Khaamosh Lafz

 Yuvaan ek naujawan ladka hain. Woh College mein padhta hain. College mein uske zyada dost nahi hain. Kyunki, woh behad shaant swabhaav ka ladka hain. Yuvaan ke Class mein hi ek ladki bhi padhti hain. Us ladki ka naam Vidisha hain.  Vidisha bhi behad sharmili swabhaav ki hain. Un dono ke swabhaav mein ek saamaany baat thi aur woh hain yeh, ki woh dono hi behad shaant aur sharmile hain. 

Ek din ki baat hain. Class ka aakhiri lecture tha. Class ke sabhi vidyarthiyon ko, woh aakhiri lecture khatam hone ki bohut jaldi thi. Koi apne ghar jaana chahta tha, toh koi kahi bahar ghumne ke liye jaana chahta tha. Zyadatar students ka lecture mein Mann nahi lag paa raha tha. Is aakhiri lecture ka ek-ek second un sabhi ko bohut bhaari lag raha tha. Jaise-Taise lecture khatam hua aur sabhi chatr-chatraaon ke chehre par muskaan thi. Sabhi students bohut ghaayi-ghaayi mein Class se bahar nikal gaye. 

Yuvaan aakhiri bench par baitha, apni nazrein jhukaye hue tha. Woh sabhi vidyarthiyon ke chale jaane ka intezaar kar raha tha. Aakhir kaar sabhi vidyarthi chale gaye. Woh halka sa muskuraya aur apna sar uthaya. Yuvaan ne dekha ki pehli bench par koi ladki ab bhi baithi hui hain. Use jigyaasa hui yeh jaan ne ki, ki aakhir yeh ladki hain koun ?

Woh chalte-chalte gaya aur darwaaze ki aur mudte hue usne ladki ko dekha. Jo ladki us pehli bench par baithi hui thi, woh ladki Vidisha thi. Un dono ki nazrein mili aur un dono ne ek dusre ko dekh kar zara sa muskuraya. Phir Vidisha apni bench se uthi aur woh wahan se chali gayi. 

Agle din, Yuvaan dobara College gaya aur lectures khatam hone ke baad, sabke jaane ka intezaar karta raha. Class khaali hua lekin, sabse pehli bench par, Vidisha ab bhi baithi hui thi. Woh jaane laga aur dobara un dono ki nazrein mili. Dono ne ek dusre ko dekh kar phir muskuraya. Is baar bhi Vidisha apni bench se uthi aur bina kuch kahe, wahan se chali gayi.

 Ab aisa har roz chalne laga. Lectures khatam hone ke baad, woh dono hi sabke jaane ka intezaar karte aur aakhir mein us ek pal ki khaamoshi bhari mulaakat ke baad; woh dono apne-apne ghar ke liye nikal jaate. 

Ek din, College mein Teacher's Day ka function tha. Sabhi students Class ko sajaa rahe the. Tabhi, Vidisha decoration ka koi saamaan lekar Yuvaan ke paas aayi aur kahi, "Kya tum ise upar wali khidki par laga doge ?"

Yuvaan muskuraya aur bina kuch kahe, bench par chadh kar; us decoration ke saamaan ko, khidki par laga diya. College ka Teacher's Day ka function bohut jor-shor se hua. Agle din se, nazron se mulaakaton ka daur dobara shuru hua. Un dono ke beech aksar, aankhon hi aankhon mein baatein hua karti thi. Kabhi woh dono ek dusre ko bas dekhte hi reh jaate, toh kabhi woh dono; ek dusre ko chor nazron se bhi dekha karte the aur jab saamne wale se nazarein milti, tab woh dono yahan-wahan dekhne lagte. 

Ek din ki baat hain. Sunday ka din tha aur Yuvaan ki chutti thi. Yuvaan ne aaj koi Movie dekhne ka faisla kiya. Woh tayyar hua aur apni Bike se Cinema Hall gaya. Woh Ticket Counter par khada tha aur apni baari aane ka intezaar kar raha tha. Tabhi uski nazar Vidisha par padi. Dono ne ek dusre ko dekha aur muskuraye. Yuvaan turant Ticket line se bahar nikla aur hadbadahate hue, Vidisha ke saamne jaakar khada ho gaya. Isi dauraan uska santulan bigda aur woh phisalte-phisalte bachaa. 

Yeh dekh, Vidisha hans padi. Vidisha ke chehre par hansi dekh woh muskuraya. Phir Yuvaan ne kaha, "Movie dekhne aayi ho ?"

Vidisha - "Haan."

Yuvaan - "Kya hum dono saath mein Movie dekhe ? Agar tumhe koi aitraaz na ho toh."

Vidisha ne 'Haan' mein apna sar hilaaya. 

Yuvaan dobara Ticket Counter ki line par jaa kar khada hua aur apni baari aane par do tickets lekar dobara Vidisha ke paas aaya. Woh dono ek saath Cinema Hall ke andar gaye aur saath baithkar Movie dekhe. Movie ka interval hua aur dono saath mein bahar aaye. Phir Yuvaan ne kaha, "Tum kuch khaana-peena pasand karogi ?"

Vidisha ne 'Na' mein apna sar hilaaya. 

Yuvaan - "Pehli baar hum dono bahar mile hain, agar tum kuch le leti toh, thoda accha lagta."

Vidisha - "Tum mujhe apna waqt de rahe ho, mere liye bas itna hi kaafi hain."

Yuvaan ne kaha, "Haan par..." Vidisha ne Yuvaan ki baat kaat te hue kaha, "Movie khatam hone ke baad, kahi bahar saath chale ? Toh zyada accha rahega. Ek dusre se saath thoda aur waqt beetane ke liye mil jaayega."

Yuvaan - "Thik hain."

Dono saath mein dobara Cinema Hall ke andar gaye aur Interval ke baad wali Movie dekhi. Movie khatam hui aur woh dono saath mein bahar aaye. 

Phir Yuvaan ne apne Bike nikaali aur Vidisha uske peeche baith gayi. Yuvaan ne Bike start ki aur ek Restaurant ke bahar jaakar Bike roki. Is dauraan woh dono hi khaamosh the. 

Woh dono saath mein us Restaurant ke andar gaye aur ek table par jaa kar baith gaye. 

Yuvaan - "Kya khaaogi Vidisha ?"

Vidisha - "Tum batao."

Yuvaan - "Pehle tum batao."

Vidisha - "Thik hain. Paneer Mutter aur Roti."

Yuvaan - "Aur Rice bhi."

Vidisha - "Na Na Baba. Woh bohut zyada ho jaayega."

Yuvaan - "Thik hain. Rice ka baad mein dekhte hain."

Vidisha - "Filhal ke liye bas itna hi rehne do tum."

Yuvaan muskurata hain aur kehta hain, "Thik hain." Phir woh order deta hain. Woh dono saath mein Dinner karte hain.

Woh dono aapas mein baat-cheet shuru kar dete hain.

Yuvaan - "Tum yahan kaha par rehti ho, Vidisha ?"

Vidisha - "Main Samarth Nagar mein rehti hoon. Tum kaha par rehte ho ?"

Yuvaan - "Main Mhada Society mein rehta hoon."

Vidisha - "Tumhara ghar toh zara durr hain."

Yuvaan - "Tumhare Papa kya kaam karte hain ?"

Vidisha - "Woh Income Tax mein naukri karte hain. Aur tumhare Papa ?"

Yuvaan - "Woh Vigilance Department mein naukri karte hain."

Vidisha - "Wow. Hum dono ke beech yeh ek Common baat hain."

Yuvaan - "Kya ?"

Vidisha - "Hum dono ke Papa, Sarkaari naukri karte hain."

Woh dono hans padte hain. 

 Kuch der tak woh dono ek dusre se behad khul kar baat-cheet karna shuru kar dete hain. Woh dono aapas mein apne ke baare mein, apne bachpan ke baare mein aur apni pasand napasand ke baare mein charcha karte hain.

 Phir Yuvaan kehta hain, "Ab Rice ka order diya jaaye ?"

Vidisha - "Mera peat toh bhar chuka hain."

Yuvaan - "Ice Cream ya kuch aur deserts mein dekh lete hain."

Vidisha - "Koi zaroorat nahi hain."

Yuvaan khaamosh ho gaya. Vidisha samajh jaati hain ki, Yuvaan naaraz ho chuka hain. Woh Yuvaan se kehti hain, "Bewajah ka itna kharcha karna sahi baat nahi hain Yuvaan."

Yuvaan - "Baat kharche ki nahi hain."

Vidisha - "Phir ?"

Yuvaan - "Ek din ki toh baat hain."

Vidisha - "Phir thik hain. Aaj ke baad, hum dobara bahar nahi milenge ?"

Yuvaan jhatke se kehta hain, "Are nahi, nahi. Zaroor milenge. Mera matlab hain, agar tum chaho toh."

Vidisha - "Toh tum mujhse aage bhi bahar milte rehna chahte ho."

Yuvaan - "Agar tumhe koi aitraaz hain, toh yeh hamari aakhiri mulaakat ho sakti hain. Aage waisa hi hoga, jaisa ki tum chahogi."

Vidisha - "Bas ek shart hain meri."

Yuvaan - "Tumhari har shart manzoor hain."

Vidisha - "Aisa kyun ?"

Yuvaan sharma jaata hain. Phir woh kehta hain, "Accha tum zara apni shart ke baare mein toh batao."

Vidisha - "Yeh Bill main bharungi."

Yuvaan - "Yeh nahi ho sakta hain."

Vidisha - "Toh phir hum aage milenge bhi nahi."

Yuvaan - "Lekin, hum dono pehli baar saath mein bahar hue hain. Kya tum mujhe tumhare liye itna bhi nahi karne de sakti ho ?"

Vidisha - "Kis haq se ?"

Dono sharma jaate hain. Phir Vidisha aage kehti hain, "Darasal main bhi tumse aage is tarah se milte rehna chahti hoon Yuvaan. Lekin, tumhe meri yeh baat maan ni padegi. Bill hum dono milkar bharenge."

Yuvaan - "Lekin, Vidisha...." 

Vidisha Yuvaan ki baat kaat te hue kehti hain, "Agar tum meri izzat karte ho, toh tum meri yeh baat maanoge aur aage bhi meri saari baatein maante rahoge."

Yuvaan - "Kis haq se ?"

Vidisha sharma jaati hain aur Yuvaan muskurata hain. Phir woh aage kehta hain, "Abse wahi hoga, jo tum chahogi Vidisha."

Vidisha - "Bohut acche."

Bill woh dono aadha-aadha bhar dete hain. Phir woh dono Restaurant ke bahar nikalte hain. Phir Vidisha kehti hain, "Toh main jaaun ? Bohut waqt guzar chuka hain."

Yuvaan - "Tum mujhe Call karna."

Vidisha - "Kya ?"

Yuvaan - "Mera matlab hain ki, main tumhe Call karunga."

Vidisha kuch pal sochti hain aur kehti hain, "Thik hain. Tum mera Contact Number le lo." 

Uske baad, dono College mein ek dusre se milte-julte toh rehte hi the. Saath hi, phone par bhi un dono ke beech aksar shaam ke dauraan baatein hona shuru ho gaya. Dheere-Dheere woh dono ek dusre ke behad kareeb aate gaye. 

Ab woh dono aksar College ke baad, kahi bahar baith kar ek dusre ke saath khoob waqt bhi beetate. 

Kabhi-Kabhi woh dono, saath mein bahar bhi mil liya karte. 

Ek din ki baat hain. Vidisha ka janmdin tha aur yeh baat Yuvaan ko pata thi. Dono College mein mile aur Yuvaan ne kaha, "Happy Birthday Vidisha."

Vidisha - "Thank You."

Phir Vidisha achanak se keh padi, "Sirf wish kar diya aur ho gaya ? Tumne toh koi Tohfa toh diya hi nahi mujhe."

Yuvaan - "Waise kya tohfa chahiye tumhe ?"

Vidisha - "Tohfa apne pasand se diya jaata hain."

Yuvaan - "Toh thik hain. Tum College ke baad mere saath chalna."

Vidisha - "Thik hain."

College ke baad, Vidisha Yuvaan ke Bike par baith jaati hain aur woh dono saath mein chale jaate hain. Bike par safar ho raha tha. Vidisha Yuvaan se puchti hain, "Hum kaha par jaa rahe hain Yuvaan ?"

Yuvaan - "Yeh ek surprise hain."

Vidisha - "Mujhe abhi jaan na hain."

Yuvaan - "Aaj chahe kuch bhi ho jaaye, main aaj tumhari zidd ke saamne nahi jhukunga."

Vidisha - "Agar tum meri..."

Tabhi Yuvaan Vidisha ki baat kaat te hue kehta hain, "Agar tum meri izzat karti ho, toh aaj tum mujhse koi sawaal nahi karogi."

Vidisha - "Thik hain."

Yuvaan - "Bas kuch pal ka sabr rakho."

Vidisha - "Main samajh nahi paa rahi hoon, ki tumhare Dil mein kya chal raha hain."

Yuvaan - "Thodi hi der mein sab samajh mein aa jaayega."

Thodi der baad, Yuvaan ek store ke saamne apni Bike rokta hain aur Vidisha se kehta hain, "Aao chale."

Vidisha - "Tum kya karna chahte ho, main samajh hi nahi paa rahi hoon."

Yuvaan - "Pehle tum aao toh."

Vidisha kuch nahi kehti hain aur woh dono saath mein us store ke andar chale jaate hain. Yuvaan kuch bracelets dekhna shuru kar deta hain aur Vidisha use khaamoshi se dekhti rehti hain. Phir Yuvaan ko ek bracelet pasand aata hain aur woh us bracelet ko kharid leta hain. 

Phir woh Vidisha se kehta hain, "Chalo chalte hain."

Vidisha bina kuch kahe, Yuvaan ke saath bahar chali aati hain. 

Phir woh Vidisha se kehta hain, "Chalo kisi Restaurant chalte hain."

Vidisha - "Birthday mera hain. Aaj mujhe tumhe party deni chahiye aur tum mujhe na jaane kaha se kaha ki baaton mein bas ghumaaye jaa rahe ho."

Yuvaan - "Bas thoda sa sabr rakho Vidisha."

Vidisha Yuvaan ke peeche Bike par baith jaati hain aur woh dono Restaurant mein pohuch jaate hain. Phir woh dono ek table par baith jaate hain. 

Yuvaan - "Kya khaaogi ?"

Vidisha - "Mera koi mann nahi hain."

Yuvaan - "Thik hain. Main tumhare liye kuch order kar deta hoon."

Vidisha - "Aaj ka yeh Birthday mujhe bas tumhari wajah se zindagi bhar yaad rahega."

Vidisha naaraz thi aur Yuvaan un dono ke liye khaana order karta hain. Phir woh apni jeb se woh Bracelet nikaalta hain aur bina kuch kahe, Vidisha ka haath thaamta hain. Uske baad, Yuvaan Vidisha ko woh Bracelet pehna deta hain. 

Vidisha - "Yeh kya tha Yuvaan. Bracelet toh tum mujhe wahan par bhi pehna sakte the."

Yuvaan - "Haan par, is jagah par yeh pal thoda khaas ban jaata."

Vidisha - "Aisa kyun ?"

Yuvaan - "Pehle tum Bracelet dekh kar toh batao, tumhe pasand aa raha hain ki nahi. Mujhe toh yeh Bracelet tumhare haanthon par khoob janch raha hain."

Vidisha - "Mujhe bhi pasand aaya hain yeh Bracelet."

Yuvaan - "Tum ise zara dhyaan se dekho."

Vidisha Bracelet ki aur dhyaan se dekhti hain aur woh hairaan ho jaati hain. Us Bracelet par 'I Love You' ka design bana hua tha. Vidisha sharma jaati hain aur woh apni nazrein jhuka leti hain. Phir woh Yuvaan ka haath pakadti hain aur woh Yuvaan ki aankhon mein dekhti hain. Un dono ki nazrein milti hain aur phir Vidisha kehti hain, "Lagta hain ab hume College khatam hote hi, kamaana shuru karna hoga. Jald-Se-Jald kamayenge, tabhi toh ghar walon se baat kar paayenge."

Phir woh dono ek dusre ki aankhon mein doob jaate hain. 

                        - Ved Vineet Gautam