Amit Kumar peshe se ek vyapaari hain. Unki patni ka naam Suchitra Kumar hain. Amit aur Suchitra ke do ladke hain. Bade bete ka naam, Nikhil Kumar hain aur chote bete ka naam, Nitin Kumar hain. Nikhil aur Nitin dono mein keval do saal ka antar hain aur woh dono hi, Amit ke saath vyapaar mein haath bantate hain. Haal hi mein, Nikhil ki Shaadi hui hain. Nikhil ki patni ka naam, Aarti hain.
Har subah teeno baap-bete tayyar hokar apni dukaan par jaate hain aur shaam mein apne ghar laut aate hain. Phir poora parivaar saath baith kar dher saari baatein karte hain aur raat mein saath mein hi bhojan karke so jaate hain.
Ek din ki baat hain. Diwali ka tyohaar nazdeek tha. Shaam ka waqt tha aur poora parivaar saath mein baitha hua tha. Veh log aapas mein baat-cheet kar rahe the. Tabhi Amit, Aarti se kehta hain, "Toh Aarti is saal tumhari pehli Diwali hogi is ghar mein."
Aarti - "Haan Papa. Is saal ki Diwali mere liye bohut khaas rahegi. Main is Diwali ke liye behad utsuk hoon."
Amit - "Toh kuch socha hain, kaise Diwali ki tayyari ki jaaye ?"
Aarti - "Woh toh aap bataenge na Papa."
Suchitra - "Nahi. Is saal Diwali ki tayyari tumahare kandhon par hogi Aarti. Tum tay karo ki, aakhir tayyariyan kaise karni hain. Nikhil ke saath ek do din mein kharid-daari ke liye chale jaana. Aur tum sab apne pasand se kharid-daari karna tum."
Aarti - "Lekin Mummy aap thoda bata toh dijiye ki aap log kis tarah se tayyariyan karte ho. Toh us hisaab se main sab kharid-daari karungi."
Suchitra - "Bilkul nahi. Ab se har tyohar ki taiyaari sirf tum hi karogi aur apni marzi se karogi. Na tum kisi se kuch puchogi aur na hi koi tumhe tokega."
Aarti - "Thik hain Mummy. Jaisa aap kahe."
Amit - "Are beta yeh ghar bhi tumhara hi hain. Ab ghar mein kya aur kaise hoga, yeh sab bas tum hi tay karogi."
Aarti muskurati hain aur kehti hain, "Ji Papa. Main phir kal jaati hoon kharid-daari karne ke liye."
Amit - "Thik hain Beta."
Phir Amit Suchitra se kehta hain, "Kal Aarti ko tum paise de dena. Jitna woh maange, utne paise tum use de dena."
Suchitra - "Thik hain Ji."
Agle din, teeno baap-bete tayyar hokar apni dukaan ki aur nikal padte hain. Aarti Suchitra ke paas aati hain aur kehti hain, "Mummy woh Diwali ka saamaan kharidne ke liye jaana hain na ?"
"Haan yaad hain mujhe. Bas do minute." Kehte hue, Suchitra almaari ki aur jaati hain aur almaari khol kar usmein se kuch paise nikaalkar woh unhe ginti hain. Phir Suchitra Aarti ko woh paise thamaate hue kehti hain, "Poore bees hazaar hain. Kam toh nahi pad jaayenge na ?"
Aarti - "Bilkul bhi nahi Mummy. Yeh paise bohut hain."
Suchitra - "Thik hain. Sambhal kar jaana."
Aarti - "Ji Mummy."
Aarti kharid-daari ke liye chali jaati hain. Shaam mein woh ghar laut aati hain. Uske haathon mein dher saare saamaan rehte hain. Aarti ko dekhte hi, sabhi log muskurate hain. Suchitra kehti hain, "Lagta hain dher saare saamaan aaye hain ghar mein."
Aarti - "Haan Mummy."
Nitin - "Kam paison mein zyada saamaan kaise liye jaate hain, yeh meri Bhabhi bakhubi jaanti hain."
Suchitra - "Ab se har tyohar par kharid-daari sirf tum hi karogi Aarti."
Aarti - "Thik hain Mummy."
Suchitra - "Ab tum haath-muh dho lo, aur thoda aaram kar lo."
Aarti - "Mummy aaj khaane mein kya banega ?"
Suchitra - "Jo bhi banega, aaj main banaungi."
Aarti - "Thik hain Mummy."
Raat mein sabhi parivaar saath mein baith kar khaana khaate hain aur sone ke liye apne-apne kamre mein chale jaate hain.
Aasmaan mein Chand chamak raha tha aur Nikhil aur Aarti apne kamre mein hi the. Dono ko neend nahi aa rahi thi. Nikhil ne Aarti se kaha, "Itni der ho gayi hain. Abhi tak neend nahi lagi. Subah na jaane kaise uthunga."
Aarti - "Main jaga dungi. Waise ek baat poonchu ?"
Nikhil - "Haan pooncho."
Aarti - "Kya tumhare dukaan mein koi ladki kaam karti hain ?"
Nikhil - "Bilkul bhi nahi. Aisa kyun ?"
Aarti - "Nahi bas aise hi."
Nikhil - "Agar tumhe meri koi baat pasand na aayi ho toh bata do."
Aarti - "Aisi koi baat nahi hain. Maine bas yun hi poonch liya."
Nikhil - "Kya tumhe mujh par shak ho raha hain ?"
Aarti - "Bilkul bhi nahi."
Nikhil - "Agar tumhe meri ya ghar ke baaki logon ki koi baat pasand na aayi ho, toh tum khul kar keh sakti ho."
Aarti - "Mujhe yeh ghar bohut pasand hain. Ab yahi mera parivaar hain."
Nikhil muskurata hain. Kuch der tak woh dono yahan-wahan ki baat-cheet karte hain aur phir so jaate hain.
Diwali ki taiyaariyan zoro-shoron se chalti hain. Dekhte Hi Dekhte, Diwali ka tyohaar aa hi jaata hain. Bade hi dhoom-dhaam se Diwali ka jashn manaya jaata hain.
Ek baar ki baat hain. Ghar mein sabhi sadasya saath baithe hue the aur veh log aapas mein baat-cheet kar rahe the. Tabhi Amit kehta hain, "Aarti zara tum sabke liye pakode bana dena."
Aarti - "Thik hain Papa."
Aarti rasode mein chale jaati hain. Woh pakode tal hi rahi thi. Tabhi Suchitra wahan par aati hain aur kehti hain, "Tum pyaaz wale pakode bana rahi ho ya koi aur ?"
Aarti - "Pyaaz wale Mummy."
Suchitra - "Moong Dal wale Pakode bana deti toh accha rehta. Sabhi ko pasand aata hain."
Aarti - "Mummy woh darasal mujhe Moong Dal ke Pakode banane nahi aate hain."
Suchitra - "Thik hain. Main bana deti hoon."
Aarti - "Thik hain."
Phir Aarti, rasode se chale jaati hain. Suchitra sabke liye Pakode lekar aati hain. Veh log saath mein Pakode ke swaad ka mazaa lete hue aapas mein baat-cheet kar rahe the. Tabhi Suchitra uth khadi hoti hain aur woh rasode ki aur jaa rahi hoti hain. Aarti Suchitra ko aawaz lagati hain aur woh Aarti ki aur palati hain. Phir Aarti Suchitra se kehti hain, "Mummy zara aap Paani lete aana na."
Suchitra ko yeh baat zara buri lag jaati hain. Lekin, us samay woh kuch nahi kehti hain. Woh Rasode mein jaati hain aur Paani laakar Aarti ko de deti hain.
Agle din ki baat hain. Suchitra aur Aarti saath mein bahar jaate hain. Woh dono ghar ke liye Raashan ki kharid-daari kar rahe the. Tabhi ek ladki aati hain aur woh Aarti ko aawaz lagati hain. Aarti palat ti hain aur woh us ladki ko dekh kar muskurati hain.
Aarti - "Are Rajni. Tum yahan ?"
Rajni - "Haan bilkul. Kaisi ho tum Aarti ?"
Aarti - "Main bilkul thik hoon. Tum kaisi ho ?"
Rajni - "Bilkul thik hoon."
Aarti - "Yeh meri Saans hain."
Rajni - "Namastey Aunty."
Suchitra - "Namastey Beta."
Rajni - "Kaisi ho aap Aunty ?"
Suchitra - "Bilkul thik hoon Beta. Aap kaisi ho ?"
Rajni - "Main bhi thik hoon Aunty."
Suchitra - "Aapki Shaadi ho gayi hain Beta ?"
Rajni - "Nahi Aunty. Abhi toh nahi."
Aarti - "Waise tum is Shehar mein kya kar rahi ho ?"
Rajni - "Main yahan par Collector ki pariksha dene ke liye aayi thi."
Aarti - "Pariksha ho gayi ?"
Rajni - "Haan."
Aarti - "Kaisi gayi tumhari Pariksha ?"
Rajni - "Acchi gayi."
Aarti - "Toh ab toh tum khaali ho na ?"
Rajni - "Bilkul."
Aarti - "Toh tum chalo mere saath."
Rajni - "Kahan par ?"
Aarti - "Mere ghar par."
Rajni - "Abhi ?"
Aarti - "Haan bilkul."
Teeno saath mein ghar chale jaate hain. Ghar jaate hi, Suchitra apne kamre mein chale jaati hain. Aarti aur Rajni aapas mein baat-cheet karte hain. Kuch der baad, Rajni chale jaati hain. Phir Aarti Suchitra ke paas aati hain aur kehti hain, "Mummy aaj raat khaane mein kya banega."
Suchitra - "Jo bhi tum chaho. Main zara si thak chuki hoon. Mujhe aaram karna hain, ab tum jaao."
Aarti ko Suchitra ka yeh badla hua bartaav thoda sa khatakta hain. Lekin, woh yeh soch kar baat ko jaane deti hain ki, aaj Suchitra thodi thak chuki hogi. Aarti apne kamre mein chale jaati hain.
Agle din, ghar ka saara kaam karke Suchitra aur Aarti saath mein baithe hue the. Dopahar ki baat thi. Aarti Suchitra se kehti hain, "Aaj dhoop kuch zyada hain na Mummy ?"
Suchitra - "Haan."
Aarti - "Mummy kya aap koi Juice peena pasand karengi ?"
Suchitra - "Nahi."
Aarti - "Mummy koi bhi Juice aap bataiye, main bana deti hoon."
"Nahi mujhe kuch nahi peena hain." Kehte hue, Suchitra apne kamre mein chale jaati hain.
Thodi der baad, Aarti Suchitra ke kamre mein aati hain. Suchitra palang par leti hui thi. Aarti uske kareeb aati hain aur dekhti hain ki Suchitra jagi hui hain.
Aarti - "Mummy."
Suchitra - "Haan."
Aarti - "Kya aap mujhse naaraz ho ?"
Suchitra - "Nahi."
Aarti - "Kya mujhse koi galati hui hain ?"
Suchitra 'Na' mein apna sar hilaati hain.
Aarti - "Main subah se dekh rahi hoon, ki aap mujhse zara ukhad kar reh rahi ho."
Suchitra - "Aise hi bas. Aaj kisi se baat-cheet karne ka mann nahi kar raha hain."
Aarti bina kuch kahe wahan se chali jaati hain. Shaam ki baat hain. Ghar ke sabhi sadasya saath mein baithe hue the. Veh sabhi log aapas mein baat-cheet kar rahe the. Tabhi Aarti uth khadi hoti hain aur woh rasode ki aur jaane lagti hain.
Do kadam chalte hi, Aarti ka pair fisalta hain aur woh Suchitra ke saamne gir padti hain. Sabhi hairaan ho gaye.
Nikhil - "Are Bhai zara sambhal ke."
Ek pal ke liye sabhi log chaunk gaye the. Lekin, Suchitra ke chehre ka bhaav zara bhi nahi badla. Phir woh uth khadi hoti hain. Yeh dekh Amit Suchitra se kehta hain, "Bahu tumhare saamne gir gayi thi aur tumne use uthane ke liye koshish bhi nahi ki."
Suchitra - "Sab itna achaanak se ho gaya. Phir turant uth khadi bhi toh ho gayi."
Amit Aarti ki aur dekhta hain aur kehta hain, "Kya tum dono ke beech koi dikkat hui hain ?"
Aarti - "Nahi Papa. Aisi koi baat nahi hain."
Amit - "Mujhe khul kar batao."
Aarti - "Kaafi dino se Mummy ne mujhse duri bana liya hain. Kya baat hain, pata nahi. Maine ek baar inse baat karni bhi chahi, par Mummy ne koi jawaab nahi diya. Pata nahi aakhir Mummy kis baat se naaraz hain mujhse."
Suchitra - "Diwali ke waqt jab maine tumhe moong ke pakode banane ke liye kaha, toh tum yeh keh kar chali gayi ki mujhe banana nahi aata hain."
Aarti - "Haan. Toh ?"
Suchitra - "Kya tum mujhse poonch nahi sakti thi, ki moong ke pakode banane kaise hain ? Aur phir us din, bahar tumhari ek dost mili thi aur tum apni us dost ko apne saath ghar le aayi. Kya tumne mujhse ek baar bhi puchna zaroori samjha ki main use ghar laaun ki nahi."
Aarti kuch nahi kehti hain.
Amit - "Toh bas itni si baat ke liye, tum usse ukhad gayi ? Itni maamoli si baat ke liye, tumne usse dooriyan bana li ? Aakhir yeh kya tareeka hua ?"
Suchitra - "Bas aisa hi hain."
Amit - "Lekin yeh bilkul bhi sahi baat nahi hain. Itni choti-choti baat ke liye, rishte nahi tode jaate hain. Hum sab ek Parivaar hain aur hum sab logon ko saath mein mil-julkar, prem se rehna chahiye."
Suchitra - "Kya main sabse mil-julkar nahi reh rahi hoon ?"
Amit - "Toh kya Aarti is ghar ka hissa nahi hain ? Kya Aarti humse parayi hain ?"
Suchitra kuch nahi kehti hain.
Amit - "Itni maamoli si baat ke liye toh koi apne dost ke se bhi naaraz na ho aur tumne apni hi beti samaan bahu ke saath bair kar liya ?"
Suchitra - "Ab main kya kahoon aapse ?"
Amit - "Tum kuch keh hi nahi sakti ho. Tumhari naarazgi ka koi arth hi nahi hain. Maamoli si baat ke liye, rishton mein khataas nahi daali jaati hain. Rishte jeevan mein bade ahem rehte hain. Agar rishte hi na ho, toh insaan apne jeevan mein bada akela pad jaata hain. Aur insaan ko rishton ki ahmiyat ka ehsaas, aksar use khone ke baad hi hota hain. Abhi bhi waqt hain. Kam Se Kam abse tum is baat ko samajh jaao toh behtar hoga."
Suchitra Aarti se kehti hain, "Main tumse apne rishte sudhaarne ki poori koshish karungi."
Aarti - "Hamara rishta kabhi bigda hi nahi tha Mummy. Bas aap mujhse naaraz ho chuki thi. Kam Se Kam abse apni naarazgi khatam kar dijiye."
Suchitra rone lagti hain aur ghar ke sabhi sadasya use bas dekhte rehte hain.
Comments
Post a Comment