Ganesh Chaturvedi peshe se ek vyapaari hain. Unki patni ka naam, Lalita Chaturvedi hain. Ganesh aur Lalita ke teen bacche hain. Do ladke aur ek ladki. Bade bete ka naam, Ayush hain aur chote bete ka naam, Parth hain. Us dampati ki ladki ka naam, Aarti hain. Ayush aur Parth Ganesh ke saath hi vyapaar mein haath bantate hain. Teeno baap-bete har roz subah tayyar hokar saath mein kaam par jaate hain aur shaam mein saath mein hi, laut aate hain. Shaam mein poora parivaar saath mein baithkar aapas mein baat-cheet karte aur phir saath mein hanste-muskurate khaate-peete.
Ek din ki baat hain. Shaam ka waqt tha aur ghar ke sabhi sadasya saath mein baithe hue the. Sabhi log aapas mein yahan-wahan ki baatein kar rahe the. Tabhi Ganesh kehta hain, "Main aap sabhi logon se ek baat kehna chahta hoon."
Ghar ke baaki ke sadasya Ganesh ki aur dhyaan se dekh rahe the. Ganesh ne apni baat kehna shuru ki, "Darasal main Do-Teen din pehle, Narendra Kumar se mila tha. Usne meri mulakaat, ek aadmi se karwayi. Unka naam, Sudhir Sharma hain aur unki ek beti hain. Us ladki ka naam, Urmila hain. Toh baat yeh hain ki, Narendra ne Ayush ke liye, Urmila ke baare mein socha hain."
Ganesh ke muh se yeh baat sunte hi, ghar ke sabhi sadasya behad khush ho gaye. Sabhi logon ke chehre par muskaan thi. Tabhi Lalita Ganesh se puchti hain, "Ladki dikhne mein kaisi hain Ji ?"
Ganesh - "Ati Sundar."
Phir Ganesh Ayush se kehta hain, "Beta tum kya kehte ho ?"
Ayush ka chehra sharm se laal ho utha tha. Uska sar neeche tha aur woh behad sharma kar kehta hain, "Papa ab main kya keh sakta hoon."
Aarti - "Zara dekho toh, Shaadi ka naam sunkar; Bhaiyaa kitna sharma rahe hain."
Ghar ke sabhi sadasya hans padte hain.
Phir Ganesh Ayush se kehta hain, "Beta agar tumhe koi aur ladki pasand ho, toh tum khul kar bata sakte ho."
Ayush - "Aisi koi baat nahi hain Papa."
Lalita - "Ladki dikhne mein kaisi hain ?"
Ganesh - "Behad khoobsurat hain. Are mere paas us ladki ki tasveer bhi hain."
Phir Ganesh apni jeb mein haath daalkar, phone nikaalta hain aur apne phone mein ladki ki tasveer dhoondhkar, Lalita ko apna phone thama deta hain.
Ladki ki tasveer dekhte hi, Lalita kehti hain, "Ladki dikhne mein behad khoobsurat hain."
Aarti - "Mummy mujhe bhi ladki ki tasveer dikhaao na ?"
Lalita Aarti ko phone pakdati hain. Aarti bhi kehti hain, "Haan ladki khoobsurat toh bohut hain."
Ganesh Ayush se kehta hain, "Beta tum bhi ladki ki tasveer dekh lo zara."
Aarti Ayush ko phone thamati hain. Ayush tasveer dekhta hain aur muskurata hain. Lalita Ayush se kehti hain, "Tumhe ladki pasand aayi Beta ?"
Ayush 'Haan' mein apna sar hilata hain.
Ganesh - "Toh kya main Sudhir Sharma se baat kar loon Beta ?"
Ayush - "Jaisa aapko thik lage Papa."
Ganesh - "Thik hain. Main un logon se baat kar leta hoon. Uske baad, jab bhi woh log kahenge, hum log unse milne ke liye chale jaayenge. Thik hain Beta ?"
Ayush - "Thik hain Papa."
Ganesh, Narendra Kumar aur Sudhir Sharma dono se baat karta hain. Kuch hi dino mein dono Parivaar milte hain. Ganesh apne poore Parivaar ke saath, Sudhir Sharma ke shehar jaata hain.
Dono Parivaar aamne-saamne baithe rehte hain aur Narendra Kumar bhi wahan par maujood rehte hain.
Ganesh Sudhir se kehte hain, "Bhaisahab hamara ladka aapke saamne hi hain. Aap usse khul kar sawaal-jawaab kariye. Bhai aap ladki ke pita hain. Aap bhi aaswasth ho jaaye."
Sudhir - "Yeh aap kaisi baat kar rahe hain Bhaisahab ?"
Ganesh - "Are Bhai hum toh bas yeh chahte hain, hamare beech koi parda na rahe."
Sudhir - "Bhaisahab hamara vishwaas Narendra Bhaisahab par hain aur unka aap par. Toh hum bhi aap par aankh band karke hi vishwaas karenge na."
Ganesh - "Yeh baat toh aapne pate ki hain Bhaisahab."
Sudhir - "Agar Ayush humse koi sawaal karna chahe, toh kar sakte hain."
Ayush - "Nahi Uncle. Mera bhi koi sawaal nahi hain."
Phir Sudhir Ganesh se kehta hain, "Toh thik hain Bhaisahab. Hamari taraf se toh Haan hain. Agar aap logon ki koi iccha ya shart ho, toh zaroor bata dijiye."
Ganesh - "Bas ek Naariyal aur Sawaa Rupaye dekar, hamare is naye rishte ki shuruaat kar lijiye Bhaisahab."
Sudhir - "Jaisi aapki iccha Bhaisahab. Toh kya main yeh rishta pakka samajhun ?"
Ganesh - "Bilkul pakka Bhaisahab."
Sudhir saamne padi hui plate utha ta hain aur use Ganesh ke saamne karte hue kehta hain, "Chaliye phir muh meetha karte hain."
Ganesh plate se Mithaai utha ta hain aur Sudhir ko khilaata hain. Badle mein, Sudhir bhi Ganesh ko Mithaai khilaata hain.
Dono Parivaar ke sabhi sadasya ek dusre ko Mithaai khilaate hain. Pandit Ji ko bulaaya jaata hain aur Shaadi ki taarikh nikaali jaati hain. Shaadi ki taarikh che mahine baad ki hoti hain. Ganesh aur uska Parivaar, Do-Teen din Sudhir ke ghar par hi rehta hain. Is dauraan un dono Parivaaron ke beech, dher saari baat-cheet hoti hain aur isi bahane, un logon ko; ek dusre ko aur behtar tareeke se jaan ne ka mauka milta hain.
Uske baad, Ganesh apne Parivaar ke saath, wapas apne shehar chala jaata hain aur dono Parivaar Shaadi ki tayaariyon mein lag jaate hain.
Aakhir kaar, che mahine baad, Ayush aur Urmila ki Shaadi ho jaati hain.
Shaadi ke agle din se hi, Urmila Lalita aur Aarti ke saath kaam mein haath bantana shuru kar deti hain.
Har roz ki tarah us din bhi; Ganesh, Ayush aur Parth daftar ke liye nikal jaate hain. Din bhar ka kaam khatam karke shaam mein Ayush aur Parth ghar laut aate hain. Pehli baar aisa hua hain ki, teeno saath mein ghar nahi laute. Ganesh ko na paakar, Lalita un dono se puchti hain, "Aaj sirf tum dono Bhai saath mein ho ?"
Ayush - "Haan Papa baad mein aayenge."
Lalita - "Aakhir yeh kaha par gaye hue hain ?"
Parth - "Pata nahi Mummy. Ghar ke nazdeek hi, Papa ne Car rukwa di aur gaadi se utar gaye. Phir woh bole, tum dono Bhai ghar chale jaao; main thodi der mein aata hoon."
Lalita - "Lekin woh gaye kaha par hain ?"
Ayush - "Pata nahi Mummy."
Aarti - "Papa ne aaj tak aisa kabhi nahi kiya. Yeh pehli baar aisa hua hain ki, aap teeno saath mein nahi aaye ho."
Parth - "Ab hum dono keh bhi kya sakte hain ?"
Kuch der baad, Ganesh ghar laut aata hain. Use dekh kar, ghar ke sabhi sadasya aashwast ho jaate hain. Ganesh ke haathon mein kuch packets hote hain. Phir Ganesh se Lalita kehti hain, "Aap kaha par gaye hue the ?"
Ganesh - "Woh main bas zara dukaan gaya hua tha. Kuch saaman kharidne ke liye."
Aarti - "Toh Papa aap akele kyun gaye ?"
"Kyunki main akela hi jaana chahta tha. Sabse pehle tum yeh sab pakdo toh." Kehte hue, Ganesh sabhi packets Aarti ko thama deta hain. Phir Aarti puchti hain, "Ismein kya hain Papa ?"
Ganesh - "Tum khud hi khol kar dekh lo."
Aarti packets kholti hain. Un packets mein kuch Mithaayiaan aur kuch phool rehte hain. Yeh dekh kar, Lalita puchti hain, "Yeh sab kya hain ?"
Ganesh - "Woh hamare ghar ke paas Shri Krishna Ji ka mandir nahi hain, main bas wahi par hi gaya tha. Thoda prasaad mila aur laut te waqt, Mithaai ki dukaan par nazar padi; toh maine socha aaj hum sab Mitaaiyon ka bhi swaad chakh lenge."
Lalita - "Toh akele jaane ki kya zaroorat thi aapko ?"
Ganesh - "Main is ehsaas ko akele hi mehsus karna chahta tha. Accha sabse pehle, jaldi se sabhi ko Mithaayiaan khilaao."
Aarti Mithaayiaan nikaalkar sabko deti hain aur ghar ke sabhi sadasya saath mein baithkar Mithaai ka swaad lete hue, aapas mein baat-cheet karte hain.
Raat mein ghar ke sabhi sadasya saath mein khaana kha kar apne-apne kamre mein sone ke liye chale jaate hain.
Kareeb do ghanton baad, Ganesh ki neend khulti hain. Pyaas ke maare, uska gala sukh chuka tha. Woh bistar se uthta hain aur Rasode mein jaata hain. Woh fridge kholta hain aur paani ka bottle nikaalta hain. Phir woh ek glass mein paani bhar kar peene lagta hain. Tabhi use kuch mehsus hota hain. Ganesh ko kisi ki aawaz sunaayi deti hain.
Aawazein badi halki-halki si thi, lekin, jaani-pehchaani si thi. Woh aawaz ka peecha karte hue chalte jaata hain aur Ayush ke kamre tak pahunch jaata hain. Woh aawazein Ayush ke kamre se aa rahi thi. Ayush aur Urmila aapas mein, kuch baat-cheet kar rahe the.
Ayush - "Ek baar mere paas do teen acche kaam aa jaaye, toh hum log saath mein kahi ghumne ke liye jaayenge."
Urmila - "Haan zaroor jaayenge. Waise kuch socha hain, ki kaha jaayenge ghumne ke liye ?"
Ayush - "Tum batao. Tum kaha par ghumna chahti ho ?"
Urmila - "Jahan par sabka jaane ka Mann ho."
Ayush - "Lekin tumhari bhi toh koi iccha hogi ?"
Urmila - "Filhal toh aisa kuch nahi socha hain. Lekin, hum log jahan bhi jaayenge, hum sab Parivaar saath mein hi ghumne ke liye jaayenge."
Ayush - "Kya tum akele mein mere saath kahi nahi jaana chahti ho ?"
Urmila - "Bilkul bhi nahi."
Ayush hans padta hain.
Urmila - "Dekho yeh baat toh hain ki hum dono Pati-Patni hain. Lekin, Parivaar mein hum sab saath mein rehte hain aur hume aapas mein mil-julkar rehna chahiye."
Ayush - "Tumhari baatein sunkar bohut accha laga."
Urmila - "Chalo tumhe meri koi baat toh acchi lagi."
Dono hans padte hain.
Un dono ki baatein sunkar, Ganesh ko behad khushi mehsus hoti hain. Woh sochta hain, 'Aakhir meri Bahu kitni samajhdaar hain. Woh ghar ke sabhi sadasya ke baare mein sochti hain. Main bada bhagyashaali hoon.'
Ganesh ko ek alag hi sukh ka ehsaas hota hain. Uske chehre par muskaan cha jaati hain. Woh apne kamre mein dobara jaakar so jaata hain.
Agle din ki baat hain. Din bhar ka kaam khatam karke, teeno baap-bete ghar laut aate hain. Har roz ki tarah parivaar ke sabhi sadasya saath mein baithkar aapas mein baat-cheet karne lagte hain.
Tabhi achaanak se Lalita ko Dil ka daura pad jaata hain. Ghar ke sabhi sadasya hadbada jaate hain. Parth turant gaadi nikaalta hain aur woh log, Lalita ko gaadi se aspataal le jaate hain. Lalita ko aspataal mein turant bharti karaya jaata hain. Lalita ko achaanak se is tarah se Dil ka daura padna, sabhi ke liye hairaan janak tha.
Kuch ghanton ke ilaaj ke baad, Doctors Lalita ko mrit ghoshit kar dete hain. Ghar mein maatam ka maahol cha jaata hain. Sabhi log behad dukhi the. Lalita ke achaanak mrityu ne, Ganesh ko behad ghumgeen kar diya. Woh ab zyada kisi se baat-cheet nahi karta hain. Ghar ke logon se bhi nahi.
Ganesh kabhi daftar jaata, toh kabhi nahi jaata. Ab uski tabiyat bhi zara naazuk hone lag gayi hain. Yeh baat uske bacche bakhubi samajh chuke hain. Tabhi Urmila sabse kehti hain, "Is ghar mein Mummy ki dher saari yaadein hain. Papa ka maahol jab tak nahi badlega, tab tak Papa isi tarah dukh aur peeda mein hi rahenge."
Aarti - "Haan Bhabhi bilkul sahi keh rahi hain. Hum log chahe kitna bhi Papa ko samajhne ki koshish kare, chahe hum kitna bhi Papa ka saath dene ki koshish kare; Papa is ghum se jaldi nahi ubhar paayenge."
Parth - "Mujhe bhi yahi lagta hain ki, Papa ka maahol badalne ki zaroorat hain. Lekin, agar hum sab log Papa ke saath rahenge, toh hi, Papa dheere-dheere ubhar paaye. Is waqt, Papa ko akela chodna bhi sahi nahi hoga."
Ayush - "Toh thik hain phir. Hum log apna kaam kuch dino ke liye phone par kar lenge. Kahi chalte hain. Lekin, hum log jaaye toh kaha jaaye Papa ko lekar ?"
Urmila - "Agar aap log chaho, toh hum log kuch dino ke liye mere ghar chale chalte hain. Wahan par mere Papa-Mummy bhi honge, unhe hum-umra ke logon ke saath waqt beetane ka bhi mauka milega. Kuch din woh mere Papa-Mummy ke saath waqt beetayenge, toh shayad unka bhi mann halka ho jaaye."
Parth - "Yeh bhi sahi idea hain Bhabhi."
Sabhi log Urmila ki baat se sahmat ho jaate hain. Urmila apne maata-pita se baat karti hain aur woh log bhi tayyar ho jaate hain. Do-Teen din mein hi, ghar ke sabhi sadasya Urmila ke ghar ke liye nikal padte hain. Woh log wahan par pohunchte hain. Ganesh ko dekhte hi, Sudhir use apne gale se laga leta hain aur kehta hain, "Accha hua Bhaisahab aap humse milne ke liye aa gaye. Ab mujhe apne Bhai ki kami mehsus nahi hogi."
Sudhir aur uski patni apna zyada se zyada waqt, Ganesh ke saath beetate hain. Bhale hi, Lalita ki kami Ganesh ke jeevan mein hamesha hi rahegi. Lekin, jo hum-umra ka saath Ganesh ko mil raha hain, Sudhir aur uski patni dwara; kam se kam woh dheere-dheere hi sahi, Ganesh ko apne jeevan ko aage beetane ka koi raasta avashya hi dikha degi.
- Ved Vineet Gautam
Comments
Post a Comment