain."

Anjum apni jeb se phone nikaalti hain aur kuch message type karti hain. Phir woh apna phone rakh deti hain. 

Nirvaan - "Call nahi kiya tumne use ?"

Anjum - "Nahi. Woh busy hoga."

Tabhi Nirvaan ko mehsus hota hain ki uske phone par koi message aaya hain. Woh apna phone bahar nikaalta hain aur dekhta hain ki, Anjum ka message aaya hain. 

Nirvaan - "Tumne toh mujhe message kiya hain."

Anjum - "Galti se aa gaya hoga. Kam Se Kam message toh padh lo."

Nirvaan message kholta hain aur padhta hain. Us message mein likha hota hain, 'Hi Nirvaan. Kya tum is weekend mere saath movie dekhne ke liye chaloge ? Agar tum free ho toh ?'

Woh message padh kar Nirvaan muskurata hain aur woh Anjum ki aur dekh kar kehta hain, "Haan. Main zaroor chalunga tumhare saath."

Anjum muskurati hain aur kehti hain, "Thank You."

Uske baad dono wapas apne kaam par chale jaate hain. Dekhte Hi Dekhte, poora hafta nikal jaata hain aur Shanivaar aa jaata hain.

 

Nirvaan bohut acche se tayyar hota hain. Woh deodorant bhi lagta hain aur apni bike par baith kar, Cinema Hall ke liye nikal padta hain. Kuch der baad, woh Cinema Hall pohuch jaata hain. Woh dekhta hain ki, Cinema Hall ke bahar Anjum baithi hui hain. Woh pehle se hi, Nirvaan ka intezaar kar rahi thi. 

Nirvaan Anjum ke paas jaata hain aur woh dono ek dusre ko dekh kar muskurate hain. Phir Nirvaan kehta hain, "Aisa pehli baar hua hoga, ki koi ladki waqt se pehle kahi par pohuch gayi aur woh bhi itne acche se tayyar hokar."

Anjum - "Aisa pehli baar hua hoga ki, kisi jagah par koi ladki; kisi ladke ka intezaar kar rahi ho aur ladka der se pohucha ho."

Dono hans padte hain. Phir Nirvaan tickets kharidta hain aur uske baad dono saath mein movie dekhte hain.

Kuch der baad, film ka interval hota hain. Dono saath mein bahar aate hain. 

Anjum - "Toh kaisi rahi Movie ?"

Nirvaan - "Acchi thi. Tumhe kaisi lagi ?"

Anjum - "Acchi thi."

Nirvaan - "Kahi baithe ?"

Anjum - "Thik hain."

Dono saath mein ek jagah par baith jaate hain. Phir Nirvaan kehta hain, "Aur baaki kya chal raha hain zindagi mein ?"

Anjum - "Sab kuch toh tumhare aankhon saamne hain."

Nirvaan - "Tum Shaadi kab kar rahi ho ?"

Anjum - "Dekhte hain. Papa-Mummy waise ladka toh dekh hi rahe hain. Ab tak unhe koi pasand nahi aaya hain."

Nirvaan - "Tum toh unke pasand se hi Shaadi karogi ?"

Anjum - "Bilkul."

Nirvaan - "Aur agar koi ladka tumhe pasand aa gaya toh ? Kya woh log raazi honge ?"

Anjum - "Ho toh jaane chahiye. Waise kya tumhe koi ladki pasand aayi ?"

Nirvaan - "Hmm. Lekin main yeh nahi jaanta hoon ki, uske Dil mein kya hain ?"

Anjum - "Ek baar us ladki se puch kar toh dekho."

Nirvaan - "Darr lagta hain."

Anjum - "Kis baat ka ?"

Nirvaan - "Pata nahi. Shayad kahi yeh dosti na toot jaaye."

Anjum - "Kisiki dosti ?"

Nirvaan ek lambi saans leta hain aur thoda ghabrate hue kehta hain, "Hamari dosti."

Anjum ki aur dekhti hain aur Nirvaan apni nazrein jhuka leta hain. Phir Anjum kehti hain, "Dekho Nirvaan hum dono bohut hi acche dost hain aur hamesha acche dost bane rahenge."

Nirvaan behad dukhi swar mein kehta hain, "Thik hain."

Anjum - "Lekin haan yeh baat bhi hain ki, acche dost bohut hi acche dampati bhi saabit hue hain."

Nirvaan hairaani se Anjum ki aur dekhta hain. Anjum muskurati hain aur Nirvaan ka haath pakadti hain. Phir woh behad dheemi aawaz mein kehti hain, "Tum mere Dil mein samaye hue ho."

Dono ek dusre ke haathon mein haath daal kar baithe hue hote hain. Woh pal un dono ke liye hi behad khaas tha. Mohabbat ka ehsaas toh dono ko ek dusre ke liye pehle se hi ho chuka tha. Par aaj dono ne ek dusre ko paa liya tha. Is pal ko woh dono jee rahe the. 

Ek din ki baat hain. Dono office mein mile aur Canteen mein saath jaa baithe. Tabhi Nirvaan ne apna mobile nikaala aur use table par rakh diya. Anjum ne us mobile ko uthaya aur pucha, "Password kya hain ?"

Nirvaan ne mobile ka password bataya. Anjum ne mobile ka slide button dabaya aur dekha ki phone ke screen par uski tasveer thi. Nirvaan ke mobile ke screen par apni tasveer dekh kar woh sharma gayi. 

Nirvaan ka haath table par pehle se hi tha. Anjum bhi apna haath table par rakh deti hain. Anjum ka haath table par aate hi, Nirvaan apna haath uske haath ki aur badhata hain. Yeh dekhte hi, woh apna haath table se hataa leti hain. Nirvaan dukhi ho jaata hain. 

Anjum behad dheeme aawaz mein kehti hain, "Hum is waqt office mein hain. Yahan hum romance kaise kar sakte hain ?"

Nirvaan - "Ismein duniya se kya chupana. Haan hume hadd mein hi rehna chahiye. Par hum dono jab ek dusre ko chahte hain, toh is baat ko logon se chupana kyun ?"

Anjum - "Tum nahi samjhoge. Tum toh ladke ho."

Nirvaan - "Anjum." 

Nirvaan ki aawaz mein zara gussa tha. 

Anjum bhi ab thoda gambhir ho jaati hain. Dono ek dusre ko dhyaan se dekhte hain. Phir Nirvaan kehta hain, "Har rishte ki buniyad vishwas par tiki hoti hain. Pehle tum mujhpar vishwas karna seekho."

Phir Nirvaan  jaakar Coffee le aata hain. Uske baad, dono Coffee peete hain. Lekin, dono khaamosh rehte hain. Woh dono ek dusre se ek Shabd bhi baat-cheet nahi karte hain. Coffee khatam hone ke baad, dono wapas office jaakar apna kaam dobara shuru kar dete hain. Kuch ghanto ke baad, daftar band ho jaata hain aur woh dono saath mein bahar aate hain. Is dauraan bhi woh dono bilkul khaamosh hi rehte hain. 

Phir woh dono ek kone mein khade ho jaate hain aur ek dusre ko dekhte hain. Tabhi Nirvaan kehta hain, "Shuruaat mein hi jhagda ho gaya."

Anjum - "Toh kya ab tumhe is rishte ka bhavishya nazar nahi aa raha hain ?"

Nirvaan - "Aisi baat nahi hain."

Anjum - "Phir ?"

Nirvaan - "Tum maano ya na maano, tumhe khone ka darr hain mujhe."

Anjum - "Toh tumhe kya lagta hain, kya mujhe yeh darr nahi satata hoga ?"

Nirvaan koi jawaab nahi deta hain. 

Anjum - "Tum khaamosh kyun ho ? Jawaab do."

Nirvaan - "Dekho agar hum ladenge-jhagdenge toh mujhe yeh darr hain ki, hamara yeh rishta ek dardnak mod par aakar apna dum tod dega."

Anjum - "Sirf rishta judna hi kaafi nahi hota hain Nirvaan. Us rishte ko nibhaana bhi padta hain. Aur har rishte mein nok-jhonk hoti hi rehti hain. Aapas mein behas bhi hoti hi rehti hain. Agar choti-moti baaton ko lekar itni aasaani se rishta tootne lage, toh is duniya mein ek bhi rishta tik nahi paayega."

Nirvaan - "Anjum main bas hamesha tumhe khush rakhna chahta hoon. Mujhe bas yeh darr hain ki agar kahi hamare beech zyada behas hui toh, kahi hum dono ek dusre ko kho na de."

Anjum - "Kya tumhe hamari mohabbat par yakeen nahi hain ?"

Nirvaan 'Haan' mein apna sar hilata hain. 

Anjum - "Phir ?"

Nirvaan - "Toh ab aage kya ?"

Anjum - "Ek kaam karte hain. Hum dono Shaadi kar lete hain. Phir uske baad saari zindagi ek dusre se ladte-jhagadte rahenge. Har roz ek dusre se muh phula kar baith jaayenge aur har roz ek dusre ko manayenge. Uske baad, agle din dobara jhagad lenge. Na ek dusre ko khone ka darr rahega aur na hi, rishta khatam hone ka darr satayega."

Nirvaan ki aankhein bhar aati hain aur Anjum apne purse se rumal nikaal kar use pakadti hain.

                  - Ved Vineet Gautam