Insaaniyat

 Rahul Kumar peshe se ek Forest Officer hain. Rahul ko Madhya Pradesh ke ek Shehar ke Jungle mein posting mil chuki hain. Kuch dino pehle hi, Rahul se uske senior ne bata diya tha ki use Jungle ki dekh-rekh ke liye waha bheja jaayega. Woh bohut hi zyada utshahit hain. 

Rahul ko bachpan se hi Jungle ki sair karne ka aur jungli jaanwar ke jeevan ko nazdeek se dekhne ka bada shauk tha. Isiliye toh usne isi shetr mein apni padhayi poori ki hain. 

Rahul apne kamre mein tha aur woh apna saamaan bandh kar raha tha. Saamaan pack karte-karte uske mann mein bohut hi zyada uthsaah bhara hua tha aur uska yeh utsaah  badhta jaa raha tha. 

Rahul ke Maata-Pita uske kamre mein aaye aur use apne jeevan ki pehli Jungle Yatra ke liye badhaiyan di. Unhone Rahul ko kuch paise diye aur Rahul ke pita ne usse kaha, "Beta wahan par apna khayal rakhna. Jungle mein dher saare khatarnak jaanwar hote hain. Kabhi bhi kahi par bhi akele mat chale jaana."

Rahul ne muskurate hue kaha, "Haan Papa."

Phir Rahul un logon ka aashirwad lekar wahan se bahar nikala. Bahar Rahul ko lene ke liye ek gaadi khadi thi. Rahul ne usmein apna samaan daala aur ek aakhri baar apne maata-pita ke gale laga. Rahul ke Maata-Pita ki aankhein bhar aayi thi. Rahul bhi thoda bhaavuk ho gaya tha. Lekin, usne apne jazbaat sambhal liye. Phir woh Car chal padi. 

Raaste bhar Rahul chup tha. Beech-Beech mein driver Rahul se kuch baatein karta aur woh bas uski baaton ko sunta aur hmm, haan mein jawaab de deta. Woh bhi samajh chuka tha ki, filhal  Rahul thoda sa bhaavuk hain. Isliye ab usne bhi khaamosh rehna hi thik samjha. 

Kuch ghanton ke baad, woh log us Jungle mein pohunche, jahan par Rahul ki posting tay hui thi. Us aadmi ne Rahul ko uske senior ke office le gaya aur kaha, "Sir yahi hain Rahul Kumar. Inhi ki yahan par posting tay hui hain."

Senior ne Rahul ki taraf dekha aur poocha, "Aap kaafi jawaan dikhayi de rahe ho."

Rahul - "Ji shukriya Sir."

Phir Senior ne kaha, "Shayad yeh aapki pehli posting hogi kisi Jungle mein ?"

Rahul - "Ji haan Sir. Yeh mere jeevan ki pehli posting hain Jungle mein."

Senior - "Yahan is Jungle mein kaafi khoonkhar aur khatarnak jaanwar rehte hain. Toh aap apna khayal rakhna. Aap yahan zara sambhalkar rehna."

Rahul - "Ji Zaroor Sir."

Senior - "Main ummeed karta hoon ki aap yahan kaafi samajhdaari se rahenge."

Rahul - "Ji Sir."

Senior - "Kya aapko jaanwaron ke saath rehna ka anubhav hain ?"

Rahul - "Sir main toh naya-naya aaya is naukri mein."

Senior - "Nahi mera matlab hain ki, aapke ghar mein ya mohalle mein jaanwaron ke saath samay vyatit karne ka anubhav hain aapko ?"

Rahul - "Ji haan Sir. Hamare society mein bohut saare laawaris Kutte aur Billi aate rehte the. Society mein hum sabhi log unka khayal rakhte the."

Senior - "Haan par yeh Jungle hain. Yaad rahe."

Rahul - "Ji zaroor Sir."

Senior - "Aapke koi sawaal ?"

Rahul - "Mujhe kaam kabse, kaha se aur kis tarah se shuru karna hain Sir ?"

Senior - "Woh aapko kal pata chal jaayega. Kal se aapki asli training shuru hogi. Field Training. Aaj aap apne Tent mein jaaiye aur aaram kariye."

Rahul - "Ji Sir."

Senior - "Kal subah thik 7 baje aap mujhe yahi par report karenge."

Rahul - "OK Sir."

Senior - "Ab aap jaa sakte hain."

Rahul - "Thank You Sir."

Phir Rahul chala jaata hain aur woh apna Tent banane mein lag jaata hain. Kuch der ke baad, Rahul ka Tent tayyar ho jaata hain. Woh kuch der apne Tent mein baithta hain aur phir woh apne Tent se bahar nikalkar bahar ka nazaara dekhne mein lag jaata hain. Hare Bhare Ped, Kacchi patli sadkein. Yeh sab Rahul ko behad utsaahit karte hain. 

Kuch der baad, Suraj dhal jaata hain aur Rahul apna khaana banakar, sabke saath khaane baith jaata hain. Woh log aapas mein, dher saari baatein karte hain. Apne baare mein. Apne bachpan ke baare mein. Apne parivaar ke baare mein. Baatein karte-karte kaafi raat ho jaati hain aur phir wahi Senior aate hain aur kehte hain, "Ab aap sab apne-apne Tent mein jaakar so jaaiye. Raat kaafi ho chuki hain. Subah 7 baje aap logon ko report bhi toh karna hain."

Sab log apne-apne Tent mein chale jaate hain. Rahul ko agle din se shuru hone wali training ka uthsaah sone nahi de raha tha. Woh behad khush tha. Woh mann hi mann soch raha tha ki, 'Kal kya hoga ?' 'Kal Sir mujhe kya seekhayenge ?' 'Kya kal hi mujhe Jungle ke andar pravesh karne ka avsar mil jaayega ?' Yeh sab khoobsurat khwaab dekhte-dekhte aakhir kaar Rahul ko neend lag gayi. 

Agle din, Rahul waqt se utha aur apne senior ke office mein jaakar report kiya. Rahul pehle hi din, subah-subah waqt par pohuch gaya, yeh dekh kar uske senior usse behad khush hue. Unhone Rahul ki prashansa ki. Pehle hi din, prashansa paakar Rahul behad khush ho gaya. 

Ab Rahul ki training shuru ho gayi thi. Senior ne Rahul ko Jungle mein rehne ke taur-tareeke seekhaye. Unhone aapatkaal mein kounse jaanwar se kis tarah se saamna kiya jaaye yeh bhi seekhaya. Rahul behad dhyaan se aur poori shiddat se sab kuch seekh raha tha. Dekhte Hi Dekhte kuch hi mahino mein Field Training poori ho gayi aur unhone Rahul ko Jungle ka byora karne ke liye bhi bhejna shuru kar diya. Veh Rahul ke apne kaam ke prati samarpan se behad prabhavit the.

 Unhe ab Rahul par bohut bharosa ho chuka tha. Samay ke saath-saath Rahul apne kaam mein behtar hota gaya. Ab Rahul ke senior use field par akele hi bheja karte hain. Unhe Rahul par poora vishwaas tha. Bohut hi kam samay mein Rahul apne senior ka vishwaas jeetne mein kaamyab ho gaya. Woh har roz subah tayyar hokar akela Jungle mein jaata aur Suraj dhalne se pehle wapas apne Tent mein aa jaata. Jaisa ki Rahul se kaha gaya tha. 

Aaj Rahul ko is duty mein kareeb che mahine ho gaye. 

Ek din ki baat hain. Har roz ki tarah us din bhi, Rahul Jungle ke andar gaya. Chalte-Chalte woh Jungle ke bohut andar pohunch chuka tha. Kaafi samay beet jaane ki wajah se usne, wapas jaana hi sahi samjha. 

Kuch dur tak chalne ke baad, use apne saamne ek Sher dikha. Rahul ne apni jeb jaanchi aur use ehsaas hua ki woh apni bandook bhool chuka hain. Woh behad ghabra gaya tha. Saamne aate hue Sher ko dekh kar use parmaatma ki yaad aa rahi thi. Woh paseene se lathpath ho chuka tha. Sher Rahul ke nazdeek aaya. Rahul ab kaanp raha tha aur woh sar se lekar paaon tak paseene se lathpath tha. Sher Rahul ke pair ke paas apna muh kiya. Rahul ne socha, 'Lagta hain sabse pehle mera pair hi iska naashta banega.' Usne darr ke maare apni aankhein band kar li aur parmaatma ko yaad karne laga. Tabhi use Sher ki garjana ki aawaz sunayi di. Sher behad hi bhayaavah tareeke se garja tha. Sher ki garjan sunkar woh wahi par behosh ho gaya. 

Kuch der baad, Rahul ko hosh aaya. Use halka sa bukhaar cadh chuka tha. Kuch pal ke liye use kuch samajh mein nahi aaya. Lekin, kuch der baad use Sher ke saath ghatit ghatna poori tarah se yaad aayi. Rahul ke zehan mein sirf ek baat aayi. Rahul ne socha, 'Main is Sher ke saamne behosh ho chuka tha. Agar main hosh mein bhi rehta, toh bhi main is Sher ka aakhir kya bigaad leta. Nahi hi mere paas bandook thi. Main is Sher ke saamne bilkul nihattaa tha. Phir bhi is khatarnak jeev ne mujh par koi vaar nahi kiya. Aakhir aisa kyun ?' Phir usne socha, 'Shayad uska peat pehle se hi bhara hua ho. Aaj kismat ne mera saath de diya. Khair ab mujhe kisi bhi tarah se is Jungle ke bahar nikalna hain aur woh bhi jald se jald.'

Ab woh apne wapas jaane ka raasta dhundhne mein jut gaya. Chalte-Chalte kaafi der ho chuki thi. Lekin, Rahul ko ab tak bahar jaane ka koi bhi raasta mil nahi paa raha tha. 

Rahul kaafi der se paidal chal raha tha. Jis wajah se woh thak chuka tha. Ab usmein chalne ki shamtaa nahi bachi thi. Woh ek ped ka sahara lekar baith gaya. Rahul socha, 'Aakhir yeh kaha aakar phans chuka hoon main. Na wapas jaane ka koi raasta mil raha hain. Naa hi, koi dusra insaan dikhayi de raha hain aur naa hi, mere paas aisi koi cheez hain, jisse main apne wapas jaane ka raasta khoj sakun.'

Rahul pareshan hokar baitha tha aur yahan-wahan bas dekh raha tha. 

Tabhi Rahul ko apne saamne ek Ajgar dikhayi diya. Us Ajgar ko dekhte hi Rahul seham gaya. Rahul ne socha, 'Main us Sher ka naashta banne se toh bach gaya, lekin, ab kahi is Ajgar ke dant ki tezi ka zariyaa na ban jaaun.' Woh Ajgar Rahul ke nazdeek aaya aur uske pairon par cadh gaya. Phir us Ajgar ki nazar Rahul ke chehre par padi. Us Ajgar ko Rahul behad sehma hua dikhayi de raha tha. Woh Ajgar dheere se dusri aur jaane laga aur kuch hi der mein, Rahul us Ajgar ke changul se bhi aazad ho gaya. 

Ajgar ki aisi harkat dekh kar, Rahul dang reh gaya tha. 

Ajgar ke wahan se jaane ke baad, Rahul waha se utha. Woh behad ghabraya hua tha. Uske muh se aawaz nahi nikal rahi thi. Woh behad dheere-dheere chal raha tha. Balki, woh kaanp-kaanp kar chal raha tha. Kaafi dur tak jaane ke baad bhi use koi raasta nahi mila. 

Rahul ne Jungle se bahar nikalne ki bharpur koshish ki. Aakhir kaar do dino ke baad, woh us Jungle se bahar nikalne mein safal raha. 

Rahul us Jungle mein kareeb do dino tak phansaa raha aur in do dino mein, kisi bhi jaanwar ne Rahul par koi vaar nahi kiya. Naa hi Rahul ko kisi bhi tarah ki haani pohuchane ki koi koshish ki. Yeh do din, uske hriday mein baith chuke the. 

Dusre adhikaariyon ne Rahul ko sadak par dekh liya. Woh Rahul ke paas gaye. Rahul bimar lag raha tha. Woh log Rahul ko turant Camp mein le gaye aur use Tent ke andar leta diya. Ek aadmi aaya, jo ki Doctor jaisa hi dikhayi de raha tha. Woh is haalat mein bhi nahi tha ki woh kisi bhi insaan ko pehchan sake. Doctor ne Rahul ki jaanch ki aur use ek injection diya. Kuch hi pal mein, woh behosh ho gaya. 

Phir kaafi der ke baad, Rahul ko hosh aaya. Woh Tent se bahar nikla. Tabhi ek aadmi uske paas aaya aur poocha, "Ab tum kaise ho ?"

"Thik hoon." Rahul ne behad dheemi aawaz mein jawaab diya. Phir us aadmi ne Rahul se kaha, "Poore do din baad, tumhe hosh aaya hain." Phir woh aadmi waha se chala gaya. Phir Rahul ke senior uske paas aaye aur usse uska haal-chaal liya aur woh chale gaye. 

Rahul socha, 'Kaash is waqt mere ghar wale mere saath hote, toh thoda accha lagta. Mere paas koi toh hota meri maansik sthithi samajhne wala.' Tabhi Rahul ko apne pair ke nazdeek ek dusra Saanp dikha. Lekin, is baar woh ghabraya nahi. Woh Saanp, Rahul ke dono pairon par chadkar use paar karte hue, woh dusri aur nikal gaya.

Tabhi Rahul ke antarmann se ek aawaz aayi. 'Agar yeh Saanp chahta, toh yeh bhi mujhe dans sakta tha. Main is ghane jungle mein do dino tak phansaa raha. Duniya ke sabhi jaanleva jaanwar se mera saamna hua. Lekin, kisi ek jaanwar ne bhi mujhe kisi tarah ki haani pohuchane ki koshish nahi ki. Main nihattaa tha. Shayad isliye main wahan zinda bhi bach gaya. Jaanwar aap par tab tak vaar nahi karta hain, jab tak ki aap use kisi tarah ka nuksaan pohuchane ki koshish na karo. Lekin, hum insaan bade hi ajeeb kism ke jaanwar hain. Koun sa insaan apne se kamzor ke saath kab kya kar jaaye, kuch kaha nahi jaa sakta hain. Asal mein dayaa bhaav toh jaanwar mein hi hoti hain. Hum insaan ne taraaki toh kar li, lekin, pyaar, dayaa, sachchai aur apnapan bhool chuke hain. Yeh sabhi seekh mujhe in jungli jaanwaron ne sikha di, jinhe hum khatarnak kehte hain.'

Rahul muskura diya. Uski muskurahat mein vyang bhara hua tha, jo ki insaaniyat ko aaina dikha raha tha aur insaaniyat apna asli chehra dekh kar, sharm ke maare apni nazrein jhuka chuki thi.

                  - Ved Vineet Gautam