Bodh

 Udit Bhandari ek company mein naukri karte the. Filhal woh retire ho chuke hain. Unki patni ka naam Anuradha Bhandari hain. Us dampati ke teen bacche hain. Do bete aur ek beti. Bade bete ka naam Chirag hain. Uske baad us dampati ki dusri santaan unki beti hain, jiska naam Myra hain aur unki teesri aur aakhri santaan ka naam hain Vihaan. 

Myra aur Vihaan alag-alag company mein naukri karte hain. Jabki Chirag ghar mein bas bekaar pada baitha hain.

Ek waqt tha jab Chirag ka business accha khaasa chal pada tha. Lekin, doston se mile dhokhe se woh karz mein doob chuka tha. Jise utarne ke liye use apni company bech deni padi. 

Kaafi samay tak sangharsh karne ke bawjood, Chirag ko vyapaar mein dubara apne pair jamane mein, safalta prapt nahi ho paayi. 

Chirag, jo ki ghar ki aankhon ka pehla taara tha. Jo ki ghar ki shaan kehlata tha aaj woh Chirag kisi andhere mein kahi gum ho chuka hain. Jeevan ki asafltaon ne Chirag ko andar se itna tod diya hain, ki uske mann ki mashaal ab jyot ka saath nahi nibha paa rahi hain. Aur apni is peeda ko dur karne ke liye, Chirag ne sharaab ka sahara lena shuru kar diya hain. Uski is nayi aadat ke baare mein, ghar ke har sadasya ko poori jaankari hain. Lekin, ghar wale filhal Chirag se kuch nahi kehte hain. Veh log chup hain, is ummeed se ki, ek na ek din Chirag apne Mann mein dafn aatmavishwas ko dubara ujaagar karega aur vijayi ban kar laut aayega. 

Ek din, ki baat hain. Har roz ki tarah us shaam bhi Chirag pee kar ghar lauta tha. Ghar ka darwaza khula tha aur nashe mein dhutt, Chirag ghar ke andar ghusa. Ghar ke sabhi sadasya uski harkat ko dekh rahe the. Andar aate hi, Chirag do kadam chala aur phir woh dhadaam se farsh par gir gaya. Udit aur Vihaan turant daude Chirag ki aur. Lekin, woh behosh ho chuka tha. Un dono ne Chirag ko uthaya aur use, uske kamre mein le gaye. Phir unhone use bed par leta diya aur woh dono dubara Hall mein aaye.

Hall mein aate hi, un dono ne dekha ki Anuradha ro rahi hain. Uski aankhon se behte aansun rukne ka naam hi nahi le rahe the. Yeh dekh kar Udit ne kaha, "Mat ro tum Anuradha sab kuch thik ho jaayega."

Anuradha - "Lekin kab thik hoga ? Kaise thik hoga ? Jis ghar ka bada ladka hi  apni zimmedariyon se apna muh mod le, us ghar ka kya bhavishya hoga ? Waqt tezi se beet ta jaa raha hain, Myra ki shaadi kaise hogi ? Bhagwaan na kare, ek baar umar nikal gayi toh, koun karega is ladki se shaadi ? Aur filhal, hum aakhir kis muh se Myra ka rishta kisike darwaze le jaaye ? Saara samaaj jaanta hain, ki ghar ka bada ladka har pal sharaab ke nashe mein dooba rehta hain."

Udit - "Sabr rakho Anuradha. Filhal Chirag ka jeevan bohut kharab daur se guzar raha hain. Lekin, yeh samay bhi beet jaayega. Filhal hamara ladka bhatka hua hain. Toota hua hain. Bas use thoda sa waqt do. Dekhna, woh khud hi apni zindagi ki gaadi ko ek sahi disha mein le jaayega."

Anuradha - "Pata nahi ab aur kya-kya dekhna baaki hain zindagi mein."

Udit - "Yeh din bhi beet jaayenge."

Uske baad, sabhi apne-apne kamre mein sone ke liye chale jaate hain. 

Agle din, Chirag ki neend khulti hain. Uska sar dard se phant raha tha. Maano jaise kisi ne uske sar par bomb ke gole barsaaye ho. Woh apne bistar par se uthta hain. Phir woh basin par jaakar apna muh dhota hain aur uski nazar aaine par padti hain. Aaine mein apni shakal dekh kar woh dang reh jaata hain. Chirag ke dono aankhon ke neeche kaale dhabbe hote hain aur chehre par halki-halki jhurriyan bhi dikh rahi hoti hain. 

Chirag sochta hain, 'Aakhir yeh maine khud ko kya bana liya hain ? Aakhir meri manzil kya hain ? Meri zindagi kis mod par pohuchegi ? Kya jeevan mein main kabhi is duvidha se bahar nikal bhi paaunga ?'

Tabhi Chirag ko aabhas hota hain ki koi uska darwaaza khatkataa raha hain. Woh bathroom se bahar nikalta hain aur dekhta hain ki Udit waha par khada hain. Chirag ko dekhte hi, Udit muskurata hain aur kehta hain, "Toh tum uth gaye beta ?"

Chirag 'Haan' mein apna sar hilata hain. Phir Udit kehta hain, "Beta jaldi se tum tayyar hokar Hall mein aa jaao. Aaj tumhare liye bohut hi accha surprise hain."

Chirag - "Woh kya Papa ?"

Udit - "Jab tum bahar aaoge, tumhe khud hi pata chal jaayega."

Chirag muskurata hain aur Udit waha se chala jaata hain. Thodi der ke baad, woh tayyar hokar Hall mein aata hain aur dekhta hain ki, table par alag-alag tarah ke vyanjan parose hue hain. Aaloo Gobhi ki sabzi, Paratha, Kheer. Yeh sab vyanjan Chirag ke pasand ke hain. Tabhi Udit peeche se aata hain aur Chirag ke kandhe par haath rakh deta hain. Chirag apni gardan ghuma kar dekhta hain aur Udit ko dekh kar muskurata hain. Phir Udit kehta hain, "Beta aaj sab kuch tumhare pasand ka bana hua hain. Aaj tumhara din hain."

Chirag - "Thank You Papa."

Udit - "Chalo baitho jaldi se nahi toh khana thanda ho jaayega."

Chirag baithta hain aur saath hi saath ghar ke baaki sadasya bhi baithte hain. Sabhi log saath mein khanaa ka sevan karna shuru kar dete hain. Tabhi Vihaan kehta hain, "Bhai aaj kaafi dino ke baad sabhi log saath mein baithkar khaana kha rahe hain. Mazaa aa gaya aaj toh."

Myra - "Kaam se fursat hi nahi mil paata hain. Jis wajah se hum log saath ho nahi paate hain."

Anuradha - "Beech-Beech mein tum logo ko apne kaam se waqt nikalte rehna chahiye. Taaki poora parivaar zyada se zyada samay ek dusre ke saath mein bitaye."

Udit - "Haan bhai yeh baat toh hain. Aur waise bhi, aaj hum log aaj saath baithe hain; toh uske peeche ek wajah hain."

Anuradha - "Aur woh wajah kya hain ?"

Udit - "Dekho maine Myra ke liye ek ladka dekha hain. Ladka bada hi sundar aur sushil hain. Uski tasveer bhi mere phone mein hain."

Udit apni jeb se phone nikalta hain aur woh us ladke ki tasveer sabse pehle Anuradha ko dikhata hain. 

Anuradha - "Ladka dikhne mein toh bohut hi zyada sundar hain. Myra zara dekho toh tumhe pasand aa raha hain ki nahi yeh ladka."

Myra sharmate hue kehti hain, "Mummy main kaise dekhun ?"

Vihaan - "Are bhai dekh lo. Kahi agar kal ko shaadi ke baad, ladka pasand nahi aaya, toh aap saari zindagi humse muh phoola kar baith jaaogi."

Myra - "Vihaan tum bhi na."

Myra tasveer dekhti hain aur us ladke ki tasveer dekh kar muskurati hain.

Udit - "Kyun beta pasand aaya ladka ?"

Myra sharmate hue kehti hain, "Ab main kya kahoon Papa. Aakhir main aapki iccha ke virudh kaise jaa sakti hoon."

Sabhi log hasne lagte hain. Tabhi Chirag kehta hain, "Ladka kaam kya karta hain Papa ?"

Udit - "Beta woh ek businessman hain. Us ladke ka kapdon ka karobaar hain."

Chirag - "Phir yeh toh bohut hi accha rishta hain."

Udit - "Haan beta."

Vihaan - "Accha Papa yeh ladka rehta kaha par hain ?"

Udit - "Ladka Delhi mein rehta hain."

Anuradha - "Aur ladke ke ghar mein koun-koun hain ?"

Udit - "Ladka apne Maata-Pita ke saath rehta hain aur woh unki iklauti santaan hain."

Vihaan - "Yeh toh aur acchi baat hain. Hamari laadli behan apne sasural mein raaj karegi."

Myra sharmati hain.

Anuradha - "Accha toh ab ladke se milna kab hain ?"

Udit - "Bas Myra ki haan karne ki deri hain. Agar Myra ko aitraaz na ho, toh main jald se jald unhe ghar par bula lunga."

Anuradha - "Myra. Tera dil kya kehta hain beta ? Ladke se milna chahegi ?"

Myra 'Haan' mein apna sar hilati hain.

Udit - "Toh thik hain. Main un logon se baat kar leta hoon."

Agle din, Udit ladke walon se baat karta hain aur ghar mein sabko batata hain ki, woh log agle hafte aane wale hain. Ghar mein sabhi log bohut khush hote hain aur aane wale mehmaan ke swaagat ki tayyari karna shuru kar dete hain. Sabhi isi ummeed mein rehte hain, ki yeh rishta hansi-khushi tay ho jaaye. Ghar mein sabhi log yahi lag raha tha ki shayad, Myra ke jeevan ke taar isi ghar se jud jaaye.

Ladke walon ke aane ke ek din pehle, Chirag bahar jaata hain aur kuch der baad laut aata hain. Sabhi log dekhte hain ki, Chirag ne apni daadhi banwaa li hain aur apne baal bhi sahi dhang se katwaa liye hain. Chirag mein yeh badlaav dekh kar ghar ke sabhi log bohut khush hote hain. Khaas kar sab log is baat se zyada prasanna hote hain ki, Chirag ne yeh kaam bina kisi ke kehne par kiya.

Agle din, ladke wale ghar mein dastak dete hain. Ghar ke sabhi sadsya unka bade hi khushi aur samman ke saath ladke walon ka swaagat karte hain. Sabhi log ghar ke andar aate hain. Tabhi Udit kehta hain, "Kripya aap log sthaan grahan karke hamare ghar ki shobha badhaiye."

Ladke wale sofa par baithte hain. Uske baad, ghar ke baaki log bhi saath mein baithte hain. Tabhi Udit kehta hain, "Bataiye main aap log kya lena pasand karenge."

Ladke Ke Pita - "Bhaisahab hum log zara dur se aaye hain. Toh agar ek cup garma garam Chai mil jaati toh accha hota."

Udit - "Adrak wali Chai lena pasand karenge ?"

Ladke Ke Pita - "Yeh toh sone pe suhaaga ho jaayega."

Udit - "Anuradha... Sunti ho."

Anuradha turant Hall mein aati hain.

Anuradha - "Haan Ji."

Udit - "Zara adrak wali Chai leti aana."

Anuradha - "Ji main abhi laayi."

Phir Anuradha andar chale jaati hain. 

Udit - "Aur bataiye Bhaisahab aapka karobaar kaisa chal raha hain ?"

Ladke Ke Pita - "Ji bas thik thak chal raha hain. Dekhiye bhaisahab main bohut hi khule dil ka aadmi hoon. Main jo bhi kehta hoon saaf-saaf kehta hoon. Filhal hamara karobaar zara kharab stithi mein chal rahi hain. Shayad aap yeh bhi soch rahe honge ki jab karobaar khasta chal raha hain, toh phir bhi main kyun aapke darwaaze aaya hoon. Darasal hum log apne liye ek acchi sundar aur sushil bahu chahte hain. Jeevan ka kya bharosa, kab jaane kab kya ho jaaye. Isiliye hum dono marne se pehle apni bahu aur naati-pote ka sukh bhog kar hi jaana chahte hain. Isiliye hum yahan par aaye hain."

Udit - "Agar aap logon ko koi iccha ho toh bataiye."

Ladke Ke Pita - "Hamari koi bhi iccha nahi hain. Bas aap logon ko hamara ladka pasand aa jaaye, toh hum rishta tay kar sakte hain."

Udit - "Bhaisahab yeh aapka baddakpan hain ki aapne itne khule dil aur itni saralta se apni baat kahi. Aur main bhi isi namrata ke saath apni ek baat kehna chahunga."

Ladke Ke Pita - "Ji haan Bhaisahab kahiye."

Udit - "Main is baare mein ek baar apni patni se aur apni beti se rai lena chahunga. Agar aap ijaazat de toh."

Ladke Ke Pita - "Ji haan zaroor. Kyun nahi ?"

Udit - "Lekin us se pehle main yeh bhi chahta hoon, ki ek baar aap log meri beti ko dekh lijiye."

Ladke Ke Pita - "Jaisi aapki iccha."

Udit - "Anuradha zara Myra ko bahar laana."

Thodi der baad, Anuradha Myra ko Hall mein le aati hain aur use Udit ke bagal mein baitha deti hain. Myra ki aankhen farsh par tiki hui thi.

Ladke wale Myra ko dekh kar bohut prasanna hote hain.

Tabhi Udit ladke ke pita se poochta hain, "Aapko hamari beti kaisi lagi ?"

Ladke Ke Pita kehte hain, "Ati-Sundar." Phir woh apne bete ki taraf mudkar dekhte hain aur kehte hain, "Beta tum batao. Tumhe ladki kaisi lagi ?"

Ladka - "Ab main kya bataun."

Ladke Ke Pita - "Bas itna keh do pasand hain ya nahi ?"

Ladka - "Haan pasand hain."

 Ladke Ke Pita - "Bhaisahab hamari taraf se 'Haan' hain. Bas ek baar aap Bhabhi ji se aur apni beti se bhi rai mashwara kar lijiye."

Udit Myra ki taraf dekhte hue, "Tum batao beti tumhara dil kya kehta hain ?"

Myra 'Haan'mein apna sar hilati hain.

Ladke Ke Pita - "Dekho beti. Yeh baat main aapke pita se bhi keh chuka hoon aur aapse bhi kehna chahta hoon. Filhal hamari zindagi mein kaale baadal chaaye hue hain. Aur hum apni bete ki shaadi isilye karana chahte hain ki marne se pehle hum dono Miyan-Biwi apna parivaar hote hue dekh sake. Main is baat ka vaada toh nahi kar sakta hoon, ki main tumhe jeevan ka har sukh de paaunga. Lekin, hamari taraf se tumhe hamesha dher saara pyaar milega."

Myra - "Zindagi mein utar-chadaav toh aate hi rehte hain. Jeevan mein, dil se jude hue rishte milne chahiye. Bas hum sab pyaar aur lagaav ke saath ghar mein rahe, toh kam mein bhi hanste-khelte zindagi kat jaayegi."

Ladke Ke Pita - "Aapka bohut-bohut dhanyawad beta."

Udit - "Toh kya ab main yeh rishta aapki taraf se pakka samjhun ?"

Ladke Ke Pita - "Ji Bilkul."

Tabhi Ladke Ke Pita ki nazar dono ladko par jaati hain aur woh Udit se kehte hain, "Bhaisahab aapke dono ladke kya kaam karte hain ?"

Udit - "Chota beta naukri karta hain aur bade bete ka pehle vyapaar tha. Lekin, ab poori tarah se band ho chuka hain. Agar aap ise zara maargdarshan de sake, toh bohut meherbani hogi."

Ladke Ke Pita Chirag ke pass jaate hain aur kehte hain, "Dekho beta jeevan mein utaar-chadaav laga hi rehta hain. Jeevan mein mili kisi bhi asaflta se kabhi bhi niraash nahi hote hain. Beta tum bas apna dhairya bana kar rakho aur sahaas ke saath maarg par chal pado. Ab toh hum rishtedar bhi banne jaa rahe hain, toh kabhi koi bhi pareshani ho toh humse khul kar baat karna."

Chirag - "Ji Uncle."

Chirag ko is baat ka bodh ho jaata hain ki, jeevan mein hamare apno ke saath bitaya hua samay aur unse mila hua pyaar aur sneh mein hi jeevan ka asal sukh hain.

                         - Ved Vineet Gautam