Waham

 Raghuvanshi Parivaar aur Suryavanshi Parivaar dono padosi hain, pichle bees saal se. Raghuvanshi Parivaar ke ghar mein do purush aur ek stree hain. Pati, Patni aur beta. Jabki Suryavanshi Parivaar ke ghar mein do purush aur do stree hain. Pati, Patni, beta aur beti. 

Is kahani ke mukhya kridaaron ke naam is prakaar hain. 

Raghuvanshi Parivaar : -

Shailesh Raghuvanshi, Nikita Raghuvanshi aur Luv Raghuvanshi. 

Luv, Shailesh aur Nikita ka beta hain. 

Suryavanshi Parivaar : -

Akshay Suryavanshi, Snehal Suryavanshi, Sumit Suryavanshi aur Arpita Suryavanshi.

Sumit aur Arpita, Akshay aur Snehal ke bacche hain. Woh dono judwa bhai-behen hain.

Kahani aaj se bees saal pehle shuru hoti hain. Us waqt bhi yeh dono parivaar ek dusre ke padosi hua karte the aur aksar dono parivaar ka ek dusre ke ghar aana-jaana hua karta tha. Dono parivaar ke bacche hamesha ek dusre ke saath khela karte the. 

Ek din ki baat hain, jab yeh teeno bacche saath mein khel rahe the. Khelte-Khelte achaanak se teeno baccho ke beech mein jhagda shuru ho gaya tha. Bachpan mein aksar bacchon ke beech mein chote-mote jhagde hote hi rehte hain. Tabhi Luv ne kaha, "Main aaj ke baad tum dono ke saath kabhi nahi khelunga."

Sumit - "Mat khel tu. Hum dono toh saath mein khel bhi lenge. Tu kiske saath khelega ?"

Arpita - "Luv tu toh akela hain aur tere pass toh Video Game bhi nahi hain."

Sumit aur Arpita hans padte hain. Luv ko dono par hi bohut gussa aata hain. Woh ek patthar uthata hain. Sumit aur Arpita ghabra jaate hain. Tabhi Luv ki nazar ek bicchoo par padti hain. Woh bicchoo Aripta ke pair ke nazdeek hi hota hain. Use darr tha ki kahi woh bicchoo Arpita ko kahi dank na maar de, isliye woh apne haathon mein pakda hua patthar us bicchoo ke upar phenkta hain aur woh bicchoo wahi par marr jaata hain. Phir Luv bhaagte hue, waha se chala jaata hain. 

Sumit aur Arpita ko is baat ka bilkul bhi yakeen nahi ho paa raha tha ki Luv ne unpar patthar phenka, is baat se anjaan ki ek bicchoo Arpita ke pass aa raha tha. 

Agle din, shaam mein usi samay Luv garden mein gaya. Woh Sumit aur Arpita ka intezaar kar raha tha. Thodi der ke baad, woh dono waha par aaye aur unhone Luv ko dekha. Luv ko dekh kar woh dono ne use koi pratikriya nahi di aur aapas mein khelne lage. Yeh dekh kar Luv bohut udaas hua aur woh wapas apne ghar ki aur jaane laga. 

Khelte-Khelte Arpita ne dekha ki jis aur Luv jaa raha tha, wahan par ek Saanp apna phan phailaye khada tha. Yeh dekh kar woh bohut darr gayi. Arpita ne turant apne zameen par se kuch chote patthar uthaye aur gulel se us saanp ko patthar maarne lagi. Yeh kriya Arpita itni tezi se kar rahi thi, ki ek patthar Luv ko bhi lag gayi aur woh gir pada. Lekin, woh Saanp apni disha badalkar wahan se chala gaya. Luv utha aur usne peeche mudkar dekha toh Arpita ke ek haath mein gulel tha aur dusre haath mein mutthi mein patthar bandha hua tha. Darr ke maare Arpita ne mutthi mein patthar kas ke pakad kar rakha hua tha. Lekin, jab usne us Saanp ko Luv se dur dekha, toh woh aashvast hui aur usne apne haath dhele chod diye, jis wajah se uske haath se baaki bache patthar gir gaye. Arpita ke haathon se girte hue pattharon ko dekh, Luv ko laga ki usne jaan bojhkar uspar vaar kiya hain, jabki kal usne Arpita ko bachaane ki koshish ki thi. Luv bina kuch kahe waha se chala jaata hain. Kai dino tak Luv ki un dono se baat-cheet nahi hui. Kuch dino ke baad, Luv ki Sumit se baat-cheet toh dubara shuru ho gayi. Lekin, Arpita se abhi bhi baat-cheet band hain. 

In dono haadson ke wajah se Luv aur Arpita dono hi ek dusre se bohut dur ho gaye. Sabhi ko laga ki bacche hain. Kuch dino mein sab kuch bhool-bhalkar yeh dono dubara dost ban jaayenge. Lekin, woh log galat the. Yeh dono ek dusre ke tagde dushman ban chuke hain. Ek mahina beet gaya, lekin dono hi ek dusre se shabd bhi baat-cheet nahi kiye. Dono parivaar ne un dono ko bohut samjhaya, lekin, woh dono hi apne zidd par ade rahe. 

Samay ka pahiya apni gati se ghumta raha aur dekhte hi dekhte yeh teeno bacche kab bade ho gaye pata hi nahi chala. Yeh teeno bacche, ab bacche nahi rahe. Luv aur Sumit bohut pakke dost ban chuke hain. Lekin, Luv aur Arpita ki aaj bhi ek dusre se zara bhi nahi banti hain. Ab toh ghar ke bado ne un dono ko samjhate-samjhate haar maan li hain. 

Ek din ki baat hain, hamesha ki tarah us shaam bhi, dono parivaar saath mein baramde mein baithe hue the. Sabhi ek dusre se bohut ghul-milkar baat-cheet kar rahe the. Tabhi Shailesh ne kaha, "Main yahan par maujood sabhi logo se ek baat kehna chahta hoon." 

Sabhi Shailesh ki aur dekh rahe the. Sabka dhyaan apni aur paate hi, Shailesh ne apni baat kehna shuru ki, "Main bohut khush hoon ki hum sabhi log itne saalon se ek saath hain. Main khush hoon ki, hum dono parivaar kabhi bhi ek dusre ko apne se alag nahi samjha. Main khush hoon ki, alag-alag ghar mein rehne ke bawjood humare beech kabhi bhi aapas mein koi parda nahi raha." Sabhi log bhaavuk ho gaye the aur Shailesh ki aankhon mein aansun bhar aaye. 

Tabhi Akshay apni kursi se utha aur woh Shailesh ke pass jaakar khada ho gaya. Shailesh ne apni baahen phailayi aur Akshay ne use apne gale se laga liya. Ab Akshay ki bhi aankhen bhar aayi. Dono padosi dost, kaafi der tak ek dusre ko gale se kaske lage rahe. Un dono ko dekhte hue, wahan par baithe baaki logon ki aankhon mein aansun aa gaye the. Yeh unke khushi ke aansun the. Kaafi der tak waha par sabhi log khaamosh the. Aise bhavuk shan mein, sabhi ko beete hue pal yaad aa rahe the. 

Beete hue shano ko yaad karte hue, kuch samay beet gaya. Tabhi Nikita ne kaha, "Accha ab bohut ho chuka rona-dhona. Ab hum log kuch aur baatein karte hain."

 Snehal - "Aaiye bhabhi. Hum log khaana nikaal lete hain."

Nikita - "Thik hain Bhabhi."

Dono saath mein kitchen ki aur chale jaate hain. Tabhi Akshay kehta hain, "Ab bas hum apne bacchon ki Shaadi dhoom-dhaam se kara le. Ek baar main apne teeno baccho ki Shaadi hote hue dekhna chahta hoon. Uske baad main bade chain se mar sakta hoon."

Shailesh - "Main bhi."

Akshay aur Shailesh dono saath mein baithte hain aur ek dusre se baat-cheet shuru karte hain. Tabhi Snehal aur Nikita khaana lekar Hall mein aate hain aur use table par rakhna shuru karte hain. Akshay aur Shailesh abhi bahar baaithe hue ek dusre se baat-cheet kar rahe the. 

Akshay - "Toh tumhara business kaisa chal raha hain ?"

Shailesh - "Accha chal raha hain. Aur tumhara ?"

Akshay - "Abhi haal hi mein ek badi deal hui thi. Usmein mujhe accha khaasa profit hua hain."

Shailesh - "Chalo accha hain."

Akshay achaanak se kuch sochne lagta hain. Akshay ko gehri soch mein pada hua dekh kar, Shailesh usse puchta hain, "Kounse khayalon ke samandur mein doobe hue ho Bhai ?"

Akshay - "Khayal toh khayal hota hain. Yeh bas ek soch ke saath shuru hoti hain aur insaan ko usmein phansati chali jaati hain. Jis soch ko insaan zara bhi tavajjo nahi deta hain, wahi soch dheere-dheere insaan ke chinta ka vishay bhi ban jaati hain aur woh dekhte hi dekhte usmein phansata chala jaata hain, bilkul ek makadi ke jaal ki tarah."

Shailesh - "Aakhir aisi bhi kya baat hain, jisne mere dost ko itna pareshan kar rakha hain ?"

Akshay - "Ladki ka baap hoon yaar. Beti ab jawaan ho chuki hain."

Shailesh - "Haan toh mera beta bhi toh jawaan hain."

Akshay - "Matlab ?"

Shailesh - "Dekho Akshay. Hum dono ek dusre ko kaafi saalon se jaante hain. Hamare beech kabhi koi parda raha nahi hain. Shayad hi aisi koi baat hogi, jo hum dono ko ek-dusre ke baare mein pata na ho. Toh kyun na hum apni is dosti ko rishtedaari mein badal le ?"

Akshay phir se soch mein pad jaata hain. Yeh dekh kar Shailesh usse puchta hain, "Ab kya soch raha hain Bhai ?"

Akshay - "Tumhe bhi pata hain Shailesh ki Luv aur Arpita, ek dusre ko kitne napasand karte hain. Pata nahi aisa kya haadsa hua un dono ke darmiyaan ki unka rishta achaanak se khatam ho gaya ? Un dono ke beech mein rishta naam bhar ka bhi nahi reh paaya ?"

Akshay ko samjhate hue, Shailesh usse kehta hain, "Bacche hain. Dono waqt ke saath-saath samajh jaayenge. Main jaanta hoon ki yeh dono ek dusre ko zara bhi mahattva nahi dete hain. Lekin, yeh dono ek dusre ke alaawa aur kisi ke saath nahi nibha paayenge. Agar humne in dono ki Shaadi kara di, toh yeh dono aakhir tak ek dusre ke saath chalte rahenge. Yeh mera Dil kehta hain."

Akshay - "Hmm. Tum thik keh rahe ho Shailesh. Lekin, hum in dono ko samjhayenge kaise ?"

Shailesh - "Dekhte hain. Koi acchi tarkeeb sochni padegi."

Tabhi hi, Nikita aur Snehal waha par aa jaate hain aur Akshay aur Shailesh un dono se is baare mein baat-cheet karte hain. Un dono ne bhi is maamle mein apni sehmati jataa di. Woh chaaron khush toh the. Lekin, unhe yeh bhi pata tha ki jab Luv aur Arpita ko yeh baat pata chalegi, tab ek bhuchaal bhi aa sakta hain. Aakhir mein un logon ne tai kiya, ki woh un dono se himmat karke isi waqt baat karenge. 

Teeno baccho ko bulaya gaya aur un chaaron ne unse is baare mein baat ki. Un teeno ne bohut gambhirta se aur shaanti se is baat ko suna. Kuch der tak sochne ke baad, woh teeno hi is rishte par raazi ho gaye. Woh chaaron bade hairaan the ki bacche itne aasani se maan jaayenge. Lekin, unhe is baat ka bhi ehsaas ho gaya ki bacche ab samajhdaar ho chuke hain. 

Agle din se hi Shaadi ki tayyari shuru ho gayi. Shaadi agle mahine thi. Luv aur Arpita apni Shaadi ko lekar zara bhi utsukh nahi the. Wahi dusri aur Sumit kuch alag hi wajah se pareshan tha. Woh yeh soch raha tha ki woh apne bachpan ke dost ki Shaadi ki khabar se khushi se jhoom uthe, ya phir apni behan ki bidaai par roye. Haalanki, Shaadi ki tayyariyon mein sabse zyada sakriya wahi tha. 

Aakhir mein Shaadi ki taarekh aa hi gayi. Dono mandap mein baithe aane wali zindagi ke baare mein asamanjas mein pade hue the. Aakhir mein Shaadi ki saari rasmein poori hui aur dono ko Luv ke kamre mein le jaaya gaya. Arpita bed par jaa baithi. Uski gardan jhunki hui thi. Luv ne kundi lagaakar darwaaza andar se band kiya. Band darwaaze ki aawaz sunte hi Arpita ki nazar Luv par padi. Luv ne bhi use dekha aur kaha, "Ab toh hume na chahte hue bhi ek dusre ki shakal saari zindagi dekhte rehni padegi. Toh kyun na hum yeh soche ki ek dusre ka saath kaise diya jaaye."

Arpita - "Maine sapne mein bhi kabhi nahi socha tha ki main tumhari biwi banungi. Thik hain, hum apne gile-shikwe bhulane ki koshish karte hain. Lekin, tumhe ek baat toh maanni hi padegi, agar us din maine gulel se patthar nahi maara hota, toh us saanp ne tumhe kaant hi liya hota."

Luv - "Kya tum sach keh rahi ho ?"

Arpita - "Kya main apni Shaadi ke din jhooth kahungi ?"

Luv - "Kyunki uske thik ek din pehle maine tumhe bicchoo ke dank se bachaya tha."

Ab dono hi hairaan reh gaye the. Dono hi apna Sar pakad kar baith gaye the. Woh dono is baat se pareshan the ki aakhir woh dono bewajah hi itne saalon tak ek dusre se khafaa rahe. 

Thodi der ke baad, Arpita ne kaha, "Aakhir itne saal hum dono ne ek dusre se bewajah khafaa rehkar zaaya kiye."

Luv ne kuch pal socha aur phir kaha, "Ab tak jo gaya, woh ho gaya. Beete hue kal ko badla toh nahi jaa sakta hain. Lekin, hum apna aane wala kal toh sawaar sakte hain." Arpita Luv ko dekh rahi thi aur Luv dheere-dheere Arpita ke nazdeek gaya. Arpita ke kareeb pohunchte hi, Luv ne uska haath apne haathon mein liya aur kaha, "Kya hum apni saari zindagi bas ek-dusre mein ek accha saathi dhoondhne mein laga de, ya hum ek dusre ke pyaar se apni aane wali zindagi ko khushaal bana de ?"

Ab Arpita phoont phoont kar rone lagti hain aur Luv use samjhane mein lag jaata hain. 

                 - Ved Vineet Gautam