Yojna

 Raju naam ka ek ladka hain. Woh ek chote se gaon mein rehta hain. Uske ghar mein uski Maa ke alaawa aur koi bhi nahi hain. Uske pita ka dehant Raju ke bachpan mein hi ho gaya tha. Suna hain, gaon mein ek jungli bail ghus aaya tha aur us bail ne poore gaon mein hahakaar macha diya tha. Usi bail se ladte hue, Raju ke pita, apni jaan se haath dho baithe the. Jis samay yeh haadsa hua tha, us samay Raju ki umar keval paanch varsh ki thi. Aaj woh pandrah saulah saal ka ho chuka hain, lekin, use apni pita ke saath beetaye gaye pal kuch thik se yaad nahi hain.

Lekin, uske pita ki mrityu ki aankhon dekhi aaj bhi use hriday mein basi hui hain. Raju ko apne pita ki mrityu ka gehra sadma laga tha. 

Apne pita ki mrityu ke agle din hi, Raju achaanak se behosh ho gaya tha aur vaidy ke kaafi koshisho ke baad, woh thik ho paaya tha. Kareeb ek hafte ke baad, uski aankhein khuli thi. Lekin, uske baad se hi uski haalat aur uske jeevan ki paristhiti bohut badal chuki thi. Raju shaaririk roop se thik toh ho chuka tha par maansik roop se woh bohut kamzor ho gaya tha. 

Raju ki aisi maansik kamzori ko dekh kar gaon walon ko uspar aur khaaskar uski maa par bohut taras aata tha. Samay beet ta gaya aur ab Raju ko aise pareshan aur maansik nirbal dekhna gaon walon ke liye ab ek aam si baat ho chuki thi. Kai logon ko uspar badi dayaa aati thi. Toh wahi dusri aur aise bhi kuch log the, jo Raju ke is nirbalta ka bohut fayda bhi uthate the. Aise log Raju ka uphaas udane ka ek mauka nahi chodte the. Raju gaon ke kuch logon ke liye bas ek khilona ban chuka tha. Gaon ke kai log samay samay par uski hansi udate hi rehte the aur yeh baat uski Maa bakhubi jaanti thi. Lekin, woh itna dimaagi roop se viksit nahi tha, ki woh in baaton ko samajh sake. Raju ki Maa ko aksar, apne bete ke bhavishya ki chinta satati hi rehti thi. 

Ek din ki baat hain, gaon mein kisi ki shaadi thi. Jis parivaar ke ladki ki shaadi thi, us parivaar ne gaon mein sabko nyota diya lekin, Raju ke Maa ko nyota nahi bheja. Haalanki, Raju aur uski Maa ko us parivaar ke shubh ghadi ki jaankari dusre logon se pata chali. Dekhte Hi Dekhte shaadi ka din aa hi gaya. Shaam mein sabhi log bohut acche se tayyar hokar, us shaadi mein gaye hue the. Us din Raju bohut khush tha kyunki, kaafi dino ke baad gaon mein sab log akatrit ho rahe the. Raju bhi subah se aaj shaam mein hone wali shaadi ke liye tayyari kar raha tha. Woh apne ghar ki almaari mein se aur ghar mein pade bakse mein se alag-alag kapde nikaalkar dekh raha tha aur un kapdon ko pehan kar apne aap ko aaine mein bhi dekh raha tha. 'Kya yeh safed rang ki kameez main pehnu ? Nahi yeh neele rang ki kameez zyada acchi lagegi. Lekin, yeh peele rang ka gamcha aur bhi zyada jachega.' Raju ne apni almaari mein se kareeban-kareeban apne har ek kapde nikaalkar dekh liya aur ab woh khud samajh nahi paa raha tha ki, woh aakhir kounsa kapda pehne. Is samasya ka hal nikaalne ke liye, Raju ne socha ki woh apni Maa se salah lega. Woh apne kamre se bahar nikala lekin, Raju ko apni Maa dikhayi nahi di. Woh baramde mein gaya lekin, woh use waha par bhi nahi dikhayi di. Raju ne ghar ke har kone mein apni Maa ko dekha lekin, woh use kahi bhi nahi dikhayi di. 

Woh ghar ke bahar gaya aur Raju ne dekha ki uski Maa apne gai ko chaara de rahi thi. Tabhi waha se guzarte hue kuch auraton ki nazar Raju ki Maa par padi. Woh aurante bina vilamb kiye, Raju ke Maa ke paas aaye aur unmein se ek aurat ne kaha, "Namastey Bhabhi."

Raju ki Maa ne un auranton ki taraf dekha aur unhe bhi 'Namastey' kiya. Tabhi unmein se ek aurat ne poocha, "Are yeh kya kar rahi ho aap Bhabhi ? Kya aap Bitto ki shaadi mein nahi jaa rahi ho ?"

Raju Ki Maa - "Nahi woh main jaane hi wali thi ki, thoda sa kaam nikal aaya."

Dusri Aurat - "Bhabhi yeh kaam baad mein bhi kiya jaa sakta tha. Aakhir Bitto ki shaadi baar baar thodi na hogi."

Tabhi un auranton mein se ek aurat ne Raju ki Maa ko tanj kaste hue kaha, "Are bhai. Bitto ki shaadi kitne baar hogi yeh toh bhagwaan hi jaane, lekin hamare Raju ki shaadi ek baar bhi ho jaaye; toh bohut badi baat ho jaayegi."

Waha khadi dusri aurat ne kaha, "Haan sahi kaha aapne bhabhi. Na jaane vidhaata ne us ladke ke bhagya mein kya likha hain. Bhagwaan na kare, agar kal ko Bhabhi ko kuch bhi ho jaaye; toh pata nahi yeh ladka aakhir apna jeevan kaise vyatit karega."

Yeh sunte hi Raju ki Maa ki aankhen bhar aayi. Raju ki Maa ko aisa dukhi dekh kar us aurat ne phir kaha, "Are Bhabhi. Aap dukhi na ho. Maine toh bas aise hi keh diya. Aakhir kabhi na kabhi toh woh apne jeevan mein akela toh padega hi. Agar ishwar ne thodi bohut buddhi di hoti toh, woh bhi apne jeevan ke saath kuch kar leta. Ab ishwar ne kuch logon ko buddhi-heen banaya hain toh, ismein hamare Raju ka kya dosh." Raju ki Maa ko apne haal par bohut rona aa raha tha aur woh yahi prathna kar rahi thi ki kaise bhi karke woh auranten waha se chali jaaye. 

Tabhi waha par Krishna aa pohuchta hain aur woh un aurton se kehta hain ki, "Aap sabhi logon ko aapke bacche dhoondh rahe hain." Un auranton ko Krishna par bohut gussa aata hain aur woh bina use kuch kahe waha se chale jaate hain. Ab Raju ki Maa se apna kast saha nahi jaa raha tha aur woh phont-phont kar rone lagi. 

Krishna Raju ki Maa ko samjhate hue kehta hain, "Are Bhabhi aap dukhi mat hoiye. Yeh log toh bas aise hi bakwaas karti rehti hain. Aap toh bohut mazboot ho na. Bhaiyaa ke jaane ke baad, aap hi ne toh itne acche se apna ghar sambhala hain."

Raju Ki Maa rote hue kehti hain, "Lekin kab tak Krishna ? Aakhir aisa kab tak chalega ? Sahi kaha hain in auranton ne, kal ko mere jaane ke baad, is sansaar mein yeh ladka aakhir jeeyega kaise ? Yeh bad-dimag ladka kaise apna guzar basar kar paayega ? Koun karega is se shaadi ? Shaadi toh dur ki baat, yeh khud ko sambhalne ke bhi layak nahi hain."

Krishna kuch der sochta hain aur phir kehta hain, "Bhabhi aap isi samay mere saath chaliye."

Raju Ki Maa - "Lekin kaha par Krishna ?"

Krishna - "Sarpanch Ji ke yahan. Woh bade dayalun hain. Yeh baat aap bhi jaanti ho. Ab wahi Raju ke liye kuch na kuch karenge."

Raju Ki Maa is baat ke liye tayyar ho jaati hain aur dono Sarpanch Ji ke ghar jaa pohuchte hain. Un dono ko ek saath apne yahan dekh kar, Sarpanch Ji ko aabhas ho jaata hain ki koi na koi baat zaroor hogi. Woh badi vinamrata se un dono ko andar aane ke liye kehte hain. Dono andar aate hain. 

Sarpanch - "Aao Krishna."

Krishna - "Namastey Sarpanch Ji."

Sarpanch - "Baith Jaao Krishna. Raju ki Maa tum bhi baith jaao."

Dono wahan par baith te hain. 

Sarpanch - "Batao kaise aana hua ?"

Krishna - "Sarpanch Ji. Main aapse kuch baat karna chahta hoon."

Sarpanch - "Haan kaho."

Krishna - "Aaj sandhya ki baat hain. Main apna kaam samaapt karke apne ghar ki aur jaa hi raha tha ki maine gaon ke kuch auranton ko Raju ke ghar ke bahar dekha. Sabse pehle toh veh log is baat par bhabhi ka uphaas uda rahe the ki, woh Bitto ki shaadi mein aakar kya karengi. Ab Raju ki haalat toh aapse bhi chupi nahi hain. Phir uske baad, unhone Raju ke bhavishya ko lekar tanj kaste chale gaye."

Raju Ki Maa rote hue kehne lagi, "Aap toh jaante hain ki, mere alaawa Raju ka is sansaar mein koi nahi hain aur uski dimaagi haalat santulit nahi hain. Kal ko mere jaane ke baad, woh kaise jeeyega ?"

Sarpanch Ji - "Uski chinta aap na kare. Raju ke bhavishya ki zimmedari meri hain. Log kya kehte hain, woh sab aap jaane dijiye. Bas Raju ka acche se laalan-poshan kariye. Baaki aapke har sukh-dukh mein hum aapke saath khade rahenge."

Raju Ki Maa - "Dhanyawad Sarpanch Ji."

Phir Raju Ki Maa aur Krishna waha se chale jaate hain. Unhe yeh baat nahi pata hoti hain ki, jis samay woh auranten use zaleel kar rahi thi, woh sab kuch Raju chupke se sunn raha tha. Raju ko is beizzati ka gehra sadma laga tha aur woh apne ghar mein akela tha. Woh bohut roya. Raju ko apne aap par dayaa aa rahi thi aur apne bhagya par krodh aa raha tha. Tabhi Raju ko ek baat yaad aayi jo usne apne gaon ke ek vidwaan se suni thi, "Manushya yadi chahe toh woh kathin parishram karke vidhi ke vidhaan ko bhi badal sakta hain."

Ab Raju apna adhiktar samay gaon ke vidwaano ke aas paas bitane laga. Bohut si baatein use samajh mein na aa paati toh woh unse prashn karta aur woh log use bade pyaar ke saath samjhate. Aisa kaafi lambe samay tak chalta raha. Dekhte Hi Dekhte Raju ke soch mein, uske baat-cheet mein aur uske rehan-sehan mein parivartan aana shuru hua. Yeh dekh kar gaon ke sabhi log aashcharya-chakit ho gaye.

Ek din ki baat hain, gaon mein panchayat baithi hui thi aur nadi ke paani ka badhta starr gaon ke liye chinta ka vishay bana hua tha. Tabhi gaon ke ek vyakti ne kaha, "Nadi ka paani ka starr prati din badhta jaa raha hain aur baandh kamzor padta jaa raha hain. Hamare bacche vidyalay usi baandh ko paar karke hi jaate hain. Agar samay rehte is samasya ko suljhaya nahi gaya toh, badi aapda aa sakti hain."

Gaon ke dusre vyakti ne kaha, "Koi dusra baandh bana dete hain. Lekin, is karya mein samay bhi lagega. Par yeh bandh bhi kab tak tikega kuch pata nahi hain. Dher saari lakdiyaan bhi kaantni padegi."

Sabhi chup the aur chintit bhi. Tabhi achanak se Raju ke muh se nikal jaata hain, "Kyun na hum baandh ko pakka banaye. Agar hamare ghar pakke ban sakte hain toh baandh lakdi ke hi kyun ? Baandh bhi toh hum pakka banaa sakte hain."

Raju ke muh se yeh baat sunkar sabhi log dang reh gaye. Kisi ne bhi is samasya ko is drishtikon se nahi dekha tha, jis drishtikon se Raju ne dekha. 

Tabhi Sarpanch Ji kehte hain, "Raju ne bohut hi satik hal bataya hain. Hume aisa hi karna chahiye." 

Sabhi ne Raju ki samajhdaari par bohut khushi vyakt ki. Tabhi Krishna ne kaha, "Is sansaar mein har ek manushya ko ek sahi disha dene ki aavashyakta padti hain. Har manushya tabhi tak buddhi heen hain, jab tak ki use sahi disha na mile." 

Ab Sarpanch Ji ne kaha, "Raju ab tum bade ho chuke ho. Apne umar ke baccho se tum zyada samajhdaar ban chuke ho. Tumhe ab apna aur apni Maa ka khayal rakhna sikhna chahiye. Aaj ki tumhari yeh baat un sabhi logon par ek zordaar tamacha hain, jinhe lagta hain ki tum apne jeevan ke saath kuch nahi kar paaoge."

Raju Ki Maa ko apne bete ki samajhdaari par garv mehsus ho raha tha. 

Tabhi Raju kehta hain, "Maine yeh gyaan aap logon se hi arjit kiya hain. Kaafi lambe samay se main gaon ke vidwaano ke saath apna adhiktar samay vyatit kar raha hoon. Yadi aapko yeh shrey dena hain, toh kripya karke yeh shrey aap hamare vidwaano ko dijiye."

Raju Ki Maa ki aankhein bhar aati hain aur ab woh aashwast ho chuki hain apne bete ke bhavishya ko lekar. Woh samajh chuki hain ki, is sansaar mein samay ne har kisi ke bhavishya ke liye koi na koi yojna banayi hui hain. 

                 - Ved Vineet Gautam