Bhed

 Jayesh Dubey peshe se ek vyapaari hain. Unki raashan ki dukaan hain. Jayesh ki patni ka naam Meenakshi Dubey hain. Un dono ka iklauta ladka hain, jiska naam hain Vikram Dubey. Haal hi mein, Vikram ki padhaai poori hui hain aur woh apne pita ka vyapaar mein haath bantaa raha hain. Woh behad mehnati hain. Woh behad shaant swabhaav ka ladka hain. 

Vikram har roz subah uthkar samay se tayyar ho jaata hain aur apne Pita ke saath hi woh dukaan mein jaata hain. Shaam hote hi, dono baap-bete saath hi ghar laut aate hain. 

Ek din ki baat hain. Har roz ki tarah, us din bhi dono baap-bete saath mein apne dukaan gaye. Vikram ne dukaan khola aur woh dono dukaan par baithe graahakon ki prateeksha kar rahe the. Thodi der baad, dukaan par ek ladka aaya. Us ladke ko dekhte hi, Vikram ne behad khushi se kaha, "Are Nitin tum ?"

Nitin - "Aur batao Vikram. Kaise ho tum ?"

Vikram - "Main thik hoon. Tum kaise ho ?"

Nitin - "Main bhi bilkul thik hoon."

Phir Vikram ne Jayesh ki aur dekhte hue kaha, "Yeh mere Papa hain."

Nitin - "Namastey Uncle."

Jayesh - "Khush raho beta."

Vikram - "Papa yeh mera dost hain. Hum dono College mein ek saath padhte the."

Jayesh - "Aao na beta baitho na."

Nitin dukaan ke andar aata hain aur un dono ke saamne baith jaata hain. Phir Jayesh Vikram se kehta hain, "Beta zara Chai bol aana."

Nitin - "Nahi Uncle iski koi zaroorat nahi hain."

Jayesh - "Are nahi beta. Tum pehli baar humare dukaan par aaye ho, ek Cup Chai toh banti hain."

 "Main abhi aaya Nitin. Tum jaana mat." Kehte hue, Vikram waha se chala jaata hain. Vikram ke jaane ke baad, Jayesh aur Nitin ek dusre se dher saari baatein karte hain. Jayesh ko Nitin ka swabhaav bohut pasand aata hain. Baaton-Baaton mein, Jayesh ko pata chalta hain ki Nitin ki shaadi hone wali hain. Yeh jaankar, Jayesh kehta hain, "Yeh toh bohut khushi ki baat hain beta."

Nitin - "Shukriya Uncle."

Tabhi Vikram Chai ke saath waha aa pohuchta hain. Vikram ko dekhte hi, Jayesh ke mann mein khayal aata hain ki, 'Kaash mere laadle ki bhi shaadi ho jaaye.'

Vikram aur Nitin kuch der tak saath mein baithkar baatein karte hain aur phir Nitin waha se chala jaata hain. Dono baap-bete apne kaam mein vyast ho jaate hain. Lekin Jayesh ka kaam mein mann nahi lag raha tha. Woh kisi dusri duniya mein hi khoya hua tha. Vikram bhi samajh jaata hain ki aaj uske pita ka mann kaam par nahi lag raha hain. Woh sochta hain ki, 'Ab Papa ki umar ho rahi hain. Shayad thak gaye honge.' 

Kuch der baad, dukaan par ek grahak aata hain aur woh kuch saaman kharid kar chala jaata hain. Ab woh dekhta hain ki Jayesh ka mann thoda sa udaas ho chuka hain. Vikram ko badi jigyaasa hui yeh jaan ne ke liye ki, aakhir Jayesh ko hua kya hain ? 

Ab Vikram se bhi raha nahi gaya aur usne Jayesh se kaha, "Papa."

Jayesh toh maano jaise apne khayalon ki duniya mein hi khoya hua tha. Ab Vikram, Jayesh ke kandhe par haath rakh kar kehta hain, "Papa."

Jayesh Vikram ki aur dekhta hain aur kehta hain, "Haan beta ?"

Vikram - "Kaha khoye hue ho aap Papa ?"

Jayesh - "Kahi toh nahi."

Vikram - "Mujhe toh lag raha hain, ki aap khoye hue ho. Kya soch rahe ho Papa ?"

Jayesh - "Kuch nahi beta. Bas yeh soch raha hoon ki, na jaane kab mujhe bhi Bahu aur naati-poton ka sukh bhogne ka mauka milega. Na jaane kab mere bhaagya khulenge."

Vikram - "Sab kuch samay ke hisaab se hota hain Papa. Jab sahi samay aayega, tab meri bhi shaadi ho jaayegi. Aap itni fikar mat kariye."

Jayesh - "Are beta kyun na karun fikar ? Ek toh mera boodha shareer. Na jaane kab jawab de jaaye. Aaj jab tumhare dost ki Shaadi ka pata chala, tab ehsaas hua ki, ab mera laadla bhi bada ho chuka hain. Ab uski bhi shenaayi bajni chahiye."

Vikram - "Papa yeh sab baat hum ghar jaakar aaram se baithkar karenge."

Jayesh - "Thik hain beta. Lekin ab main tumhari shaadi jald se jald karane ki soch raha hoon."

Vikram - "Thik hain Papa ghar chal kar aaram se baithkar baat karenge."

Jayesh - "Thik hain beta."

Kuch der baad, shaam ho jaati hain aur woh dono saath mein ghar ke liye nikal padte hain. Thodi der baad, woh dono ghar pohuch jaate hain aur haath-muh dhokar Hall mein aate hain. Tabhi Meenakshi kehti hain, "Aap dono ka khaana laga doon ?"

Jayesh - "Haan khaana le aao."

Thodi der baad, Meenakshi khaana le aati hain aur un dono ko khaana parosti hain. Dono baap-bete khaana shuru kar dete hain. Woh dono ek-ek nevala khaate hain. Tabhi Meenakshi kehti hain, "Khaana kaisa bana hain ?"

Vikram - "Bohut accha bana hain, Mummy."

Phir Meenakshi Jayesh se poochti hain, "Aapko kaisa laga khaana ?"

Jayesh - "Accha bana hain."

Meenakshi - "Mujhe aapse kuch baat karni thi."

Jayesh - "Haan kaho."

Meenakshi - "Woh aapko Sharma bhabhi yaad hain ?"

Jayesh - "Haan woh yahi par rehte the. Kuch mahino pehle hi, dusri jagah rehne ke liye chale gaye the na woh log ?"

Meenakshi - "Haan wahi log. Aaj Sharma bhabhi aayi thi milne ke liye."

Jayesh - "Are vaah. Kaise hain woh log?"

Meenakshi - "Woh log bilkul thik hain. Darasal mujhe aapse kuch baat karni thi."

Jayesh - "Haan kaho."

Meenakshi - "Woh Sharma bhabhi ki ek bhatiji hain. Unki sagi Behan ki ladki hain. Bhabhi bata rahi thi, ki ladki behad sundar aur sushil hain."

"Are vaah. Yeh toh bohut khushi ki baat hain." Jayesh bohut khushi se kehta hain.

Meenakshi - "Toh kya hum ek baar un logon se mil lein ?"

Jayesh - "Are Bhai neki aur pooch pooch ? Kab milna chahte hain woh log ?"

Meenakshi - "Jab bhi aap chahe."

Jayesh - "Haan toh thik hain. Isi Itvaar ko unhe ghar bula lete hain."

"Thik hain." Meenakshi muskura kar kehti hain. 

Phir woh dono apna khaana khatam karke uth te hain aur sone chale jaate hain. Ab Jayesh aur Meenakshi ko aane wale Itvaar ka bade besabri se intezaar tha. Woh dono mann hi mann bohut khush the. Dekhte Hi Dekhte Itvaar aa gaya. Subah hote hi, Meenakshi tayyariyon mein lag gayi aur saath hi saath usne Jayesh aur Vikram se keh diya, ki aaj veh log dukaan par na jaaye. Meenakshi ne un dono se bahar se dher saare saamaan bhi mangwaye. 

Shaam ka waqt tha aur dono pati-patni ko ghar mein aane wale khaas mehmaan ka badi besabri se intezaar tha. Kuch samay baad, Meenakshi ki dost apne pati aur aur rishtedar ke saath unke ghar mein padhaari. Un dono ne badi khushi ke saath unka swaagat kiya aur veh log ghar ke andar aaye. Phir woh sab log saath baithkar dher saari baatein kiye. Sharma bhabhi ne unhe ladki ki tasveer dikhaayi. Ladki ki tasveer dekhte hi un dono ke chehre par muskurahat aa gayi. 

Phir Sharma bhabhi ne Vikram se kaha, "Are beta tum bhi ladki ki tasveer dekh lo." Jayesh - "Haan beta dekh lo. Aakhir aage zindagi toh tumhe hi guzaarni hain. Hamara kya hain, hum toh ab purane makaan ban chuke hain, kabhi bhi dhah jaayenge."

Meenakshi ladki ki tasveer Vikram ko deti hain. Vikram tasveer dekhta hain. Phir Sharma bhabhi kehti hain, "Ekta. Ekta naam hain is ladki ka."

 

"Bada hi pyaara naam hain." Meenakshi kehti hain. Phir woh Vikram se kehti hain, "Toh batao beta kaisi lagi ?"

Vikram sharmate hue kehta hain, "Thik hain."

Sharma Bhabhi - "Sir thik ya acchi ?"

Vikram - "Acchi hain."

Phir Ekta ke Pita kehte hain, "Toh beta. Kya aap ladki se milna chahoge ?"

Vikram - "Ji Uncle."

Ekta Ke Pita - "Toh aap log agar khaali ho, toh kal hi aap log ghar aa jaaiye. Ya phir agar kisi aur din aana ho, toh bas aap log bata dijiyega."

Jayesh - "Nahi Shukla sahab. Hum kal hi aapke yahan aayenge."

Ekta Ke Pita - "Thik hain."

Phir veh log chale jaate hain. Agle din, Dubey parivaar Shukla parivaar ke ghar pohuchta hain. Shukla parivaar un logon ka bhi bohut samman-poorvak swaagat karte hain. 

Dono parivaar mein dher saari baatein hoti hain aur phir aakhir mein un dono parivaar ke beech rishta tai ho jaata hain. 

Agle hi din, pandit ji ko bulakar, shaadi ki taareekh tai kar di jaati hain. Shaadi ki taareekh paanch mahine baad ki nikali. Dono parivaar apne-apne tayyariyon mein jut jaate hain aur dono ki shaadi dhoom-dhaam se kara di jaati hain. 

Kuch din beette hain aur Vikram aur Ekta ke beech jhagda shuru ho jaata hain. Pehle toh yeh dono akele hi ladte the. Lekin, dheere-dheere unke is bigde hue rishte ke baare mein Jayesh aur Meenakshi ko andaaza lag gaya. Lekin, veh log yeh baat nahi samajh paa rahe the ki aakhir woh in dono ko samjahye toh samjhaye kaise. 

Ek din ki baat hain. Jayesh aur Vikram dukaan par baithe hue the. Tabhi waha par Nitin aa pohuncha. Nitin ko dekhte hi, Jayesh ne kaha, "Kaise ho beta ?"

Nitin - "Thik hoon Uncle."

Vikram - "Aur batao ghar mein sab kaise hain ?"

Nitin - "Sab thik hain. Tum batao, bhabhi kaisi hain ? Tumhara khayal acche se rakh rahi hain ki nahi ?"

Vikram - "Ab kya bataun yaar. Main toh phans chuka hoon shaadi karke."

Nitin - "Matlab ?"

Vikram - "Are Bhai. Har roz jhagadti rehti hain woh mujhse. Ek bhi din, shaanti se so nahi paata hoon."

Nitin - "Apni patni ke saath mil-julkar rehna seekho. Accha ab main chalta hoon." 

Phir Nitin wahan se chala jaata hain.

Jayesh ko Vikram ki yeh harkat pasand nahi aati hain. Nitin ke jaate hi, Jayesh Vikram se kehta hain, "Yeh sab kya tha beta ?"

Vikram - "Kya Papa ?"

Jayesh - "Tum Nitin se Bahu ki burayi kyun kar rahe the ?"

Vikram - "Papa dost hain woh mera."

Jayesh - "Haan toh ? Kya tum apne dost se apni patni ke swabhaav ke baare mein charcha karoge ?"

Vikram - "Toh main kya karun ? Aapko bhi toh pehle se hi is baat ka andaaza lag hi chuka tha ki hum dono ke beech rishta kitna kharaab chal raha hain. Aap sab jaante hi ho, isliye maine aapse koi charcha nahi ki is baare mein."

Jayesh - "Phir bhi. Bahar is baare mein tum kisi se bhi baat nahi karoge. Yeh tumhara aapsi maamla hain. Yeh hamare ghar ka maamla hain. Tumhe agar apni takleef batani bhi hain, toh apne ghar walon ko batao. Doston se patni ki shikayat karna sahi nahi hain beta. Ek seekh samajh lo beta. Ghar ki baatein kisi bhi haal mein bahar nahi nikalni chahiye. Samay aane par keval parivaar hi saath deta hain. Baaki log toh bas saath dene ke daave karte rehte hain. Yeh duniya keval insaan ki hansi udane mein maahir hain. Jahan tak Bahu ki baat hain, toh tum uske saath bohut samajhdaari se apne rishte ko aage badhao. Hum dono ke jaane ke baad, kya karoge kabhi socha hain ? Ghar ka bhed jab bahar aa jaata hain toh parivaar barbaad ho jaata hain aur uska mulya ghar ke har ek sadasya ko chukaana padta hain."

Apne pita se Vikram ko bohut badi seekh mili hain. Shaam mein dono baap-bete ghar pohuchte hain. Jayesh is mudde par raat bhar gambhirta-poorvak sochta hain. Phir woh ek nirnay par aata hain. 

Subah hoti hain. Vikram tayyar hokar Hall mein aata hain aur Jayesh ka intezaar kar raha hota hain. Kaafi waqt beet jaane ke baad bhi Jayesh apne kamre se bahar nahi aata hain. Phir Vikram Jayesh ke kamre ka darwaaza khat-khatakta hain. Woh Vikram ko andar aane ke liye kehta hain. Vikram kamre ke andar aata hain aur woh Jayesh ko dekh kar kehta hain, "Papa aap abhi tak tayyar nahi hue ?"

Jayesh - "Nahi."

Vikram - "Kya aapki tabiyat kharab hain ?"

Jayesh - "Bilkul nahi."

Vikram - "Phir ?"

Jayesh - "Beta maine ek faisla liya hain."

Vikram - "Woh kya Papa ?"

Jayesh - "Aaj se main dukaan par nahi jaaunga. Ab dukaan ki poori zimmedari tumhare kandhon par rahegi. Na sirf dukaan ki zimmedari balki is ghar ki zimmedari bhi. Aaj se is ghar ke har ek sadasy ki zaroorat tum poori karoge."

Vikram - "Itni jaldi kaise main itni badi zimmedari utha sakta hoon ?"

Jayesh - "Tum yeh zimmedari utha loge. Mujhe tumpar poora yakeen hain. Ab tum duniyadari seekho aur apne anubhavon se aage ka nirnay lo. Girte-Sambhalte aage badho."

Phir Jayesh apni jeb se dukaan ki chaabhi nikalta hain aur Vikram ko pakdate hue kehta hain, "Aaj ke baad, yeh chaabhi mere kamre mein dikhni nahi chahiye."

Vikram behad gambhirta se kamre se bahar nikalta hain aur ek nayi soch ke saath, woh dukaan ke liye nikal padta hain. 

                    - Ved Vineet Gautam