Charcha

 Akshay Kashyap apne maata-pita ka iklauta ladka hain. Woh ek Company mein naukri karta hain. Woh behad mehanti aur imaandar ladka hain. Akshay ki pagaar mahine ki dedh laakh rupayee hain. Woh bohut padha-likha vyakti hain. Use Company ki taraf se ek Bike bhi mili hain. Woh apne maata-pita ke saath hi rehta hain. 

Akshay har roz subah tayyar hokar apne daftar jaata hain aur kaam poora hote hi apni Bike se wapas ghar laut aata hain.

Ek din ki baat hain. Har roz ki tarah, Akshay us  din bhi apne ghar ki aur laut raha tha. Tabhi achaanak se uski nazar apni Pita par padi. Woh sadak ke kinaare khade aati-jaati gaadiyon ko haath dikha rahe the. Akshay us aur apni Bike ghumaata hain aur apne Pita ke saamne apni Bike ruka deta hain. Dono ek dusre ko dekh kar muskurate hain. Phir Akshay ke Pita bina kuch kahe uske Bike par aakar baith jaate hain. Akshay apni Bike shuru karta hain aur dono baap-bete ka safar shuru ho jaata hain. 

Bike halki-phulki raftaar se chal rahi thi. Dono pita-santaan khaamosh the. Kuch dur tak dono yun hi khaamosh rahe. Phir Akshay ke Pita ne kaha, "Aaj mausam kitna suhaana hain na Beta ?"

Akshay - "Haan Papa. Aaj mausam vaakayi behad khoobsurat hain."

Akshay Ke Pita - "Shayad isiliye tum apni Bike bohut aaram-aaram se chala rahe ho."

Akshay - "Haan Papa. Maine socha, mausam ka thoda lutf uthaaya jaaye. Aakhir itna khoobsurat nazaara aajkal jaldi dekhne ke liye kaha milta hain."

Akshay Ke Pita - "Baat toh sahi kahi hain tumne beta. Hamare zamaane mein aisa Mausam aksar dekhne ke liye mil jaaya karta tha. Vaayu Pradushan dheere-dheere, Prakriti ko tabaah karta jaa raha hain."

Akshay - "Papa aapke waqt ki koi baat bataiye na."

Akshay Ke Pita - "Are Bhai hamara daur hi alag hua karta tha. Hamare zamaane mein gaadiyan behad kam logon ke paas hua karti thi. Bus aur Rickshaw hi hamare saathi hua karte the. Main aksar apne mohalle ke ladkon ke saath jaaya karta tha. Haalanki gaadi ka kiraaya thik-thak tha. Lekin, kamaayi bhi logon ki kam hua karti thi. Lekin, haan aache se guzaara nikal jaata tha."

Akshay - "Papa aajkal itni saari badi-badi Companies hain. Market mein itna Competition bhi hain. Us zamane mein bhi toh Competitions hua karte rahe honge ?"

Akshay Ke Pita - "Bilkul. Lekin, us waqt logon mein bohut sabr tha. Log behad mehanti hua karte the Beta."

Akshay - "Papa us zamaane mein log apna vyapaar shuru kaise kar paate the ? Jab ki us waqt mein niveshak bhi nahi hua karte the. Phir bhi kai logon ne behad bade darje ka vyapaar khada karne mein safal rahe ?"

Akshay Ke Pita - "Haan Bilkul."

Akshay - "Aakhir kaise  Papa ?"

Akshay Ke Pita - "Sabr."

Akshay - "Kya ?"

Akshay Ke Pita - "Sabr, Beta Sabr."

Akshay - "Accha."

Akshay Ke Pita - "Beta us zamaane mein logon ke paas saadhan nahi the. Naa hi Internet jaisi koi vyavastha thi. Us waqt ke log, nirantar prayaas kiya karte the aur bina jhijhak ke, nayi-nayi soch ko protsaahit kiya karte the. Naye-Naye raaston par chalna. Apna raasta khud banane ki soch ne, vyapaar karne ke naye-naye tareekon ko janam diya."

Akshay - "Aur Papa ek sawaal tha."

Akshay Ke Pita - "Haan puncho Beta."

Akshay - "Us zamaane mein jab Internet ka daur hi nahi tha, tab un logon ko samajh mein kaise aata tha ki, kaam aakhir kis tarah se karna hain ? Woh log aakhir faisla kaise le paate the Papa ?"

Akshay Ke Pita - "Bas woh log kaam karte gaye aur kaam seekhte gaye. Galtiyaan karte gaye aur use sudhaarte gaye. Girte-Padte sambhalna seekhe aur sambhalte-sambhalte chalna seekhe. Apne anubhavon se woh log aage badhte gaye."

Akshay apne Pita ki baat behad dhyaan se sunn raha tha. Tabhi achaanak se Akshay Ke Pita ne kaha, "Are Beta Gaadi roko, ghar peeche chala gaya hain."

Akshay apni Bike rokta hain aur Bike ghumakar, apne ghar ke saamne rok deta hain. Phir dono Pita-Putr Bike se utarte hain. Akshay behad gehri soch mein dooba hua tha. Akshay ko khoya-khoya hua dekh kar, uske Pita puchte hain, "Aakhir tum kis soch mein doobe hue ho Beta ?"

Akshay - "Papa agar koi faisla behad ulta pad jaaye. Jis nirnay ka behad gambhir parinaam bhugatna pade, tab ?"

Akshay Ke Pita - "Iska yeh bilkul bhi matlab nahi hain, ki us vyakti ko nirnay lena nahi aata hain. Galtiyaan toh hoti hi rahengi. Zindagi bhar tum galtiyaan karoge aur tumhe un galtiyon ke behad gambhir parinaam bhi jhelne honge. Lekin, tum dobara ek aur nirnay loge aur shayad woh sahi bhi saabit ho jaaye. Bas woh ek sahi nirnay tumhari pichli saari galtiyon ka harjaana bhar dega. Woh ek sahi kadam, tumhare saare nuksaan ki bharpaayi bhi kar dega aur saath hi saath tumhe behad unchaayi par bhi le jaayega. Lekin, itne saare jhatke jhelne ki himmat ki bhi zaroorat hoti hain. Baar-Baar lagaatar sab kuch khoote rehne ke bawjood, kuch nayaa prapt karne ka hausla bhi zaroori hota hain. Jaisa ki maine pehle kaha tha, Sabr. Apne Sabr ka baandh kabhi tootne mat dena. Safalta kab dastak degi, is baat ki bhavishya-vaani koi bhi nahi kar sakta hain. Manushya ke haath mein bas prayaas karna hain. Woh apna karm karte rahe, niyati sahi samay aane par, use phal avashya hi degi. Bas ek hi shart hain, chalte jaana hain."

 Phir Akshay apne Pita ke saath ghar ke andar chale jaata hain. Kuch der tak, yahan-wahan ki baat-cheet karte-karte kab raat ho jaati hain, pata hi nahi chal paata hain. Uske baad, ghar ke teeno sadasya, khaana khaa kar apne-apne kamre mein sone ke liye chale jaate hain.

Agle din se woh dobara apni naukri par nikal padta hain. Daftar ka kaam khatam karke, jab woh wapas aa raha hota hain, tab Akshay ko pichle din, apne Pita ke saath hue, vartaalap ki yaad aati hain. Akshay ke mann mein bas ek khayal aata hain, 'Aakhir woh log kitne mahaan rahe honge. Aakhir unki soch kitni durr-darshi rahi hogi. Main apni soch mein kaise woh durr-darshita laaun ?'

'Sabr ? Shayad Sabr. Papa ne bhi kal yahi baat kahi thi. Haan shayad Sabr hi hain, safalta ki chaabhi aur nirantar prayaas bhi.' Akshay sochta hain.

Kuch der baad, Akshay apne ghar par pohunch jaata hain. Woh haath-muh dhokar, apne kapde badalta hain aur Hall mein aakar baith jaata hain. Kuch der tak woh apne maata-pita se yahan-wahan ki baat-cheet karta hain. Phir ghar ke teeno sadasya saath mein khaana khaate hain aur sabhi apne-apne kamre mein jaakar, sone ki tayyari karte hain. 

Akshay apne kamre mein tha. Kamra andar se band tha aur kamre ki batti bhi band thi. Woh apne bistar par leta hua tha. Woh sone ka prayaas kar raha tha, lekin, use neend nahi aa rahi thi. Akshay ko pichle din, apne Pita ke saath hua vartaalap yaad aane lagta hain. Akshay ke aankhon se neend toh udi hui toh thi hi, woh apne vichaaron ki gehraaiyon mein jaane lagta hain. 

Akshay sochta hain, 'Aakhir kitne mahaan the woh log. Veh log ek Kivadantee the shayad. Shayad kya, the hi, Kivadantee kabhi nahi marte hain. Kivadantee hamesha logon ke dilon mein, Zinda rehte hain. Kivadantee duniya ko palat kar rakh dete hain. Veh log, duniya ko ek nayi disha dete hain aur aane waali peedhiyon ko aage badhne ka raasta dikhate hain.'

Akshay aage sochta hain, 'Aaj ki peedhi mein bhi kai Kivadantee hain is duniya mein. Jaise ki kai Neta, Vyapaari aur Samaaj Sevak. Puraane zamaane ke Kivadantee ki toh baat hi kuch aur thi. Krantikari, Desh-Bhakt, Neta, Lekhak aur shayad aur bhi kayi tarah ke log. Un logon ne aakhir kis tarah se is sansaar ki soch badli ? Un logon ke soch ki durr-darshita behad tivra rahi hogi. Shayad veh log zyada se zyada samay, apni soch mein doobe rehte rahe ho. Aakhir un logon ka sochne ka tareeka kya raha hoga ? Aakhir un logon ka jeevan jeene ka tareeka kaisa raha hoga ? Un mahaan vyaktiyon ka rehan-sehan. Unka baat-cheet ka tareeka. Unka paristhitiyon ka saamna karne ki himmat. Paristhitiyon ko sambhaalane ka unaka tareeka behad alag hi darje ka raha hoga.'

'Us samay ke kai log, bina kisi Bank se Karz liye, apna vyapaar shuru kar diya karte the. Us samay ke Neta jab apna bhaashan dete the, hazaaron-laakhon log unhe sunne ke liye aaya karte the. Aam Aadmi un logon ki nazron se is duniya ka bhavishya dekh paate the. Us samay ke log un sabhi durr-darshi soch wale vyaktiyon ko apna aadarsh maante the. Koi un logon ko apna aadarsh maanta tha. Toh koi, apne bachchon ko un logon ka udaaharan dekar prerit karta tha. Naa jaane kaha gaye woh log. Ab naa hi woh din rahe, naa hi woh zamaana raha.' Akshay ki aankhein bhar aati hain. Akshay ko apne andar ek alag hi urja ka aabhaas ho raha tha. Woh yeh soch raha tha ki, 'Agar un mahaan vyaktiyon ke baare mein keval sochne se hi mere andar itni urja aa sakti hain, toh unke baare mein padh kar main kitna urjaavaan ban jaaunga. Aur agar main un mahaan vyaktiyon ki tarah rehne ka prayaas karun, agar mere andar un logon ka ek pratishat bhi aa jaaye, toh shayad mera vyaktitva hi poori tarah se badal jaaye.'

Akshay aage sochta hain, 'Shayad mujhe unn sabhi mahaan vyaktiyon ke baare mein padhna shuru karna chahiye. Unke baare mein dhyaan se padh kar, unke jeevan mein jhaankar; mujhe jeevan ke amulya gyaan prapt ho sakte hain. Darasal un mahaan vyaktiyon ki jeevani mein, safalta ka marg chupa ho sakta hain. Shayad un logon ki jeevani mein, apne jeevan ko unchaayion par le jaane ka ek adrshy marg chupa ho sakta hain. Aavashyak hain, bas unke rehan-sehan ko, unke vyaktitva ko apne jeevan mein utaarne ki.'

Yahi sab sochte-sochte Akshay ko kab neend lag jaati hain, use khud pata hi nahi chal paata hain. Woh behad gehri neend mein so jaata hain. Na jaane woh kitne waqt se apne khayaalon ki duniya mein dooba hua tha aur shayad inhi khayaalon mein khoye hue rehne ki wajah se, use kab neend lag gayi, Akshay ko khud pata hi nahi chal paaya.

Agle din, Akshay ki neend khuli aur use aisa mehsus hua, jaise ki kaafi samay baad, woh ek acchi neend le paaya ho. Akshay ne apni ghadi ki aur dekha. Din ke dus baj rahe the. Woh aaj kaafi der se utha. Lekin, dikkat ki koi baat nahi thi, kyunki, aaj Akshay ki chutti thi. 

Akshay apne bistar par se uthta hain. Phir woh apni aankhein masalta hain aur ek angdaai leta hain. Tabhi Akshay ko mehsus hota hain ki koi uske kamre ka darwaaza khatkhata raha hain. Akshay darwaaza kholta hain aur saamne apne Pita ko khada paata hain. Akshay ke Pita, use dekh kar muskura rahe the. Badle mein Akshay bhi muskurata hain. Phir Akshay ke Pita kehte hain, "Tumhari neend poori ho gayi Beta ?"

"Haan Papa." Akshay jawaab deta hain. Woh aage kehta hain, "Bohut hi gehri neend soya tha main kal raat."  

Akshay Ke Pita - "Chalo yeh toh bohut hi badhiya baat hain."

Akshay phir muskurata hain. 

Akshay Ke Pita - "Tum tayyar hokar bahar aa jaao beta. Tumhari Mummy, tumhare liye naashta bana rahi hain."

Akshay - "Thik hain Papa."

Akshay ke Pita wapas chale jaate hain. Akshay Naha-Dhokar, tayyar hokar Hall mein jaata hain aur dekhta hain ki; Hall mein uske maata-pita naashta tayyar karke rakhe hue hain aur unhe bas Akshay ke aane ka intezaar tha. 

Akshay - "Aap logon ne abhi tak Naashta nahi kiya ?"

Akshay Ke Pita - "Nahi. Hume tumhare aane ka intezaar tha Beta."

Akshay apne Maata-Pita ke saamne jaakar baith jaata hain. Woh log naashta karna shuru karte hain. Phir Akshay Ke Pita kehte hain, "Kal hum dono kisi baat par charcha kar rahe the."

Akshay - "Haan Papa. Mujhe yaad hain. Main is baare mein aur bhi baatein aapse karna chahta hoon."

Akshay Ke Pita - "Chalo acchi baat hain. Hamare beech aachi charchaa hua karegi."

Akshay - "Woh baat toh hain Papa. Waise bhi maine faisla kiya hain, ki main un sabhi mahaan vyaktiyon ke baare mein internet par jaankaari ikattha karunga."

Akshay Ke Pita - "Yeh tumne bohut hi accha nirnay liya hain Beta. Aane wale samay mein tumhara vyaktitva bohut nikhrega dekhna."

Akshay - "Haan Papa."

Dono Pita-Putr saath mein gyaan ki charcha mein lag jaate hain.

                           - Ved Vineet Gautam