Jazbaat

 Ahaan Kashyap ek naujawan ladka hain. Woh College mein padhta hain. College mein uske kai dost hain. Kuch ladke, toh kuch ladkiyaan bhi. Ahaan ke saath class mein ek ladki padti hain. Us ladki ka naam, Devika Tripathi hain. Ahaan aur Devika bohut acche dost hain. Dono ek dusre se khoob baatein kiya karte hain. 

Ek baar ki baat hain. College mein interval ho chuka tha. College ki Coffee piye hue Ahaan ko kai din ho gaye the. Ahaan ne Canteen jaane ka faisla liya. Tabhi Ahaan ko jaate hue, Devika ne dekha. Usne Ahaan ko pukaara.

Ahaan - "Haan Devika."

Devika - "Kaha jaa rahe ho ?"

Ahaan - "Canteen."

Devika - "Akele ?"

Ahaan - "Chalo saath mein chalte hain."

Devika - "Thik hain."

Dono saath mein Canteen jaate hain. Canteen pohuchne ke baad Ahaan ne Devika se pucha, "Kya khaana pasand karogi Devika ?"

Devika - "Tum batao."

Ahaan - "Jo bhi tumhe pasand ho."

Devika - "Sirf Cold Drinks."

Ahaan Cold Drinks lekar aata hain. Dono saath mein Cold Drinks peete hue yahan-wahan ki baatein karte hain. Uske baad, dono wapas Class mein chale jaate hain.

Dono aksar ek dusre se baat-cheet karte rehte hain.

Ek din, College khatam hone ke baad, Ahaan College ke Library mein gaya. Use Library se koi kitaab leni thi. Woh alag-alag khaano mein kitaab dhundh raha tha. Tabhi Devika ki nazar Ahaan par padi. Woh Library mein pehle se hi baithi hui thi. Woh Ahaan ke paas aayi aur peeche se uske kandhe par kitaab maari. Ahaan peeche mudkar dekha aur Devika ko paaya. Dono ek dusre ko dekh kar muskuraye. 

Phir Devika ne bohut dheemi aawaz mein kaha, "Yahan kya kar rahe ho Ahaan ?"

Ahaan - "Main French Revolution ki kitaab dhundh raha tha."

Devika apni kitaab uski aur badhaate hue kahi, "Yeh lo."

Ahaan kitaab leta hain. Kitaab French Revolution ki thi. Phir woh kehta hain, "Yeh kitaab tum padh rahi thi ?"

Devika 'Haan' mein apna sar hilati hain. 

Ahaan - "Toh tum padhne ke baad mujhe de dena."

Devika - "Nahi tum padh lo pehle."

Ahaan - "Lekin..."

"Zidd mat karo. Tum padh ke mujhe de dena yeh kitaab." Devika Ahaan ki baat kaat te hue kehti hain.

Ahaan - "Thank You."

Devika muskurati hain aur kehti hain, "Doston ka shukriyada nahi kiya jaata hain."

Ahaan muskurata hain aur wahan se chala jaata hain. 

Exams ka waqt nazdeek aa raha tha. Ahaan ne socha ki, 'Library mein bohut shaanti rehti hain. Isliye main aaj se College ke baad, Library mein jaakar padhunga.'

Dopahar mein College ka samay samapt hone ke baad, woh Library mein pohuncha aur wahan Devika ko baitha hua paaya. Woh ek kursi par baithe kitaabein padh rahi thi. Woh Devika ke nazdeek jaakar khada ho gaya. Devika ki nazar Ahaan par padi. Woh muskurate hue behad dheemi aawaz mein boli, "Hi Ahaan."

Ahaan - "Hi Devika. Padhaayi kar rahi ho ?"

Devika - "Haan."

Ahaan - "Kya main bhi tumhare saath padh sakta hoon ?"

Devika 'Haan' mein apna sar hilati hain. Woh Devika ke bagal mein baith jaata hain. Dono saath mein baithe padhaayi karte hain. Padhaayi karte-karte, Ahaan ki nazar Devika par padti hain. Woh Devika ko dekhta hi reh jaata hain. 

Woh Devika ko behad dhyaan se dekh raha tha. Aaj se pehle usne Devika ko kai baar dekha tha. Lekin, aaj se pehle Ahaan ne kabhi bhi Devika ko itne dhyaan se nahi dekha tha. Shayad isliye, kyunki woh Devika ke behad kareeb baitha hua tha. Ahaan ko kuch ajeeb mehsus ho raha tha. Aaj se pehle use aisa kabhi mehsus nahi hua. Woh samajh nahi paa raha tha ki use kya mehsus ho raha hain. Lekin, jo bhi mehsus ho raha tha, bohut hi accha mehsus ho raha tha. 

Library mein padhaayi karne ke baad, dono apne-apne ghar chale gaye. Ahaan apne kamre mein baitha hua tha. Use apni aankhon ke saamne baar-baar Devika ka chehra nazar aa raha tha. Ahaan samajh nahi paa raha tha is bhaavna ko. Kaafi der tak sochne ke baad, Ahaan ne socha ki, 'Aaj pehli baar itne nazdeek se Devika ko dekha, shayad is wajah se.' 

Agle din woh dono dobara College mein milte hain aur College ke baad, saath mein baithe Library mein padhte hain. 

Ab har roz College ka waqt khatam hone ke baad, woh dono saath mein Library mein padhaayi karte. Aisa kai dafa hua ki Ahaan ne, Devika ko behad dhyaan se dekha ho. Ahaan ki yeh harkat, Devika ki nazar mein aa chuki thi. Devika ko bhi badaa ajeeb laga is baare mein jaankar, ki Ahaan use kabhi-kabhi bohut dhyaan se dekhta hain. 

Ek din ki baat hain. Har roz ki tarah, dono saath mein padh rahe the. Ahaan ab bhi Devika ko dekh kar kahi ghum ho chuka tha. Tabhi Devika ne achaanak se kaha, "Shaadi ke baad, bacchon ko hum Boarding School mein bhejenge."

Ahaan - "Nahi. Ghar par Mom-Dad ka pyaar milega toh zyada accha rahega."

Yeh kehte hi, Ahaan daanton tale apni zubaan daba leta hain. Woh behad sharminda ho jaata hain. Devika Ahaan ko ghur kar dekhti hain. Ahaan apni nazrein jhuka leta hain. Kuch pal baad, woh behad dheemi aawaz mein kehta hain, "Mujhe maaf kar dena Devika." Phir woh wahan se chala jaata hain. 

Agle din, Ahaan College nahi jaata hain. Ahaan ko College mein na paa kar, Devika samajh jaati hain; ki Ahaan aaj sharam ke maare College nahi aaya hain. 

Dusre din, Ahaan College aata hain. Class mein aate hi, uski nazar Devika par padti hain. Woh bina kuch kahe, ek bench par jaakar baith jaata hain. College khatam hone ke baad, woh seedha apne ghar ke liye nikal jaata hain. Aaj woh Library mein nahi gaya. Do din pehle hue us vaakye ke baad, woh Library jaata bhi toh kaise jaata. Woh us din ki apni harkat ke liye behad sharminda tha. 

Agle din ki baat hain. Ahaan Class mein aakar baitha. Uski nazar Devika par padi. Devika ko dekhte hi, woh apna muh dusri aur ghuma liya. Devika Ahaan ke paas aayi aur kahi, "Hi Ahaan."

Ahaan - "Hi Devika."

Devika - "Kaise ho ?"

Ahaan - "Thik hoon."

Devika - "Kya tum mujhse baat nahi karna chahte ho ?"

Ahaan - "Aisi baat nahi hain."

Devika - "Pehle toh tum mujhse nazrein milkar baat karo."

Ahaan Devika ki aur dekhta hain. Phir Devika aage kehti hain, "Ab tumhe mere saath padhaayi karne mein dilchaspi nahi reh gayi hain."

Ahaan - "Nahi aisi baat nahi hain. Mujhe kuch kaam aa gaya hain, toh bas isiliye."

Devika - "Aaj lectures khatam hone ke baad, main tumhe Library mein dekhna chahti hoon."

Ahaan apna sar hilata hain.

Devika chali jaati hain. Kuch ghanton ke baad, lectures khatam ho jaate hain aur College ka samay bhi samapt ho jaata hain. Ahaan ko isi pal ka intezaar tha. Woh thoda ghabraya hua tha. Woh soch raha tha ki, 'Devika na jaane mere baare mein kya soch rahi hogi ? Main shayad uski nazron mein gir chuka hoon.'

Ahaan dabe paav, Library mein jaata hain. Woh ab bhi zara ghabraya hua tha. Devika Library mein baithi uska intezaar kar rahi thi. Ahaan ko dekhte hi, woh muskurati hain aur Ahaan ko aane ishaara karti hain. Ahaan uske paas jaata hain. Woh Ahaan ko baithne ka ishaara karti hain. Ahaan uske bagal mein baith jaata hain. 

Devika kitaab kholti hain aur woh dono saath mein padhyaai karte hain. Padhaayi khatam hone ke baad, dono saath mein Library ke bahar aate hain. Bahar aate hi, Devika kehti hain, "Canteen chale ?"

Ahaan - "Thik hain."

Dono saath mein Canteen jaate hain. Canteen pohuchte hi, Ahaan Devika se puchta hain, "Kya logi ?"

Devika - "Kuch bhi nahi."

Ahaan - "Agar tum us din ke liye ab bhi naaraz ho toh, main tumse maafi maanga chahta hoon."

Devika - "Baith kar baat kare ?"

Dono saath mein ek table par jaakar baith jaate hain. Dono ek dusre ko dekhte hain. Phir Devika muskurate hue kehti hain, "Us din tum kya dekh rahe the Ahaan ?"

Ahaan apni nazrein jhuka leta hain.

Devika - "Mujhse nazrein milkar baat karo Ahaan."

Ahaan Devika ki aur dekhta hain. Phir Devika aage puchti hain, "Haan toh tum kya dekh rahe the ?"

Ahaan - "Tum toh jaanti hi ho."

Devika - "Main tumhare muh se sunn na chahti hoon."

Ahaan - "Main tumhe dekh raha tha. Haan yeh sach hain."

Devika - "Kyun ?"

Ahaan - "Main is baat ka kya jawaab de sakta hoon Devika. Main jo bhi kahunga, tum galat hi samjhogi."

Devika - "Phir bhi."

Ahaan - "Tum jawaan ho. Khoobsurat ho. Shayad tumhare liye, yeh behad aam si baat hogi. Mere jaise toh kai mil log tumse mohabbat karne ka daava bhi karte honge. Toh kya matlab aa raha hain, yeh kehne ka ki main us din tumhe kis nazar se dekh raha tha. Kya matlab aa raha hain, yeh kehne ka ki main tumhare baare mein kya mehsus karne laga hoon."

Devika samajh nahi paati hain, ki woh kya jawaab de. Woh bas itna kehti hain, "Exams par dhyaan do Ahaan."

Phir woh waha se uth kar jaane lagti hain. Kuch kadam chalne ke baad, woh mudti hain aur kehti hain, "Kal se main tumhe har roz Library mein dekhna chahti hoon." Phir woh chali jaati hain. 

Agle din se woh dono dobara har roz, Library mein saath padhte hain. Us din ke baad se Ahaan ne aksar apne jazbaat ko apne kaaboo mein rakha. Woh Devika se khul kar baat-cheet toh karta hain lekin, zara sambhalkar; is darr se ki kahi uski koi baat Devika ko kahi buri na lag jaaye aur yeh dosti na toot jaaye. 

Aakhir mein dono ki padhaayi poori hui aur behad acche ankon se woh dono hi uttirn bhi hue. Dono ko alag-alag Company mein naukri mil gayi. Dono ab bhi ek dusre se baat-cheet karte rehte hain. Lekin, naukri ke wajah se woh dono kaafi lambe samay se ek dusre se mil nahi paa rahe the. 

Phone par baat-cheet ke dauraan, Ahaan ne kai baar, Devika ke badle hue vyavhaar par gaur kiya hain. Ahaan ko yeh baat samajh mein aa gayi thi ki, Devika ki usmein zara bhi dilchaspi nahi hain. 

Ek baar woh dono kahi bahar milne ka tay karte hain. Ahaan bhi tadap raha tha, Devika ko dekhne ke liye. Lekin, use is baat ka bhi darr tha, ki kahi uske jazbaat bekaaboo na ho jaaye. Kyunki woh kaafi lambe samay ke baad, Devika ko dekhne wala tha. Woh dono ek restaurant mein milne wale the. 

Shaam ka waqt tha. Ahaan restaurant ke bahar khada, Devika ka intezaar kar raha tha. Uske Mann mein Devika ko dekhne ki bohut utsukta thi. Waha khade-khade woh socha, 'Devika ko main pehchaan paaunga kya ? Itna zyada waqt beet chuka hain.'

Phir agle hi pal, uske mann mein dusra khayal aaya, 'Aise kaise nahi pehchaan paaunga ? Koi sadiyon baad thodi na main usse mil raha hoon.'

Aise kai khayal, Ahaan ke mann mein aa rahe the. Tabhi uski nazar Devika par padi. Devika ko dekhte hi, Ahaan ki nazar bas usi par tiki reh gayi. Devika ek safed rang ke suit mein dheere-dheere, Ahaan ki aur badh rahi thi. Phir woh Ahaan ke saamne aakar khadi ho gayi. Dono ne ek dusre ka haal-chaal liya. Phir woh dono restaurant mein gaye aur ek table par baith gaye. 

Devika ke chehre ka rang uda hua dikh raha tha. Ahaan ne Devika se baat-cheet shuru ki aur thodi hi der mein woh samajh gaya ki, Devika ka dhyaan uski baaton par hain hi nahi. Baat-Cheet karte-karte, Ahaan ne kaha, "Yeh hamari aakhri mulaakaat hogi. Aaj ke baad ab hum dobara nahi milenge."

Devika - "Par kyun Ahaan ?"

Ahaan - "Shayad yahi sahi hoga."

Devika - "Aur yeh sahi kaise hoga ?"

Ahaan - "Tum shayad bas mera Dil rakhne ke liye mujhse milti ho Devika."

Devika - "Aisi baat nahi hain. Main hamesha apni marzi se tumse milti hoon."

Ahaan - "College ki woh ek baat ko tum aaj tak apne Dil se laga rakhi ho. Kya meri baat itni buri lag gayi tumhe ?"

Devika ki aankhein bhar aati hain. 

Ahaan - "Oh mujhe maaf kar dena Devika."

Devika apna haath apne chehre par rakhti hain aur rote hue kehti hain, "Tum kis baat ke liye mujhse maafi maang rahe ho ? Maafi toh mujhe tumse maangni chahiye. Tum mere baare mein jo bhi mehsus karte ho, shayad tumhe yeh lagta hain ki mujhe us baat ki koi kadar nahi hain. Lekin, sach toh yeh hain ki, main tumhare jazbaat ko bakhubi samajhti hoon aur us jazbaat ki bohut izzat bhi karti hoon. Lekin, kya tum mujhe apna paaoge ? Shayad us din maine tumhare jazbaat ko thes pohuchaya ho. Ab aage tum kya chahte ho, main nahi jaanti hoon."

Ahaan - "Main bas tumhe khush dekhna chahta hoon Devika. Agar tumhe mujh mein dilchaspi nahi hain, toh koi baat nahi. Main tumhe kabhi bhi tang nahi karunga. Main kabhi tumhare khushiyon ke beech nahi aaunga. Aage wahi hoga, jo tum chahti ho. Agar tum mujhse koi rishta nahi rakhna chahti ho, toh main badi khaamoshi se tumhari zindagi se bohut durr chala jaaunga."

Devika - "Tum ab bhi nahi samjhe Ahaan. Agar main yeh kahun, ki hamare is rishte ki ek nayi shuruaat ho sakti hain. Agar main yeh kahun ki, is rishte ko woh naam diya jaa sakta hain; jo naam tum College ke dino se dena chahte the. Toh kya tum ab bhi aisa hona chahoge ? Kya ab bhi tumhare Dil mein mere liye wahi jazbaat hain, jo College ke dauraan tha ?"

Ahaan - "Kya tumhari zindagi mein, mere liye woh jagah hain, jo main College ke dino mein ummeed karta tha ?"

Devika - "Woh jagah sirf tumhare liye hain Ahaan aur hamesha rahegi. Main naadaan thi, jo us waqt tumahare ehsaason ko samajh nahi paayi."

Dono table par apna haath dheere-dheere aage badhaate hain aur ek dusre ka haath thaam lete hain. Devika ke aankhon se aansun behna band nahi ho rahe the. Wahi dusri aur, Ahaan ki bhi ab aankhein bhar aayi. Nam aankhon se dono ek dusre ki palkon mein khud ko dhundh rahe the.

                                          - Ved Vineet Gautam