Kunji

 Nikhil Kumar apne maata-pita ka iklauta ladka hain. Woh ek Call Centre mein naukri karta hain. Woh apne maata-pita ke saath ek Chawl mein rehta hain. Nikhil ke pita bhi ek Company mein naukri karte the. Filhal woh retire ho chuke hain. Nikhil har roz subah uthkar tayyar hokar, apne naukri par jaata hain aur shaam mein woh apne ghar laut aata hain. Daftar se ghar ka yeh safar, woh aksar Bus ke maadhyam se poora karta hain. Bus mein woh aksar khidki wali seat par hi baithta hain. Bus mein chalte hue, taazi hawa khaate rehna, Nikhil ko bohut bhaata hain.

Ek din ki baat hain. Har roz ki tarah us din bhi, Nikhil apne daftar se ghar ke liye nikal pada. Nikhil ke daftar se, Bus Stand mehaz kuch kadamon ke hi duri par tha. Nikhil ne safed rang ka Shirt pehna hua tha aur neeche neele rang ki Jeans thi. Woh chalte hue dheere-dheere Bus Stand ki aur badh hi raha tha, ki tabhi achaanak se barsaat shuru ho gayi. Barsaat se bachne ke liye woh daudte hue Bus Stand ki aur jaa raha tha. Woh Bus Stand ke saamne pohuncha. Uska pair fisla aur woh dhadaam se neeche gir gaya. Nikhil ko choat seedha reed ki haddi par lagi.

Tabhi Nikhil ke ghar ki aur jaane wali Bus, Bus Stand par aa rukti hain. Yeh dekhte hi, Nikhil farsh se uthne ka prayaas karne laga. Lekin, kyunki Nikhil ko androni choat lagi thi aur woh bhi reed ki haddi par; isliye woh chah kar bhi uth nahi paa raha tha. Nikhil ne uth khade hone ka khoob prayaas kiya, par woh prayaas nadarad hi saabit hue. Kuch hi pal mein, woh Bus Nikhil ke aankhon ke saamne se ojhal ho gayi. 

Kuch der baad, woh jaise-taise farsh par se utha aur woh Bus Stand par jaakar baith gaya. Ab woh agli Bus ke aane ka intezaar karne laga. Nikhil sadak par aati-jaati hui gaadiyon ko dekh raha tha. Kabhi uski nazar agal-bagal par baithe hue logon par padti, toh kabhi apni ghadi par. Haalanki, ghar jaldi  pohunchne ki uske paas koi khaas wajah nahi thi, par woh apne maata-pita ke saath zyada se zyada waqt beetana chahta tha. Isliye, use agli Bus ka besabri se intezaar tha. 

Kuch der tak intezaar karne ke baad, Nikhil ki Bus aa gayi aur woh Bus mein jaakar baith gaya. Phir Bus chal padi. Tabhi achaanak se Nikhil ka Phone bajta hain. Woh apni jeb mein haath daalkar Phone nikaalta hain aur dekhte hi muskurata hain. Phone par Call uske Pita ka tha. Woh Call utha ta hain aur kehta hain, "Haan Papa."

Nikhil Ke Pita - "Aur Beta kahan par ho ?" 

Nikhil - "Bus mein hoon Papa."

Nikhil Ke Pita - "Accha. Kitni der pehle Bus pakde ho tum ?"

Nikhil - "Abhi kuch hi minute hue hain bas."

Nikhil Ke Pita - "Chalo badhiya hain Beta. Tum jald-se-jald ghar pohuncho, phir hum sab bohut accha samay saath beetayenge."

Nikhil - "Haan Papa zaroor."

Nikhil Ke Pita - "Thik hain main rakhta hoon Beta."

Nikhil - "Thik hain Papa."

Phone kat ta hain. Nikhil khidki ke bahar dekh raha tha. Raasta peeche chutte jaa raha tha aur ghar dheere-dheere nazdeek aa raha tha. Dekhte Hi Dekhte, Nikhil ka stop aa gaya. Woh Bus se utra aur paidal apne ghar ki aur chal pada. Kuch der baad, woh apne ghar pohuncha. Ghar ka darwaaza khula hua tha aur Hall mein Nikhil ke pita baithe hue the. Woh koi kitaab padh rahe the. Nikhil ghar ke andar aata hain. Nikhil ke kadamon ki aawaz sunkar, Nikhil ke Pita; kitaab se apni nazar utha te hain aur Nikhil ko dekhte hi, woh muskurate hain. Nikhil unke saamne aakar baith jaata hain. Phir Nikhil ke pita kehte hain, "Toh kaisa raha tumhara aaj ka din Beta ?"

Nikhil - "Bohut hi badhiya tha Papa."

Nikhil Ke Pita - "Chalo accha hain." 

Nikhil ki Maa andar se Paani le aati hain aur woh Nikhil ke baalon ko sehlate hue use Paani ka glass thamaati hain. Nikhil ek-ek ghunt karke Paani peeta hain. Phir Nikhil ki Maa puchti hain, "Tum bohut thak gaye hoge na Beta ?"

Nikhil - "Nahi Mummy bilkul bhi nahi."

Nikhil Ki Maa - "Daftar mein itna saara kaam kiye ho aur phir itna lamba safar bhi kiye ho, bhookh toh lagi hi hogi na ?"

Nikhil - "Zyada nahi Mummy."

Nikhil Ki Maa - "Kya khaana pasand karoge Beta ?"

Nikhil - "Jo bhi aap pyaar se khila do Mummy."

Nikhil Ki Maa - "Pakode khaaoge ?"

Nikhil 'Haan' mein apna sar hilata hain.

Nikhil ki Maa andar chale jaati hain.

Nikhil Ke Pita - "Toh kya kiya din bhar ?"

Nikhil - "Bas kaam."

Nikhil Ke Pita - "Chalo badhiya hain."

Nikhil - "Aap Kitaab padh rahe ho ?"

Nikhil Ke Pita - "Gyaan prapt kar hoon Beta."

Nikhil hansta hain aur kehta hain, "Is umar mein ?"

Nikhil Ke Pita - "Haan."

Nikhil - "Is umar mein gyaan prapt karne ki aapko kya aavashyakta hain ?"

Nikhil Ke Pita - "Gyaan prapt karne ki koi umar nahi hoti hain Beta."

Nikhil - "Lekin, aap toh pehle se hi itne gyaani ho Papa."

Nikhil Ke Pita - "Kahan gyaani hoon Beta. Main apne jeevan mein jitna bhi gyaan prapt kar paaya hoon, woh toh bas Sagar mein Paani ke ek boond ke samaan hain."

Nikhil - "Accha ? Toh us hisaab se toh main agyaani hoon."

Nikhil Ke Pita - "Ho sakta hain. Lekin, kuch gyaan tumne bhi prapt kiya hi hoga. Ab tum apne daftar mein kaam karte ho, kyunki tumhe apne kaam ka gyaan prapt hain."

Nikhil - "Lekin mujhe wahan par abhi bohut kuch seekhna baaki hain Papa."

Nikhil Ke Pita - "Main toh wahi kar raha hoon, jo tum kar rahe ho. Gyaan prapt karne ki laalsa hum dono mein hain. Antar bas itna hain, ki tum daftar mein kaam karke gyaan prapt karne ka prayaas kar rahe ho aur main kitaabein padh kar."

Nikhil - "Manushya aisa kya kare, ki woh gyaan ki charam seema tak pohunch jaaye."

Nikhil Ke Pita - "Gyaan prapt karne ki koi bhi seema nahi hain. Gyaan seema aur samay se bhi paray hain."

Nikhil - "Toh Manushya kitna bhi prayaas kar le, woh purna gyaan prapt kar hi nahi sakta hain."

Nikhil Ke Pita - "Shayad uske liye, Manushya ko amar hona padega aur Mrityu par vijay toh bade-bade Maharathi bhi haasil nahi kar paaye hain."

Nikhil - "Jeevan mein safalta ka ek maatra mul mantr kya hain ?"

Nikhil Ke Pita - "Anubhav. Waise toh safalta ka mantr sabke liye alag-alag hain. Kyunki, sabke anubhav alag-alag hain. Sabka jeevan alag-alag hain. Kitaabon ke alaawa, anubhav hi ek sabse bada strot hain Manushya ki gyaan prapti ke liye."

Nikhil - "Is Sansaar mein aisa koi vyakti hoga, jise bina gyaan prapt kiye safalta mil gayi ho ?"

Nikhil Ke Pita - "Safalta ki paribhasha kya hain ? Jo kaam tum kar rahe ho, ya jis mukaam par is shan tum ho; agar tum usse khush ho. Agar tum usse aage badhna hi nahi chahte ho, toh tum safal ho; nahi toh phir tum asafal ho. Darasal safal woh vyakti hain, jise yeh Sansaar safal maanti ho. Aur is Sansaar mein shayad hi aisa koi vyakti hoga, jisne bina gyaan prapt kiye; safalta ka swaad chakha ho. Nirantar prayaas karte rehna aur saath hi nirantar gyaan prapt karte rehna ek maatr hi safalta ki kunji hoti hain."

Nikhil kisi gehri soch mein pad jaata hain. Yeh dekh Nikhil ke pita kehte hain, "Kis soch mein doob gaye ho Beta ?"

Nikhil - "Nahi Papa. Kahi nahi."

Agle din, Nikhil jab kaam par se ghar laut ta hain, tab woh har roz ki tarah apne Pita ko Kitaab padhte hue paata hain. Uske Pita use dekh kar muskurate hain aur phir woh apni Kitaab mein kho jaate hain. Nikhil andar chala jaata hain. Kareeb ek ghanta beet jaata hain lekin, Nikhil bahar nahi aata hain. Nikhil ke Pita achraj mein pad jaate hain. Woh sochte hain ki, shayad Nikhil kaam ki wajah se thak chuka hoga aur woh so chuka hoga. Woh andar jaakar yeh dekhna chahte the ki, Nikhil aakhir kya kar raha hain. Lekin, unhe apni Kitaab bhi padhni thi. 

Unka dincharya ek tay samay anusar chalta tha aur is samay unka Kitaab padhne ka tha. Woh apni Kitaab padhna dobara shuru karte hain. Kuch der baad, unka Kitaab padhne ka samay khatam ho jaata hain. Woh apni Kitaab band karte hain aur andar jaakar, Kitaab ko usi jagah par rakhte hain, jahan par woh aksar hoti hain. Phir woh Nikhil ke kamre mein jaate hain. Kamre ke andar pohunchte hi, woh dekhte hain ki Nikhil gehri neend mein soya hua tha aur uske bagal mein ek Kitaab padi hui thi. Woh Kitaab khuli hui thi. 

'Nikhil ne Kitaab ke kuch panne padhe honge shayad.' Woh sochte hain. Phir woh Hall mein jaakar baith jaate hain. Kareeb do ghante baad, Nikhil ki neend khulti hain. Woh apne kamre se bahar niklta hain aur sabse pehle paani se apna muh dhota hain. Phir woh rasode mein jaakar ek glass Paani peeta hain. 

Uske baad, Nikhil dobara apne kamre mein jaata hain aur woh us Kitaab ko utha ta hain. Woh us Kitaab ko lekar Hall mein jaata hain. Hall mein uske pita baithe hue the aur khaamosh the. Unhe dekh kar aisa lag raha tha maano, ki woh kisi gehri soch mein doobe hue the. Nikhil tay nahi kar paa raha tha ki, woh apne Pita ke paas jaaye ya na jaaye. 

Tabhi galti se uske haath se Kitaab gir jaati hain. Nikhil ke Pita ka dhyaan toot jaata hain aur unki nazar Nikhil par padti hain. Nikhil ko dekhte hi, woh kehte hain, "So kar uth gaye beta ?"

Nikhil - "Haan Papa."

Nikhil Ke Pita - "Tum yeh Kitaab padh rahe the ?"

Nikhil 'Haan' mein apna sar hilaata hain. 

Nikhil Ke Pita - "Kaisi lagi tumhe yeh Kitaab ?"

Nikhil - "Sach kahun toh, filhal kuch samajh mein nahi aayi hain. Par koshish kar raha hoon."

Nikhil Ke Pita - "Gyaan prapti ek lamba safar hota hain. Yeh safar itni aasani se manzil tak nahi pohunchata hain. Sach kahun toh, Gyaan anant hain."

Nikhil - "Lekin abhi toh bas mere safar ki shuruaat hi hui hain."

Nikhil Ke Pita - "Ab yeh dekhna dilchasp hoga, ki aakhir yeh safar tumhe kis Disha mein lekar jaata hain. Aakhir tum kis prakaar ke anubhavon se rubaru hote ho. Manzil tak pohuchne ke liye, safar karna bohut zaroori hota hain. Filhal toh tum bas, is safar ka aanand uthao."

Nikhil - "Ji Papa."

Phir woh apne Pita ke saamne jaakar baith jaata hain. Kuch shan ke liye Nikhil ke Pita kuch sochne lagte hain. Phir woh Nikhil ki aur dekhte hain aur kehte hain, "Kya tumhe yeh baat pata hain, ki muhaavre kyun bane hain ?"

Nikhil - "Kyun bane hain ?"

Nikhil Ke Pita - "Jab kabhi tumhe kisi se kuch kehna ho aur tum us baat ko seedhe-seedhe aur saaf-saaf lafzon mein nahi keh sakte ho, tab muhaavre bohut kaam mein aate hain."

Nikhil - "Accha."

Nikhil Ke Pita - "Hmm."

Nikhil - "Main toh yeh soch raha hoon ki, manushya apna saara jeevan laga deta hain gyaan prapt karne mein aur prapt kiye hue gyaan ko upyog mein laane mein. Parantu mrityu bhi toh ek katu saty hain. Mrityu ke baad, Manushya dobara janm leta hain agyaani ban kar. Ab woh apna gyaan prapt karne ki yatra dobara shuru karta hain. Phir se use woh sab kuch seekhna padta hain, jo ki usne apne pichle janam mein seekha tha. Kaash aisa hota ki, Manushya apna dusra jeevan; pichle jeevan ke gyaan ke saath shuru kar paata."

Nikhil Ke Pita - "Jeevit rehte hue jitna zyada ho sake, Manushya ko utna zyada gyaan parpt karte rehna chahiye. Lekin, us gyaan ka bhi koi mulya nahi, agar tumhe us gyaan ka sahi upyog karna nahi aata ho toh. Prapti gyaan ka pehla kadam hain. Lekin, gyaan ka sahi mulya uske upyog mein hain."

Nikhil - "Hmm."

Nikhil Ke Pita - "Yadi manushya ke mann mein prashn hi janm nahi lete, toh manushya na kabhi uttar ki khoj mein nikalta aur na hi; woh kabhi apne jeevan ka uddhar karne mein safal ho paata. Mann mein reh-reh kar uthte hue prashn hi, Manushya mein gyaan prapti ki laalsa ko badhate rehte hain."

Nikhil Ke Pita apni baatein aage kehte rehte hain aur woh badi dhyaan se unki baatein sunte rehta hain. 

                      - Ved Vineet Gautam