Dridh

 Sanjay Kumar peshe se ek vyapaari hain. Unki patni ka naam Surekha Kumar hain. Sanjay aur Surekha ka ek beta hain. Us ladke ka naam, Anuj Kumar hain. Sanjay ek Khilono ki factory ke Maalik hain. Anuj, School mein padhayi karta hain. Sanjay ka vyavasay bhi accha chal raha hain. Sanjay har roz subah tayyar hokar apni Factory mein jaata aur shaam mein apne ghar laut aata. Phir woh teen logon ka Parivaar aapas mein dher saara waqt beetate. Sab kuch accha chal raha tha. 

Ek din ki baat hain. Sanjay apni Factory mein tha. Woh apne Cabin mein baithkar bade dhyaan se, kaam kar raha tha. Tabhi use shor-sharaabe ki aawaaz sunayi di. Woh apni kursi se uthta hain aur apne Cabin ke bahar chala jaata hain. Cabin se bahar aate hi, Sanjay paata hain ki; kuch Workers aapas mein lad-jhagad rahe the. Woh wahan par jaata hain aur zor se chillata hain, "Sab log shaant ho jaao."

Sanjay ki aawaaz sunkar, sab log khaamosh ho jaate hain aur woh sabhi workers Sanjay ki aur dekhne lagte hain. Phir Sanjay kehta hain, "Kya hua ?"

Ek Karmachari : - "Sir na jaane kis baat ko lekar Factory ke workers ke beech jhagda ho gaya."

Ek Worker : - "Sahab Ground Floor waale Workers kabhi bhi hamare Floor par aa jaate hain aur hamare Purifier ka Paani peete hain."

Dusra Worker : - "Jaise tum log Ground Floor par aakar hamare Purifier ka Paani nahi peete ho."

Sanjay : - "Bas itni si baat ? Paani peena sabka adhikaar hain. Koi bhi, kahi bhi, kisi bhi Floor par jaakar; Paani pee sakta hain."

Teesra Worker : - "Sahab yahan par kuch Workers hamara tools istemaal karte hain apne kaam ke liye."

Sanjay : - "Apne kaam ke liye ? Tools toh Factory ke kaam ke liye istemaal hota hain na ?"

Chautha Worker : - "Haan lekin yeh log humse bina puche hamara Tools istemaal karte hain."

Sanjay : - "Tools aapka nahi, Factory ka hain. Waise bhi agar kisi ka koi tool kharab ho jaata hain, toh woh dusre aadmi ka ya kisi dusre Floor par jaakar bhi wahan ka tool istemaal kar sakta hain apne kaam ke liye. Aap sab log bade ho, samajhdaar ho, aap sab log mil-julkar saath mein kaam karo na."

Sab Workers khaamosh ho jaate hain. Kuch der ke baad, sabhi Workers apne-apne kaam ke liye chale jaate hain. Sanjay apne Cabin mein jaata hain aur woh 200 Tools ka order de deta hain, jabki Factory mein kaam karne wale Workers sirf 100 the. 

Kuch dino baad ki baat hain. Sanjay apne Cabin mein baithkar kaam kar raha tha. Tabhi ek Karamchari uske Cabin ka darwaaza khat-khatata hain. Sanjay us Karmchari ko ishaare se andar aane ki anumati de deta hain. Andar aate hi, woh Karamchari kehta hain, "Good Afternoon Sir."

Sanjay - "Good Afternoon Pravin. Baithiye."

Pravin baith jaata hain. Phir Pravin kehta hain, "Sir yeh Bank se kisi tarah ka notice aaya hua hain." Yeh kehte hue, Pravin ek lifafa Sanjay ki aur badhata hain. Sanjay woh lifafa leta hain aur Pravin se "Thank You" kehta hain. Pravin chala jaata hain. 

Sanjay us lifafe ko kholta hain. Lifafe mein ek Kaagaz tha. Woh Kaagaz kholta hain aur use padhna shuru karta hain. Lifafe mein likha tha, 'Mr. Sanjay Kumar aapne Bank se jo Do Crore ka karz liya tha, use aap abhi tak poora chuka nahi paaye hain. Bank aapko Teen mahine ki mohlat de rahi hain. Aapne wale in teeno mahino mein aapko aur teen notice Bank ki taraf se prapt honge. Agar in teen mahino mein aapne Bank se liya hua karz chukane mein asamarth rahe, toh majburan Bank ko aapki Factory apne kabze mein leni padegi.'

Is notice ko padhte hi, Sanjay ke pairon tale zameen khisak jaati hain. Uske maathe par paseena aane lagta hain. Woh ghabrahat mehsus kar raha tha. Woh apne table par pade hue Glass ko uthata hain aur woh do ghunt Paani peeta hain. Kuch shan ke liye woh apni Kursi par baitha rehta hain. Phir woh sochta hain, 'Mujhe koi na koi raasta toh nikaalna hi padega. Agar main waqt rehte kuch nahi kar paaya toh main sadak par aa jaaunga.'

Sanjay aage sochta hain, 'Lekin main karun, toh kya karun ?'

'Agar maine Factory bech di... Lekin, main Factory kaise bech sakta hoon ? Factory toh Bank ke paas girvi hain.'

'Kya main apna ghar bech doon ?'

'Lekin agar maine ghar bech diya, toh main Surekha aur Anuj ko kaha par rakhunga ? Kisi saste se Makaan mein  mere Biwi-Bacche aakhir kis tarah ki zindagi guzaarenge ? Main unhe kaisa bhavishya de paaunga ?'

Sanjay bohut tanaav mein aa chuka tha. Woh apna sar apni kursi par tika deta hain. Woh sochne lagta hain. Woh sochta hain, ki aakhir woh is waqt kya-kya kadam utha sakta hain. Woh kaise is musibat se chutkaara paa sakta hain. Tabhi achaanak se, Sanjay ka Phone bajta hain. Sanjay phone uthata hain aur kehta hain, "Hello."

Phone uthate hi, dusri aur se aawaz aati hain, "Are aap kaha par ho ? Aap abhi tak ghar nahi pohunche ?"

 Sanjay - "Are haan Surekha bolo."

Surekha - "Kya bolo ? Bhool gaye ? Aaj aap Anuj ke School aane wale the. School mein aaj Parents-Teachers ki meeting hain."

Sanjay - "Are haan. Main bhool gaya tha. Main abhi nikalta hoon."

Sanjay apne Cabin se nikalta hain aur woh apne kuch Karmachariyon se thodi-bohut baat karke Factory ke bahar aa jaata hain. Phir woh apni Car mein baithkar Anuj ke School ke liye nikal padta hain. Sanjay Car chala raha tha. Uske Car ki gati dheemi thi. Tabhi use Bank se mile hue us notice ka khayal aaya aur ghabrahat mein, Sanjay ka pair Car ke Accelerator par aur zyada dabaav bana diya. Jisse ki Car ki gati aur badh gayi. Tabhi achaanak se ek Truck Sanjay ke Car ke saamne aaya aur us Truck se bachne ke liye, Sanjay ne apni Car ka Staring ghumaya. Sanjay ne Car as apna niyantran kho diya aur uski Car ek ped se jaa takraayi. 

Sanjay ka accident ho gaya. Sadak par kuch log Sanjay ko Car se bahar nikaale aur use aspataal mein bharti karwaaye. Sanjay ke accident ki khabar, aspataal ki taraf se Surekha ko di gayi. Woh turant Anuj ko lekar School se aspataal pohunchi. Aspataal pohunch kar Surekha ne Doctors se Sanjay ki tabiyat ka haal puncha. Doctors se puch-taach karne par pata chala ki is waqt Sanjay behosh hain aur use hosh mein aane mein, ek se do din lag sakta hain.

 Doctor ne yeh bhi bataya ki, Sanjay ke pair ki haddi toot gayi hain aur use aspataal se chutti milne mein hafta do hafta ka waqt lag sakta hain. 

Kareeb pandrah din tak ilaaj chalne ke baad, Sanjay ko aspataal se chutti mil jaati hain. Sanjay ghar pohunchta hain. Lekin, uske chehre par zara si bhi khushi nazar nahi aa rahi thi. Yeh dekh, Surekha puchti hain, "Kya aap mujhse naaraz ho ?"

Sanjay - "Nahi."

Surekha - "Toh kya aapko kisi cheez ka tanaav hain ?"

Sanjay 'Na' mein apna sar hilata hain. 

Surekha - "Phir ?"

Sanjay - "Phir matlab ?"

Surekha - "Aap khush nahi lag rahe ho."

Sanjay - "Bas zara si thakaan hain."

Surekha - "Aap aaram kariye, main khaana lagwaati hoon."

Sanjay - "Thik hain."

 Surekha ghar ke naukaron se khaana lagwaati hain. Sanjay, Surekha aur Anuj ke saath baithkar khaana khaata hain. Phir woh log sone ke liye chale jaate hain. 

Agle din, Sanjay subah uth ta hain aur woh apne kamre se bahar nikalta hain. Sanjay ko dekhte hi, Surekha kehti hain, "Uth gaye aap ? Jaldi se aap tayyar ho jaaiye, main naashta lagwati hoon."

Sanjay tayyar hokar kamre se bahar aata hain. Sanjay ko suit aur joote mein dekh, Surekha kehti hain, "Yeh kya ? Doctor ne aapko Office jaane ke liye abhi ijaazat nahi di hain. Abhi agle hafte  se aapko Office jaana hain."

Sanjay - "Tum samajhti nahi ho. Kaam hain zara sa."

Surekha - "Zara sa hi kaam hain na ? Ghar se kar lijiye."

Sanjay - "Lekin..."

Sanjay ki baat kaat te hue, Surekha kehti hain, "Lekin-Wekin kuch nahi. Aap Laptop par ghar se kaam kar lijiye."

Sanjay kuch shan sochta hain aur kehta hain, "Thik hain."

Sanjay sochta hain, 'Kam Se Kam isi bahane Parivaar ke saath kuch shan beetane ka mauka toh mil hi raha hain. Kal kya hoga, koun jaane.'

Sanjay, Pravin ko phone lagata hain aur woh sabhi zaroori files aur documents apne ghar mangwa leta hain. Sanjay ke paas waqt bohut kam tha aur kaam bohut zyada. Bank ka karz chukane ke liye mehaz Do mahine hi bache the. 

Sanjay ne socha, ki woh is musibat se tabhi bahar nikal paayega, jab woh zyada se zyada bikri karne mein kaamyaab ho jaayega. 

Sanjay ne socha, 'Ghar se bahar toh main jaa nahi sakta. Is wajah se, Factory ka haal mujhe pata hi nahi chal paayega. Lekin, main ghar baithe-baithe online kaam karne wale team ka toh kaam dekh hi sakta hoon.'

Sanjay ne apne Company ke online team ke Head ko Call lagaya aur unse saaf-saaf kaha ki woh, har ek ghante par use Call karke apne kaam ke baare mein bataye. 

Kuch din beet gaye. Lekin, Sanjay ke kaam mein koi tarakki nahi hui. Sanjay ke mann din prati din, vichlit hota jaa raha tha. Ab uska tanaav bhi badh chuka tha. 

Ek din ki baat hain. Sanjay ko uske ek Karmachari ka Call aaya. Sanjay ne Call uthaya aur kaha, "Hello."

Karmachari - "Sir main Online Team ka Head Nikhil bol raha hoon."

Sanjay - "Haan Nikhil bolo."

Nikhil - "Sir woh abhi Kids Flower School se Call aaya hain. Abhi Children's Day aane wala hain. Toh baccho ko School mein Khilone baante jaayenge."

Sanjay - "Acchi baat hain. Tum unse order le lo."

Nikhil - "Lekin woh humse Discount ki ummeed kar rahe hain."

Sanjay - "School se kaho ki hum unhe 5 Pratishat ka Discount de denge. Aur agar woh hume dus laakh ya usse se zyada ka order de dete hain, toh hum unhe 10 Pratishat ka Discount de denge."

Nikhil - "Thik hain Sir."

Sanjay - "Aur unse aage jaisi baat hoti hain, toh tum mujhe turant bata dena."

Nikhil - "Thik hain Sir. Toh main Call rakh deta hoon Sir."

Sanjay - "Thik hain. All The Best Nikhil."

Nikhil Call kaat deta hain. 

Agle din, Nikhil batata hain ki usne Order le liya hain. Sanjay Nikhil ko aadesh deta hain ki, Maal ki delivery aaj ke aaj hi ho jaani chahiye. Nikhil bhi samay se School mein Khilono ki delivery kar deta hain. 

Sanjay Bank ke kuch paise chuka deta hain. Sanjay ko aur bhi bade-bade orders aate hain. Kuch School se, kuch dukaano se, toh kuch orders Malls se bhi milte hain. Dheere-Dheere Sanjay Bank ke saare karz chukaane mein safal ho jaata hain. 

Ek din ki baat hain. Sanjay apne Cabin mein baitha hua tha. Woh bilkul tanaav-mukt tha. Woh akele baitha soch raha tha, 'Chalo accha hua, jo ki is karz se mukti mil gayi.'

'Ab dheere-dheere Zindagi ki gaadi ko aage kheechna hain. Aur zyada orders kahi se mile toh mazaa aa jaaye.'

Tabhi achaanak se Sanjay ke dimaag mein khayal aaya, 'Agar mera apna Khilono ka Store ho toh kaisa rahega ?'

Phir dusra khayal aaya, 'Agar mera Store har shahar mein ho toh kaisa rahega ? Lekin uske liye, Bank se bada karz lena padega. Shuruaat ek Store se karta hoon. Uske baad, dheere-dheere is Karobaar ko aage badhata jaaunga.' 

Ab Sanjay apne Karobaar ke vistaar ke baare mein sochne lagta hain. Woh apne Khilono ke Store ka registration karwaata hain. Phir woh Bank se loan leta hain aur ek jagah dekh kar apna pehla Khilono ka Store khol deta hain. Sanjay ab apni mehnat dugni kar deta hain. Kyunki uska kaam bhi dugna ho gaya tha. Factory ke saath-saath, Sanjay ko Store ka bhi kaam dekhna tha. Is dauraan kai baar, woh tanaav-grast bhi mehsus karta tha. Lekin, uska aatma-vishwas behad majboot tha. Sanjay ka nischay dridh tha.

Dekhte Hi Dekhte ek saal mein hi, uska yeh Karobaar bhi munaafe mein aa jaata hain. 

Paanch saal ki kadi mehnat ke baad, Sanjay ke Khilono ka Store poore Desh mein safalta-purvak khul jaata hain. 

                           - Ved Vineet Gautam