Armaan Kumar ek private company mein naukri karta hain. Woh peshe se ek Accountant hain. Woh ek anaath hain. Darasal, Armaan ke maata-pita ek anaath the. Uske maata-pita ka poora bachpan ek anaathalay mein guzra tha. Jis wajah unka koi bhi parichit, parivaar ya rishtedaar nahi the.
Armaan ka is duniya mein uske maata-pita ke alawaa aur koi nahi tha. Maata-Pita ke guzarne ke baad, woh bhi ek anaath ban chuka tha. Woh apne jeevan mein behad akela pad chuka tha. Woh kaam par har roz jaata hain. Daftar mein sabhi log usse baat-cheet bhi karte hain. Lekin, zyadatar keval kaam ki hi baatein hoti hain. Bohut kam samay aisa hota hain, jab kaam ke alaawa dusri baatein hoti hain.
Daftar mein log, apne parivaar aur rishtedaaron ke baare mein jab baat-cheet karte, tab Armaan ke paas kehne ke liye kuch bhi nahi hota. Woh kehta bhi kya ? Use yeh bhi nahi pata ki is duniya mein uska koi rishtedaar hain bhi ya nahi. Armaan hi kyun, uske maata-pita tak apne kisi rishtedaar ko jaante tak nahi the.
Rishtedaari kya hoti hain, Armaan bachpan se hi is baat se bekhabar tha. Yeh baat kabhi-kabhi Armaan ka Dil dukha deti hain. Haan Society mein Armaan ki, logon se baat-cheet bhi hoti rahi hain. Society mein har kisi ke saath uska achaa rishta bhi tha. Lekin, jab woh apne kisi padosi ke yahan, unke kisi rishtedaar ko dekhta, tab unke chehre ki muskurahat; Armaan ko yeh ehsaas bhi dilaati thi, ki woh apne jeevan mein kitna akela hain.
Shaam ke waqt jab woh apne ghar mein akela hota hain, tab woh aksar balcony mein jaakar baith jaata hain aur woh dhalte hue Suraj ko behad dhyaan se dekhta hain.
Kabhi-Kabhi Armaan ke zehan mein yeh khayal aata hain ki, aaj is dhalte hue Suraj se puch hi loon, 'Aakhir koun hoon main ?' 'Mera wajood kya hain ?' 'Koun hain is duniya mein jise mere astitva se fark padta hain ?' 'Kya is duniya mein aisa koi nahi hain, jise meri maut ki khabar di jaaye ?'
Yeh saari baatein Armaan ko behad pareshan karti. Pehle toh maata-pita the, tab Armaan ko yeh baatein itna pareshan nahi karti. Woh shayad yeh baat bhool chuka tha, ki ek na ek din uske maata-pita bhi is duniya se chale jaayenge. Jab maata-pita zinda the, tab ghar mein thoda mann bhi lag jaata tha. Apne is chote se Parivaar se do-chaar baatein bhi ho jaaya karti thi. Lekin, ab Armaan ki zindagi mein aisa koi bhi nahi hain; jisse woh khul kar apne Dil ki baatein kar paaye.
Kai baar use andar hi andar apne maata-pita ki kami khalti hain. Armaan ko aksar apne maata-pita ke saath bitaaya hua waqt bohut yaad aata hain.
Aaj akelapan Armaan ka Dil jalaa raha tha. Kyunki, aaj 9 July hain. Aaj hi ke din, Armaan ke maata-pita Shaadi ke pavitra bandhan mein bandh gaye the. Jab maata-pita jeevit the, tab woh har saal apne maata-pita ki Shaadi ki saalgirah behad dhoom-dhaam se manaata tha. Bas aise hi kuch gine-chune khushi bhare pal the, jo Armaan ki zindagi mein thoda rang bhar dete the. Lekin, maata-pita ki mrityu ke baad; ab woh yeh sabhi choti-moti khushiyaan bhi kho chuka hain.
Ek shaam ki baat hain. Armaan apna kaam khatam karke daftar se dobara ghar laut raha tha. Woh aksar Bus se apne daftar aur ghar ka safar tay karta hain. Aaj bhi woh daftar se har roz ke samay par bahar nikla. Daftar ke bahar nikalte hi, Armaan ne aasmaan ki aur dekha. Aasmaan par halke kaale baadal the. Aaj mausam thoda badla-badla sa lag raha tha. 'Shayad barsaat hone wali hain.' Armaan ne socha.
Aasmaan par kaale baadal ki chaadar bichi hui thi. Jo dheere-dheere aur bhi gaadhi hoti jaa rahi thi. Armaan paidal Bus Stop ki aur chal pada. Har roz ke mukaabale, aaj Armaan thodi dheemi gati se chal raha tha. Woh is mausam ki khoobsurati ka nazaara dekhna chahta tha.
Kabhi woh aati-jaati gaadiyon ko dekhta, toh kabhi khoobsurat ped ko. Dheere-Dheere chalte hue, aakhir kaar; woh Bus Stop tak pohunch hi gaya.
'Toh aa hi gayi meri manzil.' Armaan ne socha. Ab bas, Armaan ko us Bus ka intezaar tha; jo ki use uske ghar tak pohuncha de. Woh Bus Stop par baithe-baithe aati-jaati hui gaadiyon ko dekh raha tha. Shaam ka waqt tha, jis wajah sadak thodi sunsaan thi.
'Yeh sadak aakhir kaha jaati hain ? Is sadak ki manzil kya hain ?' Armaan ne socha.
Ab woh apne khayalon ki duniya mein pravesh kar raha tha. Woh aage sochta hain, 'Kya is sadak ki koi manzil tay bhi hain ? Ya phir meri tarah bas dar-badar bhatakte rahegi yeh sadak bhi ?'
'Kya meri saari zindagi aise hi guzar jaayegi ?'
Tabhi sadak ki dusri aur, Armaan ko ek baccha dikhta hain. Jo kareeb, dus-baarah saal ka hi hoga. Woh apne haathon mein moongfali liye, sadak par bech raha tha.
Us bacche ko dekh kar, Armaan ko kabhi us bacche par naaz hota, toh kabhi use us bacche par daya aati.
Tabhi Armaan ke zehan mein ek khayal aaya, 'Aakhir is bacche ki kahani kya hogi ?' 'Kahi kisi dusre chauraahe par ya phir isi sadak ke kisi aur is bacche ke maata-pita bhi shayad moongfali bech rahe ho.'
'Ya kya pata, yeh baccha bhi meri tarah ek anaath hi ho.'
Us bacche ko dekh kar Armaan uske jeevan ki daastaan jaan na chahta tha.
Ek pal ke liye, Armaan ka Dil kiya ki woh us bacche ke paas jaaye aur usse jee bhar ke baatein kare. Lekin, phir usne socha ki aakhir woh baccha kya sochega ? Us bacche ko kaise lagega ? Woh baccha aakhir kis tarah se pratikriya dega ?
Bas yahi soch kar woh wahi par baitha raha. Lekin, Armaan ka mann ab bhi us bachhe se baat karne ka kar raha tha. Woh ab bas isi kashmakash mein tha ki woh us bacche ke paas jaaye, ya na jaaye. Tabhi na jaane Armaan ke dimag mein kya aaya, woh Bus Stop se utha aur tabhi, ek Bus uske saamne aa khadi hui. Woh Armaan ke ghar ki aur jaane waali hi Bus thi.
Armaan ne apne aap se kaha, 'Chalo shaam ke musaafir apni aakhri manzil ki aur.'
Woh Bus ke andar jaakar baith jaata hain. Bus chal padti hain. Armaan khidki wali seat par baitha hua tha. Woh sadak par aati-jaati hui gaadiyon ko dekh raha tha. Dekhte-Dekhte Armaan ka stop aa chuka tha. Woh Bus se utar ta hain aur Bus apni nayi manzil ki aur nikal padti hain.
Mausam ab bhi khoobsurat tha. Aasmaan ko kaale baadal ab bhi ghere hue the. Tabhi Armaan ki nazar ek dukaan par padi. Armaan ke mann mein na jaane kya aaya, woh us dukaan mein gaya aur waha jaakar usne ek Ice Cream kharidi. Aaj us bacche ko dekh kar, shayad Armaan ke andar chupa hua baccha nikal aaya tha. Us bacche ka maasoom chehra dekh kar, shayad aaj Armaan ko apna bachpan yaad aa gaya. Shayad isi wajah se usne Ice Cream kharidi. Woh Ice Cream lekar apne ghar chala gaya.
Ghar ke andar pohuchte hi, usne darwaaza behad dheere se band kiya. Phir woh muda aur apne ghar ko ek tuk dekhta raha. Aaj use apna hi ghar paraaya nazar aa raha tha. Aaj us ghar mein pada hua ek-ek saamaan ko maano aankhein aa gayi ho. Jaise ki us ghar ka ek-ek saamaan Armaan ko ghur raha tha aur usse uska wajood puch raha tha.
Armaan ne Ice Cream ko apni hatheli mein thoda kaske pakad liya. Woh rasode mein gaya aur us Ice Cream ko Fridge ke andar rakh diya. Woh kuch kadam chala aur Wash Basin ki aur jaakar ruk gaya. Usne apna muh dhoya. Phir woh apne kamre mein gaya aur apne kapde badal liye.
Armaan dobara kitchen mein gaya aur Fridge se Ice Cream nikaal kar Balcony mein aa gaya. Woh waha par baith gaya. Ice Cream apne haathon mein liye aur apne pairon ko thoda sa failaaye hue, woh Balcony mein baitha hua tha. Woh khule aasmaan ki aur dekh raha tha. 'Yeh aasmaan bhi kitna akela hain, thik meri tarah.' Armaan ne socha.
'Agar kal ko main mar bhi jaaun toh, meri maut par rone wala koi nahi hoga.'
'Meri zindagi mein na koi dost hain, na hi koi dushman. Aakhir main jeeyun bhi toh, kiske liye jeeyun ?' Yeh khayal aate hi, Armaan ki aankhon se aansun chalak pade.
Kuch der tak, woh yun hi udaas baitha raha. Armaan ko apni zindagi mein koi maksad nazar nahi aa raha tha.
Tabhi Armaan ko apni aankhon ke saamne us maasoom bacche ka chehra nazar aaya aur uske zehan se ek aawaz aayi, 'Is duniya mein mera koi nahi hain. Lekin, main bhi toh is duniya ka hi ek hissa hoon.'
'Mera koi parivaar nahi. Mere aage-peeche koi nahi. Kyun na main is sansaar ko apna parivaar bana loon.'
'Kyun na main is kaabil banu ki main us bacche ke liye kuch kar sakun. Uski zindagi sawaarne ki koshish karun.'
'Kyun na main is duniya ke sabhi baccho ko apna maan loon.'
Ab dheere-dheere Armaan ka mann halka hone lag gaya tha. Us ek hi shan mein, Armaan khud ko pehle se zyada zimmedar insaan mehsus kar raha tha.
Tabhi Armaan ka phone bajta hain. Woh apni jeb se phone nikaalkar dekhta hain, Call uske Boss ka tha. Woh Call uthata hain aur Phone ke dusri aur se uska Boss kehta hain, "Hello Armaan."
Armaan - "Haan Sir."
Boss - "Kaha par ho tum is waqt ?"
Armaan - "Ji main apne ghar par hoon Sir."
Boss - "Kya tum is samay vyast ho ?"
Armaan - "Ji nahi Sir."
Boss - "Maine tumhe ek behad zaroori baat karne ke silsile mein Call kiya hain."
Armaan - "Haan kahiye na Sir. Kya baat hain ?"
Boss - "Armaan woh Company mein tumhare liye, thoda sa kaam nikal aaya hain. Darsal, Ajay Kumar ko kuch dino ke liye, apne ghar jaana pad raha hain; toh agar tum uska kaam bhi apne kaam ke saath-saath kar sako, toh Company ke liye accha rahega."
Armaan kuch der ke liye sochta hain aur tabhi uske zehan se ek aawaaz aati hain, 'Yahi toh mauka hain, kaabil banne ka. Yahi toh avsar hain, khud ko taraashne ka.'
Tabhi use dhyaan aata hain, ki uske Boss phone ke dusri aur se use pukaar rahe hain. Uske Boss kehte hain, "Armaan kya tum mujhe sunn rahe ho ?"
Armaan - "Haan Sir. Main aapko sunn raha hoon."
Boss - "Kya tum tayyar ho yeh nayaa kaam seekhne ke liye ?"
Armaan - "Ji Sir main bilkul tayyar hoon."
Boss - "Tumhara bohut shukriya Armaan."
Armaan - "Sir yeh toh mere liye saubhagya ki baat hain."
Boss - "Kal office mein aate hi, mere Cabin mein aa jaana."
Armaan - "Ji Sir."
Boss phone kaat dete hain aur Armaan dobara apne khayaalon mein kho jaata hain. Lekin, is baar ek nayi soch ke saath. Ek naye vyaktitva ke saath. Ab woh apne antarmann mein is sawaal ka jawaab dhoondh raha tha, ki aakhir woh kis tarah se khud ko taraashe.
Kuch der tak woh khayaalon ke Samundar mein dooba hua tha. Woh apne mann mein aa rahe, sabhi sawaalon ke jawaab dhoondh raha tha. Kuch sawaalon ke jawaab use mile, toh kuch sawaalon ke jawaab use bhavishya mein milne ki aasha hain. Armaan ne tay kar liya tha ki woh har sawaal ke jawaab ki khoj mein har baar nikal padega. Phir chahe usmein kitna hi waqt kyun na lag jaaye.
Phir woh khada hota hain aur balcony se ghar ke andar jaata hain. Lekin, jo Armaan kamre se balcony mein gaya tha, woh Armaan kahi kho chuka hain. Shayad us Armaan ka astitva hi khatam ho chuka hain. Ek nayaa Armaan kamre ke andar pravesh kiya. Ek nayi urja ke saath, ek naye vyaktitva ke saath, ek nayi ummeed ke saath, ek nayi pehchan ke saath. Jise shayad apni zindagi ka maksad ab tak nahi mila, jise shayad apni zindagi ki raah nahi mili. Lekin, agar kuch mila hain, toh woh hain ek nayi chah. Agar kuch mila hain toh woh hain, ek nayi pehchaan, ek nayi urjaa, ek nayaa vyaktitva aur shayad ek nayaa jeevan.
Comments
Post a Comment