Gathbandhan

 Sanjay Kumar peshe se ek vyapaari hain. Unki patni ka naam, Seeta Kumar hain. Sanjay aur Seeta ke do bete hain. Bade bete ka naam, Ajay Kumar hain aur chote bete ka naam, Vijay Kumar hain. Dono bhai ab bhi kunware hain. Veh dono College mein padhte hain. Ajay ke College ka yeh aakhiri saal hain. Isiliye, woh din-raat mehnat se padh raha tha. Aakhir mein dono Bhaiyon ki College ki pareeksha khatam hui aur kuch mahino baad, pareeksha ka parinaam aaya. Dono Bhai bade hi acche ank se pareeksha mein uttirn kiye the. Yeh baat jaankar, Sanjay aur Seeta dono hi bohut khush hue. Aaj us dampati ko apne dono beton par naaz ho raha tha. 

Woh dono Bhai apne maata-pita ke saamne khade the. Sanjay apne bistar se utha aur woh andar ke kamre mein gaya. Thodi der baad, woh bahar ke kamre mein aaya. Uske haathon mein kuch paise the. Sanjay ne Ajay ko woh paise pakdate hue kaha, "Yeh lo Ajay. Tum bade ho, isliye yeh paise main tumhe de raha hoon."

Ajay woh paise leta hain. Phir Sanjay aage kehta hain, "Aaj tum dono Bhaiyon ka din hain. Aaj main chahta hoon, ki tum dono Bhai khoob mauj karo. Aur aaj hi nahi, kuch dino tak tum dono jo bhi karna chahte ho; use jee bhar kar karo."

Dono Bhai ek dusre ki aur dekhte hain. Yeh dekh Sanjay kehta hain, "Are Bhai, yeh tum dono aapas mein tay kar lo, ki in paison ka kya karna hain aur kaise kharch karna hain."

Ajay Vijay ko ishaara karke puchta hain. Ispar, Vijay kehta hain, "Bhaiyaa yeh main kaise bata sakta hoon. Yeh toh aap tay karoge. Aap ghar ke bade bete ho."

Ajay - "Main toh chahta hoon ki, in paison se ghar ke liye kuch khaas kiya jaaye."

Vijay - "Jaisa aap chaho Bhaiyaa."

Sanjay - "Tum dono jaakar, apne liye naye kapde kharid le aao aur shaam ke liye tumhari Maa kuch khaas banayegi."

"Thik hain Papa." Dono Bhai ek saath kehte hain. Phir woh dono bahar chale jaate hain. Ajay Bike chalu karta hain aur Vijay uske peeche baith jaata hain. Kuch der baad, Vijay kehta hain, "Bhaiyaa hum dono jaa toh rahe hain, par hum dono jaayenge kaha par ?"

Ajay - "Ek kaam karte hain. Cinema Hall chalte hain."

Vijay - "Lekin hum dono movie kounsi dekhenge ? Pareeksha ke wajah se hum dono ko kuch pata hi nahi chal paaya."

Ajay - "Wahi par chal kar dekhte hain. Phir tay karte hain."

Vijay - "Thik hain Bhaiyaa."

Dono Bhai Cinema Hall jaate hain aur kuch der tak posters dekhne ke baad, woh dono ek movie dekhna tay karte hain. Movie dekhne ke baad, woh dono ghar laut aate hain. Un dono ko dekhte hi, Sanjay muskurata hain aur kehta hain, "Aao bacchon. Aao."

Dono Bhai ghar ke andar aate hain aur woh dono Sanjay ke saamne aakar baith jaate hain. Phir Sanjay kehta hain, "Toh kaisa raha tum dono ka din ?"

Ajay - "Bohut hi badhiya tha Papa."

Vijay - "Haan. Hum dono ne khoob masti ki hain aaj toh."

Sanjay - "Bohut badhiya."

Tabhi Seeta Hall mein aati hain aur kehti hain, "Are vaah. Toh aa gaye tum dono."

Ajay - "Haan Mummy."

Seeta - "Toh kisne zyada badmaashi ki ?"

Vijay - "Chota toh main hoon. Toh main hi zyada badmaashi karunga na."

Seeta muskurati hain. Phir Sanjay kehta hain, "Lekin ab badmaashi ki umar khatam ho chuki hain. Ab zimmedar banne ka waqt aa gaya hain."

Dono Bhai Sanjay ki aur dekhte hain. Sanjay kehta hain, "Main chahta hoon ki, tum dono Bhai khud tay karo; ki tum dono ko apne jeevan mein aage kya karna hain. Kyunki, jeevan ki gaadi ko chalane ke liye, insaan ko kuch na kuch kaam toh karna hi padta hain."

Ajay - "Papa main ghar ka vyapaar seekhunga."

Vijay - "Main bhi Papa."

Sanjay - "Bacche jab bade ho jaate hain, tab woh apne maata-pita ka sahara bante hain. Kuch aulaad aisi bhi hoti hain, jo apne maata-pita ko ghar se bahar kar deti hain."

Ajay - "Papa aap aisa kyun keh rahe ho ? Aap aur Mummy toh hamare liye sab kuch ho."

Sanjay - "Shukriya beta."

Vijay - "Papa aap apne bacchon ko shukriya kyun keh rahe ho ?"

Seeta - "Kya tum dono apne maata-pita ki ek baat maanoge ?"

Ajay - "Aap hukum kariye Mummy."

Seeta - "Main ab apne dono beton ka ghar basta hua dekhna chahti hoon."

Ajay - "Lekin Mummy abhi tak toh, hum dono ko kaam ke baare mein kuch pata hi nahi hain. Biwi-Bacchon ki zimmedari bohut badi hoti hain, hum dono kaise sambhal paayenge ?"

Sanjay - "Bacchon jab hum dono ki Shaadi hui thi, tab toh mere paas naukri tak nahi thi. Main bas sau Rupaye lekar, tumhari Mummy ko byaah kar laaya tha. Us samay hum dono ek choti si Chawl mein raha karte the. Agar us waqt main bhi yeh sab sochta, toh kaise tum dono Bhai itne jaldi bade ho jaate ?"

Vijay - "Lekin Papa, zamana ab bohut badal chuka hain. Aapke waqt ke log alag the, unka rehan-sehan bhi aaj se bilkul viprit tha."

Sanjay - "Lekin beta, log toh us waqt bhi jee rahe the aur is waqt bhi jee rahe hain. Duniya tab bhi chal rahi thi aur aaj bhi chal rahi hain. Jab tum dono ki Shaadi ho jaayegi, tum dono apne aap hi zimmedar ban jaaoge. Agar tum dono ko koi pasand ho, toh bata dena."

Seeta - "Haan, main jald-se-jald apni dono bahuon ko dekhna chahti hoon."

Dono Bhai ek dusre ki taraf dekhte hain aur kuch shan baad, Ajay kehta hain, "Thik hain Papa. Jaisa aap dono chaho."

Sanjay - "Agar tum dono ko koi ladki pasand ho, toh tum dono khul kar keh sakte ho."

Vijay - "Nahi Papa. Aisi koi baat nahi hain. Aap aur Mummy hamare liye jo bhi ladki dekhoge, hume manzoor hoga."

Sanjay - "Thik hain phir. Ab aage jo bhi kehna hain, woh tumhari Mummy kahengi."

Dono Bhai Seeta ki aur dekhte hain. Seeta kehti hain, "Tum dono Bhaiyon ke liye, do Behno ka rishta aaya hain."

Sanjay - "Are Bhai yeh bhi toh batao, ki kaha se rishta aaya hain ?"

Seeta - "Woh Khanna Sahab hain na, unke Jeejaji ko do ladkiyaan hain."

Sanjay - "Hmmm. Khanna Sahab apne dono Bhaanjiyon ki Shaadi, tum dono Bhaiyon se karwana chahte hain."

Woh dono Bhai sharma jaate hain. Yeh dekh Seeta kehti hain, "Are agar aise sharmaoge, toh kaise tum dono un ladkiyon se khul kar baat-cheet kar paaoge ?"

Sanjay - "Khanna Sahab apne Jeejaji ko lekar aana chahte hain. Agar tum dono ki ijaazat ho, toh main unhe agle hafte bula leta hoon."

"Thik hain Papa. Hum unse zaroor milenge." Dono Bhai ek saath kehte hain. 

Sanjay - "Toh main unse baat kar leta hoon."

Dono Bhai 'Haan' mein apna sar hilaate hain.

Sanjay dusre kamre mein jaata hain aur woh kuch der tak baat-cheet karne ke baad wapas aata hain. Phir woh kehta hain, "Aane wale Ravivaar ko woh dono aayenge."

Seeta - "Yeh toh bohut hi acchi baat hain. Lekin, waqt bohut kam hain. Mujhe dher saari tayyariyan karni hogi. Na jaane kaise hoga sab."

Sanjay - "Sab thik ho jaayega. Hum dono milkar sab kuch samay par saari tayyariyan poori kar lenge."

Agle din se dono Pati-Patni ghar ko sajaane mein jut jaate hain. Seeta apne pados ke Bhabhiyon se bhi haath bantwaa leti hain. Sabhi padosi behad khush the, yeh jaan kar ki un dono Bhaiyon ko ladki wale dekhne ke liye aane wale hain. Seeta apni saheliyon ke saath dher saari kharidaari karti hain aur ghar ko bhi bade hi acche se sajaati hain. Dekhte-Hi-Dekhte mulaakat ka din aa jaata hain. Khanna Sahab apne Jeejaji ko lekar, Sanjay ke ghar pohunch jaate hain. Sanjay aur Seeta un logon khule dil se swaagat karte hain. Veh sabhi log saath mein baith te hain aur aapas mein baat-cheet karte hain. Un dono ladkiyon ke pita ka naam, Nikhil Soni hain. 

Sanjay kehta hain, "Dekhiye Bhaisahab, hum log toh apni zindagi jee chuke hain. Ab hamare bacche khul kar jeeye, apna faisla khud lein; bas yahi mera maan na  hain."

Nikhil Soni - "Aapne bilkul thik kaha hain Bhaisahab. Main chahta hoon ki aapke dono bete, ek baar meri dono ladkiyon ko dekh lein; unse kuch der baat-cheet kar lein; phir aapas mein mil-julkar hamare bacche jo bhi faisla lenge, hume manzoor hoga. Kyun thik hain na ?"

Sanjay - "Bilkul Bhaisahab."

Nikhil Soni - "Toh aap kab hamare ghar aana chahenge ?"

Sanjay - "Jab bhi aap chahe."

Nikhil Soni - "Aap hi ka ghar hain. Aap jab chahe tab aakar, hamare ghar ki shobha badhaaye."

Sanjay - "Toh agle itvaar ko milte hain phir."

Nikhil Soni - "Itvaar bohut badhiya din hain."

Sanjay - "Thik hain phir."

"Toh ab aap hume ijaazat dijiye phir." Kehte hue, Nikhil Soni uth khade hote hain. Wahan par maujood sabhi log khade ho jaate hain. 

Sanjay - "Aapse agli mulaakat ka intezaar rahega."

Woh dono haath milaate hain aur Nikhil Soni, Khanna Sahab ke saath chale jaate hain. Dekhte Hi Dekhte Itvaar aa jaata hain. Sanjay apne poore Parivaar ke saath, Nikhil Soni ke ghar par pohunch jaate hain. Unke ghar, pados ke hi Shehar mein tha.Woh aur unki patni bade hi khule Dil se un logon ka swaagat karte hain. Khanna Sahab bhi wahan par apne Parivaar ke saath maujood the.

Dono Parivaar aapas mein dher saari baatein karte hain. Phir woh dono Bhai, un dono Behno ke saath kuch der tak akele mein baat-cheet karte hain. Lekin, woh chaaron sochne ke liye, kuch der ka samay maangte hain. Sabhi bade sochte hain, naye zamaane ke bacche hain. Zindagi bhi unhe hi guzaarni hain. Unhe  apne hisaab se faisla lene diya jaaye. Dono Bhai ek kamre mein saath mein baithe hue the aur unke bagal wale kamre mein hi, woh dono behene baithi hui thi. Baat-Cheet karte-karte dono Bhai apne kamre se bahar aate hain aur unki nazar bagal wale kamre mein padti hain. Un dono Behno ko dekh kar lag raha tha, jaise woh dono aapas mein behas kar rahi ho. Woh dono kamre ke nazdeek jaate hain aur un dono Behno ki baatein sunte hain. 

Badi Behan - "Main kisi bhi haal mein tumhare saath nahi reh sakti hoon."

Choti Behan - "Main bhi Papa se keh dungi, ki mujhe Shaadi nahi karni hain."

Badi Behan - "Aur wajah kya dogi ?"

Choti Behan - "Kehna toh yahi padega, ki ladka pasand nahi aaya hain."

Badi Behan - "Toh itne acche ladke ko tum chod dogi ?"

Choti Behan - "Agar hum dono saath mein rahenge, toh woh dono bichaare ladke pareshaan ho jaayenge."

Badi Behan - "Na jaane kaisi kismat hain, ladke toh acche mile; lekin, dono Bhai nikale. Ab hum dono kaise saath mein Shaanti se reh sakte hain ?"

"Kyun nahi reh sakte ho tum dono mil-julkar ?" Ajay kehta hain. 

Achaanak se Ajay ki aawaz sunkar woh dono darwaaze ki aur dekhte hain. Ajay aur Vijay ko dekh kar, woh dono behene hairaan reh jaate hain aur thoda sa sharminda bhi. 

Vijay - "Behas hum dono Bhaiyon mein bhi hoti hain, par kya hum dono saath nahi rehte hain ?"

Ajay - "Kai-Kai dino tak hum dono Bhaiyon mein baat-cheet nahi hoti hain. Lekin, kuch dino baad, jab hum dono Bhaiyon ka gussa thanda ho jaata hain; tab hum dono dobara ek dusre ke saath ghumne-phirne nikal jaate hain."

Choti Behan - "Lekin hum dono behne, bilkul bacchon ki tarah ladte hain."

Badi Behan - "Hume darr yeh hain, ki kahi hamare aapsi matabhed ki wajah se aap dono Bhaiyon mein koi phoonth na pad jaaye."

Ajay - "Itne samajhdaaron wali soch hain tum dono ki. Dheere-Dheere aur samajhdaar ho jaaoge. Bas tum dono ek dusre ke saath thoda sa mil-julkar rehne ki koshish karo."

Choti Behan - "Par kaise ?"

Vijay - "Woh hum dono Bhaiyon ki zimmedari hain. Hum dono dekhenge, ki kabhi bhi tum dono Behene aapas mein na lado. Hum dono bhi apni taraf se poori koshish karenge, tum dono ko mil-julkar rakhne ki."

Dono Behne ek dusre ki taraf dekhti hain. Phir Badi Behan kehti hain, "Parivaar ka matalab hi hota hain, sabko saath mein lekar chalna. Thik hain, hum dono bhi koshish karenge."

Choti Behan - "Haan. Hum dono aap dono se Shaadi karenge aur ek dusre ka saath dene ki hum dono poori koshish karenge."

 Chaaron bahar aate hain aur woh log Shaadi ke liye apni 'Haan' keh dete hain. Ghar ke sabhi bade khush ho jaate hain aur un chaaron ki Shaadi kara dete hain.

                         - Ved Vineet Gautam